Отбасы - ?мір аясы!

Тақырыбы:  Отбасы өмір аясы
Мақсаты: Оқушылардың отбасы туралы түсініктерін кеңейту;
Міндеттері:  
Отбасының адам үшін маңыздылығын жан-жақты ашу;
Отбасындағы жарастықты, сыйластықты қарым-қатынасының дамуына ықпал ету;
Отбасындағы сыйластыққа, сүйіспеншілікке тәрбиелеу.
Пайдаланылған құралдар:  үлестірме қағаздар, интерактивті тақта, бейнефильм.
Сабақтың барысы:
1.Шаттық шеңбері: Мұғалім сүйіспеншілік ұғымының отбасынан басталатынын және адамға ең қымбатты да, ең асыл да ата-ана екенін ұғындыру мақсатында Ы. Алтынсариннің  «Ананың сүюі»  өлеңін оқып шығады.
                          Ананың сүюі

Кім сендерді балалар сүйетұғын,
Қуанышыңа қуанып, қайғыңа күйетұғын.
Түн ұйқысын төрт бөліп,кірпік қақпай,
Шешең байғұс дамылсыз жүретұғын.
Кім сендерді балалар тербететін,
Еркелетіп, ойнатып, сергітетін?
Жалқау болсаң,балалар, жаман болсаң,
Қамқор  анаң  көз жасын көлдететін.
Кім сендерді сағынар шетке кетсең,
Ғылым іздеп,тез қайтпай, көпке кетсең
Ұмытпа, ең кемінде жұлдыз сайын,
Хат жазып тұр төбесі көкке жетсін.
Кім сағынар сендерді келгеніңше,
Құлындарын көзімен көргенінше?
Сендер қайтып келгенде адам болып,
Еш арманым болмас дер өле- өлгенше.
                                  

2.Әңгімелесу (ойланайық, пікірлесейік)
«Отбасы жарастығы», «Отбасы бақыты», «Отбасы қуанышы» деген ойларды қалай түсінесің?
Адам отбасындағы сыйластыққа қалай қол жеткізе алады?
Ата-анаңды қуанышқа бөлеген кездеріңді айтып бер?

3.Жаңа ақпарат
 Ата-аналар мен балалардың, аға-інілермен, апа-қарындастардың және туған-туыстардың ортасын құрайтын отбасы – қоғамның ең маңызды ұйытқысы болып табылады. Өйткені адам ең алғаш шыр етіп, отбасының тәрбиесін алады
Отбасы – жұртты жақындастырушы, ұрпақпен ұрпақты табыстырушы, адамаралық туысқандық ұғымдар тудырушы, олардың бір-біріне деген махаббат, сүйіспеншілігін тұтатушы, ғаламат күшті жері – ұрпақ өрбітуші, рухани бірліктің, ұрпақаралық тұтастықтың отын жағушы ерекше ұя. Сондықтан да отбасы барша адамзатқа ең жақын, ең қасиетті ұғым.

4.Шығармашылық жұмыс  
Ұлағатты сөздерді оқып, олардың мәнін түсіндір.
Қызы анадан үйренбей өнеге алмас
Ұл атадан үйренбей өнеге алмас
                                                                      Қорқыт ата
Ұлт болам десең, бесігіңді түзе!
                                                                        М. Әуезов
Отбасында өзара сүйіспеншілік болғанда ғана жанұялық тұрмыс зор бақытқа кенеле алады.              
                                                             Н.К.Крупская
 Отбасы – адам өмірінің тамаша жақтары жүзеге асатын, адамның ең басты шаттығы болып саналатын балалардың өсіп, өмір сүретін орны.
                                                                     А.М.Макаренко
 Отан отбасынан басталады.
                                                                      В.А Сухомлинский
Адам өміріндегі ең үлкен қуаныш – бала сүю
                                                                     Б.Момышұлы

5.Тыныштық сәті.
Оқушылар толық тыныштықта отырады. Музыка тыңдау барысында оқушылар «адам және отбасы» туралы ойланып, шығармашылық жұмысқа дайындалады.

        6.Тапсырма
«Жеті атамызды білеміз бе?» тақырыбына генеалогиялық тізбе жаса. Өздеріңнің ата-әжелеріңіз туралы шағын әңгіме жаз.

      Тренинг.
«Қол шапалақтары»
Нұсқау:
Қатысушылар шеңбер құрып тұрады. Шеңбер ортасына өз қалауы бойынша бір қатысушы шығады. Қатысушы шеңбер ортасына орналасқан соң, қалған қатысушылар оған қол шапалақтайды. Қол шапалақтау ұзақтығы ортада тұрған қатысушының қалауына байланысты. Ортадағы қатысушы топқа рақымын білдіріп (“рахметін” айтып) болған соң, шеңберге қайтып келеді. Осыдан кейін келесі қатысушы шығады.
Мәлімдеме:
Қол шапалақ иесін бағалаған кезде, біреулеріне ол қатты ұнайды, келесілерін ұялтады, кейбіреулері бұған шексіз рақымын білдіреді, ал кейде топ ұзақ уақыт шапалақтап, қатысушыны жібермейді.
Бұл жаттығу қатысушылардың көңіл – күйін қуаныш деңгейіне көтеріп, сабақты жақсы  эмоционалды деңгейде аяқтайды.

7.Дәйексөз
Отбасының өнегесі – Отан өнегесі.
                                                                    Б.Момышұлы
  8.Түйіндеу
Отбасында әуелі сенім мен сезім, сүйіспеншілік пен сыйластық болса, олардың жарастығы жарасып, қандай жағдайда болсын, өмірдің ащысы мен тұщысын, суығы мен ыстығын, қайғысы мен қуанышын бірге бөлісіп, жеңіп, бақытқа жете алады.
«Ана алдында – құрмет
Ата алдында – қызмет»
«Сыйлап үлкен кісіні, аялаған кішіні» деген нақыл сөздерді әрдайым есімізде сақтағанымыз жөн.
Жүректен – жүрекке
Оқушылар шеңбер құрып, бір – біріне өздерінің отбасындағы орындарына байланысты жақсы сөздер, тілектер айтады.