М??алімні? к?сіби дамуы

Оспанова Айнур Акбаевна

Алматы облысы Қарасай ауданы Шалқар ауылы

«М.В.Ломоносов атындағы орта мектеп»КММ

Қазақ тілі мен әдебиеті пәнінің мұғалімі. І(ілгері) деңгей.

Мұғалімнің кәсіби дамуы-білім беру жүйесінің негізі

Бүгінгі ғылым мен техниканың қарыштап дамып бара жатқан заманында, қай мемлекетте болмасын, қоғам ұстаздар алдына жоғары талап қойып отыр. Қазақ халқының көшбасшысы Н.Ә.Назарбаев «Мен білім беру жүйесіндегі іс жағдайын түбегейлі өзгертуді стратегиялық міндет деп санаймын»; «Ұлттық бәсекелестікке қабілеттілігі бірінші кезекте оның білімділік деңгейімен анықталады»; -деп көрсетті Қазақстан халқына жолдауында. «Мектептің тірегі де,тіреуі де –оқыта білетін мұғалім»-деп, ұлы ағартушы А.Байтұрсынов өткен ғасырда айтып кеткен сөз, бүгінгі күні де өзектілігін жоймай отыр. Қазіргі жаhандану кезеңінде, ақпараттың өте көп кезінде ,оқушыны мектеп бағдарламасына қызықтырып оқытудың өзі де, мұғалімнен жоғары біліктілікті қажет етеді. Мұғалім оқушыларға білім беру үшін, ең алдымен оқушы қажеттілігін анықтай отырып барып, білім алуларына жағдай жасау керек. Оқушыларға дәстүрлі, дайын білім беруден арылып, оқушылардың өз бетінше, оқушы қажеттілігін есепке ала отырып, білім алуына жағдай жасау бүгінгі күні шешімін таппай отырған, келелі мәселе. Қазіргі таңда, Назарбаев зияткерлік мектептері мен Кембридж университетінің білім беру факультеті мен Педагогикалық шеберлік орталығы дайындаған бағдарлама бойынша елімізде мұғалімдердің кәсіби шеберліктерін көтеру үшін ел аумағында педагог мамандары курстан өткізу қарқынды түрде жүргізіліп келеді. Курстан өтіп, сертификатталған мұғалім мектеп өміріне тың жаңалық, соны серпіліс әкелуде. Өз ұжымымен жаңадан игерген әдіс- тәсілдерімен бөлісіп, коучингтер, шеберлік сыныптары, семинарлар, үлгілі сабақтар өткізу арқылы мұғалімдердің кәсіби дамуына оң ықпал етуде. Курстан өтіп келген І, ІІ деңгейлі мұғалімдер өзі жұмыс атқаратын мектеп ұжымына келген соң мектепті дамыту жоспарын жасап, сол жоспар бойынша мұғалімдерді Кембридж технологиясының 7 модулімен таныстырып, өз сабақтарында қолдана алуларына күш салып, еңбек етуде. 7 модуль әлемнің дамыған өркениетті елдерінде әбден екшеліп, тәжірибеден өткізіліп, оқушының жан-жақты дамып, білімді, сыни ойлай алатын, болашақта ел экономикасының дамуына үлес қоса алатын, мектепте алған білімін тәжірибеде қолдану дағдысы дамыған, креативті ойлай алатын, адамгершілік қасиеттерді дәріптейтін ұрпақ тәрбиелеуге негізделіп жасалған. Осы бағдарламаның идеясын ел мектептерінде кеңінен қолданып, тарату үшін білім беру саласы қызметкерлері күні-түні аянбай, қажырлы еңбек етуде. Оған дәлел, аймақтық, аудандық, облыстық, республика көлемінде өткізіліп жатқан семинарлар, шеберлік сыныптары, веб-конференциялар, он-лайн сабақтарға ұстаздар мен білім беру ұйымы қызметкерлерінің бірге қатысып, талдап, шешімі қиындау деген мәселерді бірауыздан шешуі болып табылады. Білім беру саласындағы осындай өзгерістер ата-аналар мен оқушылар тарапынан да оң бағасын алуда. «Мектептің –жүрегі де, тірегі де –ұстаз». Ұстаз күнделікті ізденіп, кәсіби біліктілігін көтермейінше, білімді ұрпақ тәрбиелеу мүмкін емес. Өскелең ұрпақтың ел экономикасын көтеріп, Қазақстанның әлемдік аренада бәсекеге қабілетті мамандар даярлайтын ел болуы үшін, адами факторды дамыту қажеттілігі туындап отыр. Ендеше, әр мұғалім қоғам алдындағы міндетіне бей-жай, немқұрайлықпен қарауды қойып, өз іс- тәжірибесіне сыни көзқараспен қарап, рефлексия жасап, әрдайым кәсіби өсу, даму үстінде жүйелі, қажырлы еңбектенуі керек. Елбасымыз Н. Назарбаев «Білім беру реформасы – Қазақстанның бәсекеге қабілеттілігін қамтамасыз етуге мүмкіндік беретін аса маңызды құралдардың бірі. Бізге экономикалық және қоғамдық жаңару қажеттіліктеріне сай келетін осы заманғы білім беру жүйесі қажет», - деп атап көрсетті Қазақстан халқына жолдаған жолдауында.