І. Ұйымдастыру: Оқушылармен амандасу, назарын сабаққа аудару.
ІІ. Үй тапсырмасын тексеру:
Үй тапсырмасын сұрақ-жауап арқылы тексеру.
Бүгінгі сабағымызда біз көптеген өнерін өрлеткен топтар жайлы ой қозғаймыз, ал өткен сабақта оқығанымызды, барлығымыз есімізге түсіріп, сұрақтарға жауап беру арқылы білген түйгенімізді ортаға салып айтамыз.
ІІІ.Ой қозғау
Балалар, екі адамнан құралған орындаушыларды қалай атаймыз? (дуэт)
- Үш адамнан құралған орындаушыларды қалай атаймыз? (трио)
- Төрт адамнан құралған орындаушыларды қалай атаймыз? (квартет)
- Бес адамнан құралған орындаушыларды қалай атаймыз? (квинтет)
- Алты адамнан құралған орындаушыларды қалай атаймыз? (секстет)
- Жеті адамнан құралған орындаушыларды қалай атаймыз? (септет)
Үй жұмысын тексеруге арналған сұрақтар:
Ансамбль қандай шығармаларды орындады? (көне классикалық шығармалардан бастап, жаңа заман туындыларын орындап келеді )
«Камералық музыка» нені білдіреді? («бөлме музыкасы» дегенді білдіреді)
«Камералық музыка» дегеніміз не? (екі немесе одан да көп музыканттар орындайтын аспаптық және вокалдық музыка болып табылады)
«Камерата» - итальяның қандай сөзінен шыққан, және нені білдіреді? («camera» деген сөзінен шыққан яғни «бөлме» немесе «палата» деген ұғымды білдіреді)
Гаухар Мырзабекова құрған ансамбль қалай аталды? («Қазақстан камератасы»)
«Қазақстан камератасы» ансамбілі қашан құрылды? (1997 жылы құрылған)
Ансамбльдің құрамында кімдер болды? (консерваторияның ең мықты деген 16 түлегі болды)
- Ал енді, сіздер таңдаған қиындылар арқылы 4 топқа бөлініп отырсыздар, таңдаған қиындылардың артында топтың аты берілген, өздеріңіз топ мүшелерімен бірге топ басшысын таңдаңыздар.
- Мен сіздерге үйге эстрадада өнерін өрлеткен вокалдық топтар жайлы қосымша мағлұмат әкелулеріңізді тапсырғанмын. Сіздер үйден әкелінген мағлұматтарды пайдалана отырып, келесі тапсырманы топпен бірігіп жасайсыздар.
IV.Тапсырма
- Әр топтың алдына қағаз қойылған. Топ мүшелері біріге отырып, қиындының артында шыққан топқа постер жасайды. Ол постерді жасауға 7 минут беріледі. Постер дайын болған уақытта, топ мүшелері бір мезетте шапалақ арқылы, болғандары жайлы белгі береді. Постерді қорғау үшін топтан 2 бала шығып, түйіндерін қорғайды.
V. Сергіту сәті: Қысқа қайырымды әуенімен қимылымен орындау. (видео)
VI. Барлығымыз бірге дауыс жаттығуын жасайық
Дауыс жаттығуларын сурет арқылы айдаһарды бейнелеп көрсету қолымен.
УОАЭЫ – форте
ЫЭАОУ – форте
УОАЭЫ – пиано
ЫЭАОУ – пиано
Ноталардың қысқаша қайырымдарын орындау.
До нотасына қысқаша қайырым:
Мен отырмын бақылап,
Бірінші сызық жақын-ақ!
До нотасы болған соң,
Көтерілем сатылап.
Ре нотасына қысқаша қайырым:
Мен ре, ре мін, ре мін,
Ре ретінде білемін,
Бірінші сызық астында ,
Қатарласып келемін.
Ми нотасына қысқаша қайырым:
Бірінші сызық үстіне,
Шығып алдым, күш міне!
Ми нотасы боламын,
Естеріңе түсті ме?
Фа нотасына қысқаша қайырым:
Мен фа, фа нота болғасын,
Екі сызықтың ортасын,
Иеленіп жатырмын,
Меншігімді қорғасып.
Соль нотасына қысқаша қайырым:
Соль мін, соль мін, тұз деме,
Төменнен де іздеме,
Екінші сызық үстінде,
Тұрмын түспей, түс десе.
Ля нотасына қысқаша қайырым:
Мен ля, ля, ля биікпін, биікпін,
Көңілдімін сүйіктім, сүйіктім!
Аяғым екінші сызықта,
Төбем үшке тиіп тұр, тиіп тұр.
Си нотасына қысқаша қайырым:
Си нота деп аталдым,
Рас, біраз мен қиналдым,
Үш сызыққа шыққанда,
Қасыма бәрің жиналдың.
До нотасына қысқаша қайырым:
До нотаның інісімін,
Танысайық бауырлар,
Барлығыңа сәлем беріп,
Мен түсемін сатылап.
VII.Кезекті әнге беру
«Музарт» тобының орындауындауындағы ән «Қазақ елі»
Қазақ елі
Сөзін жазған: Несіпбек Айтов
Әнін жазған: Ж.Дәулет
VIII.Қорытындылау
Кубизм стратегиясы:
- Ал енді, оқушылар мен қазір әр топтың қасына барып мына қолымдағы кубикті айналдырамын. Бұл жай ғана кубик емес, бұның сыртында сұрақтар жабыстырылған, қай топқа қандай сұрақ келсе, сол топ сол сұраққа 1 минуттан кейін жауап береді.
Кубиктегі сұрақтар:
Эстрадалық вокалды аспаптар ансамблін ата.(Досмұқасан тобы)
Өмірде қай топ қарапайым қазақ екендерін дәлелдей білді? (Жігіттер квартеті)
Нұрмұқасан тобының «Қос қарлығаш» атты бейнеклипі қай қалада және қай студияда түсірілген? (Шымкент қаласы, «Жебе» мультипликация студиясында түсірілген)
Музарт тобының алғашқы орындаған әні?(М.Мақатаевтың сөзіне жазылған Қанат Ибраимовтың «Сенің көзің» атты шығармасы)
Досмұқасан тобының музыкалық аспаптар сүйемелдеуімен орындалатын қазақтың халық әндерін ата. («Назқоңыр», «Ахау бикем», «Он алты қыз», «Құдаша», «Ауылың сенің іргелі» т.б)
Музарт тобының «Өз елім» атты жеке концерті қай жылы, қай күні өтті? (2003 жылы 16-17 желтоқсан)
IX.Оқушыларды мадақтау
- Барлығың да сабаққа өте жақсы қатыстыңдар! Жарайсыңдар балалар! Өнерлі өрге жүзеді!
X.Үйге тапсырма
«Өнерін өрлеткен топ» атты тақырыпқа эссе жазу;
XI. Оқушыларды бағалау
Қойылған сұрақтарға жауап берген балаға, нота беріледі.
