Наурыз жыл басы

Тақырыбы: Наурыз жыл басы

Мақсаты: Наурыз мейрамы туралы түсінік беру арқылы қазақ халқының салт-дәстүрлерін көрсету, тіл байлығын дәріптеу, қолөнер бұйымдарын көрсету және оларды құрметтей білуге тәрбиелеу.

Көрнекілігі: көктем тақырыбына оқушылардың салған суреттері, қанатты сөздер, гүлдер, шарлар, ұлттық тағамдардан әзірленген дастархан, қолөнер бұйымдары.

1-жүргізуші:

Қош келіпсіз, құрметті ата-аналар,

Жүздеріңнен мейірім мен нұр тамар.

Алдарыңда жауқазында құлпырған

Балғын жүзді біз бақытты балалар!

2-жүргізуші:

Армысыңдар мұғалімдер, әз жандар,

Білім іздеп, инемен құдық қазғандар.

Құшақ жая қарсы аламыз сіздерді

Би биленіп, ән де бүгін шырқалар!

1-жүргізуші:

Құрметті ұстаздар, ата-аналар, оқушылар! Наурыз мерекесі құтты болсын! Наурыз – «жаңа күн» деген сөз. Яғни бұл күн біздің ата-бабаларымыз мыңдаған жылдардан бері мерекелеп келе жатқан жыл басы мерекесі.

2-жүргізуші:

Көптен күткен Наурыз тойы арайлы,

Нұрға бөлеп жатыр міне маңайды.

Мал біткеннің бал татыған уызы,

Қуат болып қанымызға тарайды.

Төрт түлік мол халқымыздың сүйері,

Көңілімнің күмбірлеген күйі еді.

«Аман ба, деп, мал жаның?»

Бірін-бірі құшақтасып сүйеді.

-Ал балалар! Бір-бірімізге көрісіп, құшақтап жақсы тілектер айтып, Наурыз мейрамымен құттықтайық! (Оқушылар дауыстап кезектесіп тілектер айтады)

1-жүргізуші:

Наурыз тойың, наурыз тойың,

Құтты болсын халайық!

Күй төгілсін, би биленсін,

Шырқап әнге салайық,

-дей келе, келесі кезекті әнге береміз.

Хор: «Наурыз-көктем»

Ақерке:

Келді Наурыз даладай кеңдігімен,

Көк байрағы желбіреп желді күнмен.

Тәуелсіздік ұранын аспандатқан

Айналайын теңдігім, Елдігімнен .

Ақілгек:

Арайындай көрінген таңғы үміттің,

Басын қостық сан халық, сан бірі ұлттың.

Жарқырай бер, жер-көкте, жаса Наурыз,

Ұлт достық, мейрамы мәңгіліктің.

2-жүргізуші:

Шеберлерім өнер тамып қолымнан,

Жарқылмаған ата-баба жолынан.

Шеберқолдар өз өнерін көрсетсін,

Біз айтайық төрелігін соңынан.

-дей келе, түсті қағаздардан қиып құрақ түрлерін құрау сайысын өткіземіз.

(Отырған аналар 3 түсті қағаз бен қайшы беріледі. Соны қиып құрақ түрін жасап көрсетуі керек. 2.мин уақыт беріледі).

1-жүргізуші:

Жаңғырғаны сананың

Ұмытпады мұны кім?

Ата салтын бабамның

Алып келген осы күн,

«Ата көрген оқ жонар, ана көрген тон пішер» деп енді қыздарымызды ілгек қадаудан жарысқа шақырамыз.

Диас :

Аспанымда ақша бұлттар аунайды,

Наурыз тойы көңілімді баурайды.

Тебіренген табиғатта мәз-мейрам,

Аңқылдаған қазағымнан аумайды.

Ән: «Біз өмірдің гүліміз»

Орындайтын: Ерасыл, Алихан, Нұрдәулет.

1-жүргізуші:

Келіңдер Наурыз тойға бәрің бүгін,

Аямас өнерпаздар ән мен жырын.

Тойлайық халық тойы Наурызымның

Шуағын жерге төккен бақыт күнін.

2-жүргізуші:

Бақта құстар сайрайды,

Жайнап көктем нұрымен,

Жаңа дәстүр жырымен,

Ел наурызды тойлайды,

Қыздардың орындауында «Қамажай» биі

2-жүргізуші:

Наурыз мейрам жүректерге нұр сепкен,

Маңдайымнан сүйіп жатыр күн-көктем

Жарығымен шуағымен Күн-Ана

Алып келді жер бетіне гүл көктем.

Ортаға «Асық» ойынын ойнауға ұлдарды шақырамыз. (Шыққан соң шарты айтылады.).

1-жүргізуші:

Қош келдің, Наурызым ардақты

Халқым саған бар үмітті арнапты

Жылда осылай келе берсін жасарып,

Гүлге бөлеп, жырға бөлеп аймақты.

Би: «Қаражорға»

2-жүргізуші:

Қазақтың түрлі-түрлі дәстүрі бар,

Оның сырын ашқанға жұрт қызығар.

Жауаптарын таба ма екен ата-аналар,

Сол себептен қоятын сұрақтар бар.

Ал енді, балалар!

Жұмбақтың шешуін табыңдар.

Дәмді-дәмді тағамдарды жинайды,

Қонақтарды көңілдене сыйлайды.

Балалар: Дастархан

1-жүргізуші:

-Дұрыс айтасыңдар! Ал дастарханға қандай қазақтың ұлттық тағамдары қойылады?

Балалар: бауырсақ, шұбат.......

2-жүргізуші:

-Қазақтың ұлттық тағамдары,

Жасымнан жақын маған бәрі.

Теңгермес ем оларға мен,

Ешбір асты ғаламдағы-деп,

1-жүргізуші:

Бата беріп атамыз,

Бата беріп апамыз,

Тәтті болып жасалған,

Көжеден дәм татамыз-дей

Отырып, «Наурыз көженің» қалай дайындалатынын Айжан әжемізден біліп алайық, балалар!(Әжей әңгімелеп береді)

2-жүргізуші:

Алтын күні шуақ шашып аспаннан,

Жаңа жылым жыр думаннан басталған

Ақ дастархан жайып қазақ төріне,

Ақ ниетпен үлкендерден бата алайық.

1-жүргізуші: Үлкендерден бата алайық (Үлкен бір кісі бата береді )

Бақ дарысын бәріңе!

Ой қосылсын ойыңа!

Бой қосылсын бойыңа!

Аман-есен жетейік,

Келер Наурыз тойына!

2-жүргізуші:

«Наурыз жыл басы» атты тәрбие сағатымыз осымен аяқталды. Қош сау, болыңыздар!