"Адамның жан сұлулығы"

Мақсаты: оқушылардың адам жанының сұлулығы туралы түсініктерін кеңейту.

Міндеттері:

• Адамның «жан сұлулығы» ұғымының мәнін ашу;

• Адам жанының сұлулығын көрсететін жақсы қасиеттерін дамыту;

• Жан сұлулығына жеткізетін ізгі істерге тәрбиелеу;

Ресурстар:

( материалдар, дереккөздер)

Интерактивті тақта, слайд , дәйексөз, жазушыларымыздың ой пікірлері, мақал - мәтелдер жазылған плакаттар

Сабақтың барысы:

1.Ұйымдастыру кезеңі. Жағымды көңіл күй. Тыныштық сәті. «Нұрға бөлену»

2.Үй тапсырмасын тексеру. Оқулықтағы 17 беттегі

А.Л. Бжисканың «Сұлулық сыры» мәтінінен не түсінгендерін сұрап, сұрақтар беру арқылы қорытындылау.

1. Бейбіт Мақсұт ағайының берген ақылынан қандай ой түйді?

2. Адам өмірде өзін – өзі қалай бағалауы керек?

3. сендердің өздеріңе көңілдерің толмаған немесе өз істеріңе риза болмаған кездерің болды ма? Неге?

Оқушылардың ойын толықтыру мақсатында: осы сыныптағы балалардың жас ерекшеліктеріне сай «менің бойым қысқа», «мен өте толықпын», «көзім кішкентай», «шашым жұмсақ» т.б өздеріне, өздерінің дене бітіміне көңіл толмайтын жағдайлар жиі кездеседі. Осы жерде мен әр адамның өзіне тән ерекшелігі болатынын және адам осы ешкімге ұқсамайтын жеке тұлға ретінде бағалы екенін түсіндіріп өтемін.

Ескертулер

3.Сабақтың дәйексөзі.

Сыртқы сұлулық толық болуы үшін ішкі сұлулықпен жандануы керек.

В. Гюго.

Оқушыларға сұрақ: нақыл сөздің мағынасын қалай түсінесіңдер?

Адам сыртқы сұлулығы толық болуы үшін адалдық, мейірімділік, сезімталдық, сыйластық, сияқты адамгершілік қасиеттерден бастау алатынын түсіндіремін.

4.Оқиға айту. ( Мұғалім сыйы)

«Ішкі сұлулық пен сыртқы сұлулық» ( әңгіме)

Баяғы өткен заманда бір патша базардан екі құл сатып алыпты. Құлдарының бірі сиықсыз, тістері шірік әрі аузы сасық екен, ал екіншсі болса келбетті, маржандай тістері бар әрі аузынан хош иіс шыққан жағымды адам екен. Патша келбетті құлын сыйға бөлеп, моншаға жібереді. Аузы сасыған екінші құлды қасына шақырып: – Сені ұнатып-ақ едім, бірақ ана моншаға кеткен досың сен туралы көп жаман нәрселер айтты. Сен де қаласаң маған оның жаман тұстарын айтып бер, -дейді. Құл болса жолдасына шаң жуытпай, ол туралы еш жаман сөз айтпады. Патша қалай тырысса да, мақтаудан басқа ештеңе айтқыза алмапты.

Екінші құлы моншадан қайтып келгенде, патша оны да сынамақ болып қасына шақыртты. Біраз мақтау сөз айтқан соң: -Ана досың айтып берген жаман мінездерің болмаса, жап-жақсы жігітсің,- депті. Сөйтсе әлгі ашуланып, жолдасы туралы қайдағы жоқты айтып, жамандай бастайды. Патша біраз тыңдаған соң: -Доғар сөзді, кімнің кім екенін енді білдім. Сен жамандаған жолдасыңның аузы сасыса, сенің ішің сасыған, шірік екенсің. Бар, сол жамандаған досыңның қол астында жұмыс істейтін боласың, – депті.

5.Шығармашылық жұмыс. Топтық. «Сахналау» айдарымен берілген «Жан сұлулығы» диалогті сахналау ұсынылады.

6.Топпен ән айту. «Бәрінен де сен сұлу»

Сөзі: Мағжан Жұмабаевтікі

Әні: Шәмші Қалдаяқовтікі

Жаз күніндей жайнаған

Масатыдай жер сұлу.

Аққу, қаздар тойлаған

Айдын шалқар көл сұлу.

Қайырмасы:

Өзгеден де ең сұлу,

Өмірлік дос тең сұлу.

Өзім сүйіп ұнатқан,

Бәрінен де сен сұлу.

Нұрын төккен қырмызы

Аспандағы күн сұлу.

Жымың қаққан жұлдызы

Айлы кеште түн сұлу.

Қайырмасы:

Тәрбиелі тамаша,

Бал мінезді жар сұлу.

Таңданарлық қараса,

Талай абзал бар сұлу.

7. Үй тапсырмасы. Жан туралы дәптерде берілген 1,2,3 – тапсырмаларды түсіндіріп, үй жұмысы ретінде орындап келу, оқулықтағы 22 беттегі «Қуаныш» мәтінін оқып келу,сұрақтарға дайындалып келу тапсырмасы беріледі.

8.Сабақтың қорытынды сәті. Оқушылардың сабақтан алған білімдерін қорытындылап, бір – біріне жақсы тілектер айтқызып, сабақты аяқтаймын.