Өлеңдер топтамасы

Мен беремін,жүректі алғың тегін!

Өзімді сөйлеп кетсем балап қыран,

Жүрегім бар кеуде де жылап тұрған.

Пенделердің бірімін өзгелерге,

Сауапты істі жасауға жаратылған.

Санаға қамап алып сан күдікті,

Дабыл қағып.Бұлқынып.Жан түрікті.

Естуімше науқастың төсегіне,

Бір нәзік жан,дәл кеше танылыпты.

Таба алмай дәрігер қыздың емін,

Киіп жүрген көрінед бейбақ кебін.

"Жүрек"дейді керегі сол науқасқа,

Мен беремін,жүректі алғың тегін!

Мен беремін,жүректі алғың тегін,

Тоқтатпасын.Татысын тірлік демін.

Ал,қанекей жүректі уақыт созба,

Көрсет қане!Донордың жатар жерін.

Ал жүректі!

Ал маған фәни тәмам,

Сал жүректі арлы іске жари алған.

Өлсем мен-ақ өлейін,жоқ наразым,

Қалса екен тек қана ару аман.

Ал, енді жүректің иесі,

Мендегі жұмырық жүректің,

Ендігі иесі өзіңсің.

Қажылған жүрек қой мендегі,

Жүрерсің оған да төзіп шын.

...Ал енді жүректің иесі,

Жүрегім өзіңе аманат...

Жыр жаздым өзіңе

Ұзадың жанымнан алысқа,
Батады жаныма қайтейін.
Түнеріп шығады уақытынан,
Білсеңіз,қалқатай,ай кейін.

Сағынып өткен күн елесін,
Сен маған бір күні келерсің.
Шөлдеген жанымды қандырып,
Махаббат шырынын берерсің.

Тоңдырсын мені де жел мейлің,
Демедің сен маған келмеймін.
Бір күні келерсің сағынып,
Жаңбырды аңсаған жер дейін.

Бетбұрсаң мен жаққа,саялым,
Өзіңе мен құшақ жаямын.
Жыр жаздым өзіңе Қозы боп,

Қабыл ал мұнымды Баяным!

Сыртым-қара болғанменен ішім-ақ...

Құлазыған,құлазыған көңілім,
Құлазудан солғын тартты өң-нұрым.
Құлазиды,құлазиды күнеге,
Менің мынау,менің мынау өмірім.

Біреуге-ақ,ал біреуге-қарамын,
Білмейм(ін) маған қандай оймен қарадың.
Сыртым-қара болғанменен ішім-ақ,
Сен осыны біле-білгің,қарағым.

Кейде-боран,кейде-дауыл секілді,
Көңілім бар,түтеп тұрған сең сынды.
Құласа да сынақтарда көңілім,
Ал,өмірім-болашаққа белсенді.

Мені біреу ұнатар да,ұнатпас,
Бірі-жұбатар,ал біреуі-жылатпас.
Көре алмаған сүріндірсе дұшпандар,
Достарым бар-қолдап,қорғап,құлатпас...

Перзент сөзі

Әкетай,
Қол жетпес биік күнбісің?
Сұлу бір сазды үнбісің?
Сақтап жүрген жансыз ғой,
Бабалардың үрдісін.
Маған үлгі,әкетай,
Жасап жүрген нұрлы ісің,
Мейірім толы жанарың,
Әкетай,алтын нұрмысың?
"Ұланым қашан келер"деп,
Жолыма қарап жүрмісің?

Әкетай,
Мен кейде өжетпін,жасықпын,
Жалғаннан бір табан қашықпын.
Балалық кездегі бал шырын,
Күндерге білсеңіз ашықтым.

Әкетай,
Малшынып суығына сары аяздың,
Мен үшін еңбек етіп күні-түні.
Әкешім,жақсы оқып сабағымды,
Ақтаймын маған артқан үмітіңді.

Ұлан

Ұ-лыдай болсыншы деп ұлағатты,
Ұ-л болып,бойымызға қан дарыпты.
Ұ-лына атам менің аян беріп,
Ұ-лан деп қойған екен маған атты.

Л-айықты болсам деймін осы атқа,
Л-ақтайын ырғығам жоқ осал таққа.
Л-айланып кетпесе екен мөлдір ғұмыр,
Л-айым,о,Жаратқан содан сақта!

А-қтасам деген арман үміттерді,
А-рылтып саналардан күдіктерді.
А-рманым адал сөйлеп,тура жүріп,
А-дамға таныту ед(і) шын тектіні.

Н-алыған кездерімде болды ұдай,
Н-әр қылып сабыр берді сонда Құдай.
Н-изамдай адам болу,мақсат тағы,
Н-амыстың туын ұстау ешбір жықпай.

Атырауым

Жайыққа дейін созылды атырабың,
Арай күліп атуда әрбір таңың.
Күннен-күнге өркендеп өсе бергің,
Мұнайлы өлке,киелі Атырауым!

Махамбет,Исатайдай батырың бар,
Ұрпағы біз солардың-батыр қауым.
Ұлылардың өлкесі,құт мекені-
Жасай бергің киелі Атырауым!

Әсемдігің алғасын көздің жауын,
Шағылар ма,ал сонда мендік тауым.
Жаса,жайна,жалын ат әрдайымда,
Арайлы да ардақты Атырауым!!!

Ұлан Өтешқалиұлы Иманғалиев-Атырау облысы,Құрманғазы ауданының тумасы.Х.Досмұхамедов атындағы Атырау Мемлекеттік университетінің қазақ тілі мен әдебиеті мамандығын бітірген. Студент кезінде "Университет"газетінің меншікті тілшісі болды. Қазіргі таңда С.Н.Имашев атындағы жалпы орта мектебінде өз мамандығымен ұстаздық қызмет атқаруда.

Қаламынан өрілген өлеңдері мен мақалалары "Ана тілі","Алтын қайық","Мұнайлы Астана","Атырау", «Егемен Қазақстан» т.б.түрлі деңгейдегі баспа беттерінде жарық көріп келеді.