Көмекші мектепте түзете- дамыта оқыту жұмыстарының ерекшеліктері.

Зерде бұзылыстары бар балаларға арналған

облыстық арнайы мектеп- интернаты. 

Батыс Қазақстан облысы

Орал қаласы

Ф.Б.Жалетденова- логопед- мұғалім.

Көмекші мектепте  түзете- дамыта  оқыту жұмыстарының ерекшеліктері.

Қазіргі таңда  зерде бұзылыстары бар балаларға   түзетушілік – дамытушылық көмек көрсету мәселесіне қызығушылық артты.  Осы топтағы балалардың  даму мүмкіншіліктері  мен қоғамға бейімдеу мәселесі  өзекті болып, үлкен әлеуметтік маңызға ие болып отыр.   Осы мәселелердің шешімі- арнайы көмекші мектепте  ақыл –ойы кем баланың   өмір сүруге қабілетті, қоғамдық ортаға бейімді дамыған тұлғаны қалыптастыру, ақыл- ойы кем оқушылардың мектептен алған білімдері олардың өмірлік азығы болатындай білім беру, оны өмірге, еңбекке  дайындау, кәсіптік бағдар беру – біздің мектептің  басты міндеті. 

Бүгінгі таңда  біздің мектебімізде ақыл – ой кемістігінің  жеңіл түрі-  І тип және  орташа түрі – ІІ тип бойынша  көмекші мектептерге арналған типтік оқу бағдарламаларымен оқытылады.

Ұжымда өз саласында жан-жақты  тәжірибе жинақтаған мамандар қызмет етуде. Олар арнайы жоғары білімді логопед-дефектолог, психолог мамандар, музыка және компьютерлік сауаттылыққа  үйрету, хореография мамандары, дәрігерлер, мейірбикелер, сол сияқты арнайы қысқа мерзімді даярлау курстарынан өткен мұғалімдер мен  тәрбиешілер. Дефектолог- логопед, психолог мамандар балаларға жеке оқыту бағдарламасымен жұмыс жүргізеді.  Дефектолог  және логопед мамандар  оқушылардың

а) ұсақ және жалпы моторикасын дамыту;

б) сөйлеу және артикуляциялық аппаратын дамыту;

в) есте сақтау, ойлау, зейін  т.б. психикалық процестерін жетілдіру;

 г)  әлеуметтік оңалту және өмірге бейімдеу бағытында жұмыстанады;

Арнайы педагогтар  пән мұғалімдерімен бірге сәйкес жоспар құрады, педагогтармен, ата- аналармен бірлесіп жұмыс жүргізеді.

Түзету- дамыту жұмыстарында коммуникативті, эмоционалды- ерік  саласын дамыту мақсатында мамандар жаңа арттерапия технологияларын қолданады.

Түзету- дамыту сабақтарында құм терапиясы, ойын терапиясы, қуыршақ  терапиясы, бейнелеу терапиясы, гипсотерапия, тестопластика (тұзды қамырмен жұмыс) қолданылып келеді. О ригами,  Сауықтыру мақсатында иппотерапияны  пайдалану қолға алынады. Үйден жеке  оқитын мүмкіндігі шектеулі оқушыларға  жүзу бассейнінде  жүзу сабақтары жүргізіледі.

Зерде бұзылыстары бар  балаларға арналған облыстық арналған мектеп- интернатында коррекциялық бағытта( түзету ) кешенді көмек көрсету бағытында ұйымдастырылған бірден- бір мекеме болып табылады.

Мектеп қалалық, облыстық, аймақтық ПМПК- мен   тығыз байланыста жұмыс жасайды. Мектеп – интернаты жанында оқу- әдістемелік кеңес беру орталығы  облыс көлеміндегі арнайы білім беру  мекемелеріне көмек береді.

Оқыту – түзету процесі, емдік шаралар  қазіргі заманауи  талаптарына  сай жабдықталған бөлмелерде жүзеге асуда.

Көрнекі құралдар мен ойыншық қоры, әдістемелік кітаптар жинағы бар«Сенсорлық» бөлмесі,  «Дельфа» логопедиялық тренажерлармен  жабдықталған бөлмелер бүгінгі таңда игі нәтижесін беруде. Сол сияқты әлеуметтік- тұрмыстық өмірге бейімдеу мақсатында жабдықталған бөлмеде мұғалімдер сабақтарын өткізеді.Жылдық жоспар бойынша өтетін ашық тәрбие сағаттары, ашық сабақтар, әдістемелік семинарлар т.б. шаралар өз ара тәжірибе алмасуға, жинақтауға, коррекциялық мақсаттарды жетілдіруге мүмкіндік береді. Жыл сайын мектебімізде түзету мекемелері педагогтарына  «Ашық есік» күні, облыстық семинарлар өткізіледі.