Адамның ішкі әлемі

Мақсаты: жан дүниенің тазалығы мен оны кемелдендіру туралы түсіндіре отырып, дұрыс әрекет құндылығының мәнін ашу.

Міндеттері:

- оқушыларды жан дүниенің тазалығын сақтап, ар-ұжданмен өмір сүруге үйрету;

- адал өмір сүруге, өз өмірін бағалай білуге баулу;

- қайырымдылық, сыйластық қасиеттеріне тәрбиелеу.

Ресурстар:

(құралдар, мәліметтер үнтаспа)

Сабақтың барысы: 1. Ұйымдастыру кезеңі «5 Т» ережесін еске түсіру

Жағымды күйге келу «Орманға ойша серуен» жаттығуы

Баяу музыка қосылады.

2. Үй тапсырмасын тексеру

№ 4 сабақ 20-бет Шәкәрімнің «Мәнді сөздер» әңгімесін оқу.

- Мәтіндегі «таза жолы» қандай жол?

- Ол «таза жолға» адамды оның бойындағы қандай құндылықтары мен қасиеттері жетелейді?

- Мәтінде кімдерді «сезімі ояу, есті жан» дейді? Сеніңше, ондай жандар ар-ұжданын басшылыққа ала ма?

- Ар-ұждан адамды қандай жолға бастайды?

- Өзің өмір жолыңда нелерді басшылыққа аласың? Неліктен?

3. Дәйексөз

Әр адамда сенген ісін орындауға жетерлік күш-қайрат болады. ( И.Гете.)

4. Әңгімелеу Гүл сатушы қыз

Гүл сатушы қыз қолындағы раушан гүлдерін түгелге жуық сатып болады. Қолында тек бір тал ғана гүл қалады. Қыз үйіне келе жатып қолындағы гүлді жолдың қарсы бетінде қолын жайып отырған кісіге беріп кетеді. Ал бұл жағдай оған қатты әсер етеді. Ол кісі өмірінде бірде-бір рет өзін аялап, сүйіп көрмепті.

Гүлді ала салысымен қала маңындағы өзінің лашығына келеді.Үйіне келген соң сынық құмыра тауып, оған су толтырып, гүлді салып қояды. Ол үн- түнсіз гүлге қарап отырады. Кенет орнынан атып тұрып,әлгі құмыраны жуып, тазалап, мөп-мөлдір су құйып гүлді қайта салады. Ол іштей: «Мұндай әдемі гүл қалайша кір-кір құмырада тұрады екен, мен оны жуып-тазалап қойдым» деп масаттанады.

Әсем гүлге тағы құмарта қарап отырады. Ол ақырын қозғалып келіп, үстел үстінің шаңын көреді де, әсем гүлдің тұруына бұл лайық емес деп,үстелді жуып, айнадай етіп қояды. Гүлге құмарта қараған сайын таза үстел мен қып-қызыл раушан гүлі салынған мөлдір құмыраға мына лас болып шашылып жатқан лашық сай келмейтін сияқты болып көрінді. Ол бар пейілімен өзінің жылдар бойы тұрып келе жатқан күркесін жинастырып, сүртіп, тазалап әбігерге түседі. Кенет ол өзінің үнемі үңірейіп тұратын бөлмесіне жылылық толып, жайлы өмірді өзіне тым жақын сезінді. Ол бөлменің дәл ортасында тұрып бұрыштағы сынық айнадан өзінің кейпін көреді. Шашы өскен, киімінің алба-жұлбасы шыққан. Ол бүгінгі бар тапқанын алып жуынуға кетті. Өмірінде дәл бүгінгідей рахаттанып көрмеген шығар. Жұқа болса да таза киім сатып алады,сақал-мұртын қырып, шашын тарап ретке келтіреді. Моншадан шығып бара жатып қабырғадаға айнадан мүлде басқа адамда, жастық оты жалындаған келбетті жігітті көреді. «Мен не үшін көшеде өмір сүруім керек?» деп өзінен сұрады. Бұл оның осы уақытқа дейін өзіне тұңғыш рет осылайша сұрақ қоюы еді. Ол үйіне келіп мұндағы барлық дүниеге соншалықты риза пейілмен сүйсіне қарады. Екінші күннен бастап басқа жұмыс іздеуге кірісті. Жұмыс та табылды. Күндер зулап, айлар аунап жатты. Бірнеше жылдан кейін ол табысқа жеткен адамға айналады. Үлкен компания құрып, қалталылар қатарына қосылады.

• Сатушы қыз қолындағы гүлді кімге берді?

• Қыз ол гүлді қандай оймен берді?

• Көшеде отырған кісінің өмірі қалай өзгерді?

• Ол кісіні өмір сүруге жетелеген қандай күш?

• Адамның бір- біріне деген сүйіспеншілігі қандай істерінен көрінеді?

• Бұл қасиеттер қандай құндылықтың көрінісі?

• Дұрыс әрекет дегеніміз не?

• Өзіңнің басқа адамдарды қуанышқа бөлеген сәттерің туралы әңгімелеп берші.

5. Шығармашылық жұмыс, топпен жұмыс

Баяу музыка қосылады. Тапсырма шарты түсіндіріледі. 7 минут уақыт беріледі. Әр топ өз жұмысын қорғайды.

6. Топпен ән айту Өмір

Сөзін жазған: Қайнар Алагөзов

Әнін жазған: Есен Жүсіпов

7. Үйге тапсырма

Оқулық, № 5 сабақ 27-28 беттегі «Жаңылыс пен Ақиқаттың есігі» аңызын оқу.

Дәптер, 6-тапсырма «Өзіңнен ұяла жүрсең, сені ешкім де ұялта алмайды» тақырыбына эссе жазу.

8. Сабақтың қорытынды сәті.

Баяу әуен қойылады.

-Балалар, бүгінгі сабақтан алған жақсы қасиеттерді жүрегімізге сақтап алайық.