Ұқыпты болғың келсе

Тақырыбы: Ұқыпты болғың келсе

Мақсаты: Балаларға ұқыптылық, тиянақтылық, жинақылық туралы түсінік беру. Күнделікті өмірде ұқыптылықты қолдануға үйрету.

Тазалыққа, ұқыптылыққа, тиянақтылыққа тәрбиелеу.

Әдісі: түсіндіру, сұрақ-жауап, сайыс

Барысы

Балалар, қайырлы күн! Мен сендерді көргеніме қуаныштымын. Шаттық шеңберіне тұрып, бір-бірімізге көңіл күйде, жылы күйде жүрекпен, жақсы тілекпен, игі әдеппен сәлемдесейік.

Кіріспе

1. Ұқыптылық жөнінде әңгіме тыңдау.

Бір өте алыс Жарқыл деген елде Ұқыптылық деген падиша өмір сүріпті. Сапарға шыққан адамдар осы елге барғанды жақсы көретін. Оларға бұл елдің таза көшелері, аппақ-ақшақардай үйлері, хош иісті бақшалары, күтілген гүлзарлары ұнайтын. Осы елдің тұрғындары үйлесімді, әсем де жайлы ортада тұратын, өйткені олар барлық жерде және әртүрлі жағдайда ұқыптылық көрсететін. Ұқыптылықтың әсерінің ғажайыптылығы сонша, осы елді көрген әрбір адам өз елінде және бүкіл жер шарында сондай тәртіп орнайды деп үміттенетін.

Негізгі бөлім

Оқушылар үш топқа бөлінеді.

І-топ. «Ұқыпты» ІІ-топ. «Тиянақты» ІІІ-топ. «Жинақы»

Әр топ ұқыпсыздықтан арылудың жолдары туралы ойланып, өз ойларын айтады.

2. Ұқыптылық жайлы сұхбаттасу.

А)Ұқыпты болу деген не?

Ә) Не үшін ұқыпты болу керек?

Б) Ұқыптылық неден білінеді?

Ұқыптылық – тәртіпке деген сүйіспеншілік және өзіңді қоршаған ортамен үйлесімді өмір сүру. Ұқыпты адам әрбір затқа бөлек орын тағайындайды да, керек кезінде тез тауып алады. Ұқыпты болу – барлығын уақытымен жасау, жинақы болу. Ұқыптылық – істеген жұмысыңды алдын-ала ойластыру, жоспарлау және бастаған істі аяқтау.

Ұқыпты бала әрқашан да өз жұмыстарын уақытылы орындайды. Ал мұндай қасиетке ие бала жұмысқа да, оқуға да, ойнауға да, серуендеуге де, қонаққа баруға да, дос, жақын, туыс адамдардың көңілін көтеруге де үлгереді.

Ұқыпсыздықтан арылу үшін барлық жұмысты дер кезінде орындап отырған жөн. Оқу құралын, киімді таза ұстап, әдеппен сөйлеп, әдеппен тамақтануға тырысу керек. Өзіміздің де өзгелердің де уақытын қадірлейік.

Тиянақтылық – әрбір істі мұқият орындау, барлығын мұнтаздай және әсемдікпен жасауға тырысу.

Ұқыптылық – тәртіптілікке талпыну.

3. «Сенің сөмкеңде жинақылық, тәртіптілік сақталады ма?» (Оқушылар сөмкенің ішіндегі заттарды ретке келтіріп, дәптерлері мен кітаптары тысталған ба екен, соны тексеріп көріп, содан соң қайта ұқыптап сөмкеге салады).

4. Көңіл-күйді оң арнаға келтіру. (Балалар төмендегі сөздерді іштерінен қайталайды)

«Мен ұқыптымын. Мен әрқашан өз орнымды тазалыққа, тәртіпке келтіремін. Мен әрдайым өз заттарымды орын-орнына қоямын. Өзімнің не істейтінімді жоспарлап отырамын. Менің үйімді үйлесімдік пен әсемдік билейді. Менің үйім – ұқыптылық мекені!»

5. «Сенің сыныбыңда ұқыптылық билік ете ме?» ойыны. (Өздеріңді ұқыптылықтың патша-падишасы деп санаңдар да, бөлмені тыныш жайлап аралап шығыңдар. Сонан соң мұғаліммен бірге сыныпта тиянақтылық болу үшін не өзгерту керек екенін қағазға тізіп алыңдар да, соны іске асырыңдар).

6. Дәйексөзді қайталау. «Өз үйіңді тәртіпке келтір...».

«Ұқыптының уақыты мол»

Мақал-мәтелдер

1. ...ның тоны тозбас,

...дың ісі оңбас.

2. ...-тылық – істің көркі.

Жаңылтпаш

... бала –

Кітапты түптеп тастады.

... бала –

Кітапты бүктеп тастады.

Жұмысын басқаға жүктеп тастады.

Қорытынды

7.Құлықтылық жағдайды шешу. (Балалар әр түрлі жағдайда не істейтінін сұрау)

А) Сенің бөлмең керемет шашылып жатыр. Сен ұқыпты болсаң не істейсің?

Б) Сен сынып балаларымен бірігіп, бәрің серуенге шықтыңдар. Өздерің тамақ ішіп болғаннан кейін жерде көп қоқыс-қиқым қалды. Сендер ұқыпты болсаңдар не істейсіңдер?

В) Сенің үйдегі гүліңді шең басып қалыпты, көп жапырақтары сарғайып кетіпті. Сен ұқыпты болсаң не істейсің?

8. Тексеру тесті: «Жетістікке жеткізетін қадамдар». (Ұқыпты адам ба, егер...? – балалар «иә» не «жоқ» деп жауап береді).

а) Әр затты орын орнымен қойса

ә) Жұмысқа кіріспес бұрын не істейтінін жоспарласа

б) Күн тәртібін жасап алмаса

в) Өз өміріне әсемдік пен үйлесімділік енгізгісі келсе

г) Өз айналасындағы тиянақсыздыққа елең етпейді

д) Кітап, дәптерлерін таза ұстайды.