Жүректен жүрекке

Жүректен жүрекке

Мақсаты: Оқушылардың «сыйластық» құндылықтары туралы түсініктерін кеңейту. Үлкенге құрмет, кішіге ізет көрсетіп, алғыс айта білуге баулу;

Міндеттері:- ризашылық пен алғыс туралы түсінік беру;

–          үлкен – кішіге деген сүйіспеншілігін, сыпайылық қарым-қатынасын дамыту;

–          әдептілікке, кішіпейілділікке, ізеттілікке тәрбиелеу;

1- жүргізуші: Сәлеметсіздер ме, көңілі күн, жүздері гүл қадірлі қонақтар!

2-жүргізуші: Қайырлы күн жүректері мейірімге толы ұстаздар қауымы

1-жүргізуші: Бүгінгі көңілдеріңізге қуаныш ұялататын «Жүректен жүрекке» атты мерекелік кешімізге қош келдіңіздер!

2-жүргізуші: Ұстазға әркім басын ию керек.

Кемеңгер, ақылшым деп білу керек,

Сен бүгін керемет боп кетсең дағы.

Жеткізген сол ұстаз деп білу керек,

Жақсылар ұмытпайды ұстаздарын.

Ойлайды, олар сонымен ұшталғанын,

Мәңгілікке мақтанып өтеді ұстаз.

1-жүргізуші: Шәкіртінің биікке шыққандарын,-дей келе 1 наурыз –«Алғыс айту» күніне орай бізді біліммен сусындатқан ұстаздар қауымына ризашылығымызды білдіріп, алғыс айтқалы отырмыз.

2-жүргізуші:Иә, сонымен қатар нәзік жандылардың әйелдер қауымының төл мерекелері 8 наурыз Халықаралық әйелдер күні де жақындап қалды. Ендеше, ұстаздарымызға алғысымызды жаудырып, барша жақсы сөздерімізбен мерекелерімен құттықтайық.

1-2- жүргізуші: Мереке құтты болсын!

1-жүргізуші: Осы сен алғыс айту күні туралы не білесің?

2-жүргізуші: Талайды тағдырлардың басын өз шаңырағының астына біріктіріп, қанатымен су сепкен қарлығаштай, қамқорлығына алған Қазақстанда адамның адамға құрмет көрсететін күні белгіленбек. Мемлекет басшысы Нұрсұлтан Назарбаев барлық ұлттың бір-біріне және қазақтарға алғыс айту күнін бекітуді ұсынды. XXII сессиясының ашылу салтанатында сөйлеген сөзінде Назарбаев: «Қазақстан халқы Ассамблеясының құрылған күнінде 1 наурызда барлық ұлттың бір-біріне алғыс айту күні деп белгіленсе әділетті болар еді»,-деп нақтылады. Міне, сол күннен бастап 1 наурыз – жалпы адамдардың бір-біріне жақсылық жасаған әрекеттеріне алғыс айту күні болып тойланбақшы.

1-жүргізуші:Қазақ қызы күлімдеп күн көзіндей

Дөңгеленіп билейді ай жүзіндей

Жұлдыздардай өрнекті аспандағы

Биші қыздар бұрала билейді би

Би: Қазақ биі

2-жүргізуші: Ақырын жүріп анық бас

Еңбегің кетпес далаға

Ұстаздық еткен жалықпас

Үйретуден балаға, - деп Абай атамыз айтқандай, шәкірттерінің өздерінен озғанын қалаған ұстаздар қауымына айтар алғысымыз шексіз.

1-жүргізуші:Ұстаз деген ұлы сөз ұлағатты,

Ол болмаса, кім береді парасатты.

Асылын беріп шәкірт бойларына,

Ағартқан сол үшін де қара шашты

(4-сынып оқушыларының ұстаздарға арнауы)

2-жүргізуші:Жылы сөз, қайырымды іс, жақсы ой, кіршіксіз сезімдеріңізді ешкімнен ешқанан аямаңыздар, «рахмет» деген сөзді жиі айтйңыздар. Адам алғыс пен ризашылықты естіген сайын, жақсылық жасағысы келіп тұратынын есте сақтаңыздар.Табиғат – анаға мейірімді күні үшін, көңілді жаңбыры мен ақ қары үшін, жұмсақ ұлпа бұлты үшін, жақын адамдарға қайырымдылығы мен риясыз махаббаты үшін алғыс айтуды ұмытпаңыздар. Алғысқа бөлену бір бөлек, алғыс айта білу де өнер.

1-жүргізуші: Мың алғыс, мың алғыс аналарға!

Аты да, өзі де ұлы тұрар алда

Отанмен, туған жермен теңдесесің

Нәр алған аналардан даналар да

Тірлікке бастаусыңдар тұнық бұлақ

Таң шапақ сәулесіңдер жарық шырақ

Жүз көрер айнасыңдар шаң қонбаған

Жайдары жаз күніндей жанға шуақ

2-жүргізуші: Бүгінгі күн – нұрлы күн

Жарық шашқан әлемге

Ескеретін күн бүгін

Ризашылық қой бұл елде

1-жүргізуші:Ризамын бүгінге,

Ризамын бүгінге,

Ризамын бүгінге,

Ризамын қазірге!

Ризамын,ризамын,ризамын, бүгінге

Ризамын,ризамын,ризамын, қазірге

Ән:

2-жүргізуші: Бізге көктем келді. Көктемнің ең алғашқы мерекелерін тойламақпыз. Ал осы көктемнің, мерекенің, даланың сәні неде?

1-жүргізуші: Әрине, көктемнің сәні жайқалған сарғалдақ пен қызғалдақта. Көктемнің сәні ең алғаш қауызын жарған бәйшешекте. Көктемнің сәні гүлдердің хош иістісі – раушанда.

2-жүргізуші: Ендеше, дәл қазір сол жайқалған гүлдеріміздің әсем билерін тамашалап алайық.

Би: «Гүлдер биі»

1-жүргізуші: Мен қазір саған бір әзіл айтпақшымын.

2-жүргізуші: Әзіл? Жақсы айта ғой, тыңдайық ендеше

1-жүргізуші: Бүгін сабақта жолым болды,- депті бір оқушы. Сонда қалай жолың болды, -депті екінші оқушы.

• Ұстазым мені бұрышқа тұрғызып қойғысы келген еді. Бірақ, барлық бұрыш бос емес екен,-депті.

2-жүргізуші: Әзілің жақсы екен! Сенің әзіліңді жалғастыратын, Ембі қаласы әкімінің кубогы – 2017 жайдарман сайысында «Үздік ойыншы» номинациясымен марапатталған Байдырахман Ермаханды командасымен ортаға шақырамыз.

(Жайдарманшылар әзілдері)

1-жүргізуші: Ұстаз болу – жүректің батырлығы

Ұстаз болу – сезімнің ақындығы

Ұстаз болу – мінездің күн шуағы

Азбайтұғын адамның алтындығы, - деп ақын Ғафу Қайырбеков жырлағандай, сөзі маржан, үні ән ұстаздарымыздың бар болғанын мақтаныш етемін. Әрине, ұстаз жүгі – ауыр жүк.

2-жүргізуші: Ұстаздардың әсерлі үнмен, асықпай мәнерлеп сөйлеген сөзінен әрбір оқушыға деген қамқорлықтың, аналық, әкелік сезімнің дана ойдың ыстық лебі есіп тұрғандай. Иә, адамның жан дүниесін түсініп, ренжітпей, қателігін сездіре білу – бұл нағыз шеберлік емес пе? Жылы сезімге толы жүрек біздің ұстаздарымызға тән.

Би: «Жүректен жүрекке»

1-жүргізуші:Халқымыздың батыры Б.Момышұлы айтқандай «Ұстаздық – ұлы құрмет». Себебі, ұрпақты ұстаз тәрбиелейді. Болашақтың басшысын да,данасын да, ғалымын да, егінші мен кеншісін де ұстаз өсіреді. Өмірге әкелген аналарды қалай ардақтасақ, сол ұрпақты тәрбиелейтін ұстаздарды да солай ардақтауға міндеттіміз.

2-жүргізуші: Ендеше, «Ұстазым» деп ән шырқап, құрмет көрсетейік.

Ән: «Ұстазым»

1-жүргізуші: Анаға – өмір сыйлағаны үшін

2-жүргізуші: Әкеге – қорған болғаны үшін

1-жүргізуші:Далаға – гүлдері мен көк шалғыны үшін

2-жүргізуші: Сөзге – жанды жылытатыны үшін

1-жүргізуші: Күнге – шуағы мен назары үшін

2-жүргізуші: Жұлдызға – қараңғы түндегі жарығы үшін

1-жүргізуші: Досқа – құшағы үшін

2-жүргізуші: Әжеге – ыстық алақаны үшін

1-жүргізуші: Суға – тірішілік көзі болғаны үшін

2-жүргізуші: Жерге – махаббаты мен бар болғаны үшін

1-жүргізуші: Отқа – жылуы үшін

1- 2 жүргізуші: АЛҒЫС БІЛДІРЕМІЗ!

2-жүргізуші: Жылы жүрек – жылы лебіз!

Даламдай кең пейілім

Жүрегім толы мейірім.

(Жүректер таратылады)

1-жүргізуші:Құттықтау сөз мектеп директоры Е.Т.Шолтаевқа беріледі.

2-жүргізуші: Ұстаз – мектептің жүрегі.Ұстаз – ұлағатты есім. Ұстаз – ұлы тұлға.

Ұстаз – ұлттың тірегі.

1-жүргізуші: Әрқашан бір – бірімізге деген жылы лебізімізді білдіріп, алғыс айтып, жақсы іс жасап алғыс алып жүрейік!

2-жүргізуші: Келесі кездескенше қош сау болыңыздар!