Өзiн-өзi тану сабағының жоспары.
Мектеп: №3 Красный Яр көпсалалы орта мектеп-гимназиясы
Мерзiм: 11.02.20017 № 21
Тақырып: Еңбек- бәрін жеңбек.
Құндылық: Дұрыс әрекет. Қасиеттер: Еңбекқорлық, тәртіптілік, мінез-құлық мәдениеті
Мұғалiм: Саденова С.Б. Cынып: 2 Б Оқушылар саны:18
Сабақ мақсаты: Еңбек етуге үйрете отырып, дұрыс әрекет құндылығының мағынасын ашу.
Сабақтың міндеттері:
1. Білімділік: Еңбекқор болуға үйрету.
2.Дамытушылық:Мінез-құлық мәдениетін дамыту.
3. Тәрбиелік: Тәртіптілікке тәрбиелеу.
Ресурстар: (құралдар, мәлiметтер)
Сабақ барысы:
Ұйымдастыру кезеңi. «5 Т» ережесін естен шығармау. Оқушылармен қайталап айтып шығу. Тәртіп. Талап. Тыныштық.Тазалық. Татулық.
Тыныштық сәтi. №1 «Нұрға бөлену»
Ыңғайланып отырыңыздар, денелеріңізді түзу ұстаңыздар. Аяқ-қолыңызды айқастырмаңыз, қолыңызды тізеге немесе үстел үстіне қоюға болады. Көздеріңізді жұмуларыңызды өтінемін.
Елестетіп көріңіз: Күн нұры сіздің төбеңізден өтіп, кеудеңізге қарай бойлап барады. Кеудеңіздің орта тұсында гүл түйнегі орналасқан. Гүлдің түйнегі нұрдан баяу ашылып келеді. Балғын таза, әсем гүл сіздің әр ойыңызды, әр сезіміңізді, эмоцияңызды тілек қалауыңызды шайып, жүрегіңіздің қауызын ашты. Нұр сәулесі сіздің бойыңызға ақырын тарай бастағанын елестетіңіз. Ол біртіндеп күшейе түсуде. Оймен осы нұрды қолдарыңызға түсіріңіз. Сіздің қолдарыңыз нұрға бөленіп, сәуле шашуда. Қолымыз тек жақсы, тек ізгі істерді істейді және баршаға көмектеседі. Нұр аяқтарыңызға тарады. Аяқтарыңыз нұр сәулесін шашуда. Олар сізді тек жақсылық жасау үшін жақсы жерлерге апарады. Олар нұр мен махаббат құралына айналды.
Одан әрі нұр сіздің аузыңызға, тіліңізге тарады. Тіліңіз тек шындықты және жақсы, ізгі сөздер ғана айтады. Нұрды құлақтарыңызға бағыттаңыз, құлақтарыңыз тек жақсы сөз бен әсем әуенді ғана естиді. Нұр көзімізге де жетті. Көзіміз тек жақсыға қарап, бәрінен жақсылықты ғана көреді. Сіздің басыңыз түгелдей нұрға бөленіп, басыңызға тек ізгі, сәулелі ойлар келеді. Нұр бірте-бірте қарқындап шұғылана бастайды, сіздің денеңізден шығып, жан жағыңызға сәуле шашады. Осы нұрды туысқандарыңызға, мұғалімдеріңізге, достарыңызға, танысқандарыңызға бағыттаңыз. Нұрды уақытша түсініспей, ренжісіп жүрген адамдарға да бағыттаңыз. Олардың да жүрегі нұрға толсын.
Осы нұр бүкіл әлемге: барлық адамдарға, жан-жануарларға, өсімдіктерге, тірі жандарға таралсын. Ғаламның барлық түпкір-түпкіріне нұр бағыттаңыз.
Ойша айтыңыз: «Мен нұрлымын. Нұр менің ішімде. Мен Нұрмын».
Осындай Нұр. Махаббат, және Тыныштық күйінде отыра тұрыңыз.
Енді осы Нұрды жүрегіңізге орналыстырыңыз. Нұрға толы бүкіл әлем сіздің жүрегіңізде. Оны осындай әсем қалыпта сақтаңыз.
Жаймен көзімізді ашуға болады.
Рахмет!
Үй тапсырмасын тексеру. «Құс ұясын бұзбайық» Ө.Тұрманжанов өлең жолдарын түсініп оқып келу. Еңбек туралы мақал-мәтелдер жаттау.
-Құс балапаны мен адамдар арасында қандай ұқсастық бар?
-Құс өз балапанын қалай мәпелейді?
-Адамдар құстарға қандай қамқорлық жасай алады?
Сабақ барысын талқылау:
4 мин.
Оқушылардың көңіл күйін көтеру мақсатында тыныштық сәтін өткізу.
5 мин.
Дәйексөз. «Еңбек - қуаныш, жалқаулық - айырылмас азап» Абай.
Дәйексөздің мағынасын қалай түсінесіңдер?
/оқушылар жауаптары тыңдалады, өзім толықтырып айтамын /
/ Адам ең бастысы еңбектенуге, яғни бір іске күш-қуатын, ақыл – ойын жұмсауға ерінбеуі керек. Өйткені жалқаулық, еріншектік адамның өзін және өмірін тоздырады. Ал ерінбей еңбек етсең мақсатыңа, арманыңа жетесің. Арманың орындалса өзіңді бақытты санайсың/.
Дәйексөзді дәптерге жазып алуларын ұсынамын, Ұлдар бір рет,қыздар бір рет айтқызып, хормен қайталау
7 мин
Әңгiмелеу (сұхбат). «Еңбексіз өмір- сүрсеңіз»
(Мысал әңгіме. Б.Әділов).
Мысал әңгімені мұғалім оқып береді.
Қара пышақ дүкеннен шығып, ас үйге келген соң тыным таппады. Нан турады, пияз аршыды, әйтеуір тамақ дайындалып, ас қамдалса, қолдан түспейтін болды. Ол жалқау еді. Бала кезіндегі «шалқайып жатсам» деген арманы есіне түсіп, жылап та алатын.
Бір күні Қара пышақ ауыр еңбектен құтылудың оңай жолын тапты. Иесінің көзін ала беріп, еденнің жырығына қойды да кетті. «Болды, - деді ол қуанып. - Енді еңбекті желкемнің шүкіры көрсін!.
Ай өтті, жыл өтті. Қара пышақ орнынан қозғалған жоқ. Оның қайда жатқанын ешкім білмейтін еді.
Бір күні:
Әй, туысқан, - деген дауысқа елең етіп қараса, еденнің жарығынан жылтылдаған көз сығалап қарап тұр екен. Бірден таныды, баяғы өзімен бірге жасалған Сары пышақ. Өзі ете көңілді, жүзі жарқ-жұрқ етеді. Сұлуланып кетіпті.
-Төмен секір, - деді Қара пышақ. - бірге жатайык. Бізді ешкім білмейді.
-Ол жерде не бар?
-Жатамыз, ұйықтаймыз, демаламыз. Ой, қандай рақат!
-Ал жұмысты кім істейді?
-Жұмыс бізсіз де істеледі.
-Рақмет! - деді Сары пышақ. - Еңбектен қашқанша, тер төгіп өлгенім артық. Еңбексіз өмір - сүрсеңіз. Өзің-ақ жата бер, рақатына бата бер.
Қара пышақ орнынан тұрайын деп еді, тұра алмады. Өне бойын тот басқан. Барлық жері сынып бара жатқандай сезінді.
1. Мысал әңгімедегі Қара пышақ қандай адамға ұқсайды?
2. Сары пышақтың қандай ісі сендерге ұнады?
3. Еңбек адамға не үшін қажет деп ойлайсыңдар?
4. Осы әңгіме неге тәрбиелейді ?
5. Өздерің еңбектің қай түрлерімен айналысқанды ұнатасыңдар?
Слайд арқылы түсіндіру.
Суреттер.
10 мин
Шығармашылық жұмыс, топтық жұмыс.
1-топқа: мәтіндегі қара пышақпен сары пышақты салыстыру
2-топқа: еңбек жайлы мақал- мәтелдерді теріп алу.
3- топқа : сурет бойынша әңгіме құрастыру.
4-топқа. «Қайдан келдің, бауырсақ?» сахналау.
Қағаз, сурет, мақал-мәтелдер жазылған карточкалар.
15 мин.
Топпен ән айту.
«Бала тілегі »
сөзі : С Молдасанұлы әні : Ф Жолдасова
Бал-балалық,балдырған шақ сан арман,
Барлық бала армандауға жаралған
Кел достарым, әндетіңдер, билеңдер, 2 рет
Гүлденсін деп атмекен, қара орман.
Болашақтың иесіміз бәріміз,
Туған жердің түрлендірер нәріміз.
Алтын бесік-ұлан байтақ елімде, 2 рет
Жарқын болсын шырқап айтар әніміз.
Қалықтаған көгершіні көгінде,
Мұңаймасын ешбір бала елімде.
Ата берген батаменен көркейсін, 2 рет
Ұлы Отаным,тілегім сол менің де.
Тақтада жазулы слайд, әуен.
2 мин.
Үй тапсырмасы. «Еңбек-бақыт бастауы» тақырыбында әңгіме жазу.
Күнделікке жазу. 1 мин
Соңғы тыныштық сәтi.
Балалар, енді көзімізді жұмып осы сабақта айтылған ойлар мен істерді ой елегінен өткізіп көрейікші. Барлық айтылған жақсы ойларды жүрегіміздің түкпіріне апарып орналастырайық. Әрбір атқарған істеріңде, достарыңмен, жақындарыңмен жасаған қарым -қатынастарыңда кешірімді, кішіпейіл болып, айналаларыңа нұр шашып, өз орталарыңа жақсылық жасап жүрген қуанышты сәттеріңді көз алдарыңа елестетіп көріңдер.
Музыка тыңдау.
1 мин.
