Занятие по развитию речи

Сабақтың тақырыбы: Мақта қыз бен мысық  ертегісі

Пән: тіл дамыту.
Мақсаты: 
а)білімділік: балаларға ертегіні түсіндіріп айта отырып, негізгі ойды, идеяны ұғындыру. Қоршаған орта жайлы білімдерін кеңейту. 
Ойлау,есте сақтау, еске түсіру қабілеттерін қалыптастыру. Топпен жұмыс жасай білуге, өзіндік жұмыс істеуге, ойлауға үйрету. 
ә)тәрбиелік: Экологиялық тәрбие беру, адамдардың жануарларға көрсететін көмегін айта отырып, балаларды қайырымдылыққа баулу. 
Адам бойына жат қасиет тілазарлықтан аулақ болып, кешірімді болуға тәрбиелеу. 
б)дамытушылық: Сын тұрғысынан ойлауын, сөздік қорларын, тіл байлығын, шығармашылық қабілеттерін дамыту . Ауызекі сөйлеу тілін дамыту. 

Сабақтың түрі: ойын, аралас сабақ

Сабақтың типі: жаңа сабақты игеру.

Сабақтың әдісі: ойын, түсіндіру, баяндау, сұрақ-жауап, талдау, жинақтау, ой туғызу, хабарлау.

Пәнаралық байланыс: сауат ашу, көркем әдебиет, қоршаған ортамен таныстыру.

Көрнекілік: интерактивтік тақта, ертегі кейіпкерлерінің суреті, мақта қыз бен мысық ертегісі бойынша презентация, үлестірмелі карточкалар,әрбір балаға 5 қызыл түсті, 5 көк түсті картоннан кесілген карточкалар, картоннан кесілген жапырақтар (буындар жазылған), 12 дана А-4 қағазда жазылған сөздер (мақта,сағыз, мысық, ағаш,сиыр,тауық), әрбір балаға ертегінің мазмұны бойынша мысықтың жолы салынған сызба.

Күтілетін нәтиже:

Пәндік:

• Жаңа сабақ материалын толық меңгереді.

• Ертегі мазмұнын біледі.

• Ертегінің тақырыбы мен идеясын анықтайды.

• Кейіпкерлерді жағымды және жағымсыз қасиеттері бойынша бөле біледі.

• Кейіпкерлердің іс-әрекетіне баға бере алады.

Тұлғалық:

• ауызекі сөйлеу дағдысын меңгереді, жеке жұмыс істеп үйренеді.

• сабаққа деген ынтасы, қызығушылығы артады.

• танымдық әрекеті, ойлау белсенділігі, тапқырлығы дамиды.

• тілазарлық-жат қасиет екенін түсініп, адамгершілік қасиеттерді игереді

Сабақ уақыты: 30 минут

Сабақты өткізу жоспары

Сабақтың барысы:

Педагог: Қайырлы тан, балалар! бәріміз ортаға шығып шаттық шеңберін құрайық.  Шеңберде тұрып өлең жолдарын қимылмен көрсету.
Қуанамын мен де,

Қуанасын сен де.

Қуанайық достарым

Арайлап атқан күнге!

(балалардың көңіл –күйін сұрау, әңгімеге тарту)

Педагог: Ал, енді орнымызға жайғасайық. Балалар, сендер ертегілерді жақсы көресіңдер ме ?.(балалардың жауабы). Олай болса, біз бүгін ертегілер әлеміне саяхатқа шығамыз. Алдымен өзіміз білетін ертегілерді есімізге түсіріп, қысқаша не туралы екенін айтып шығайық. (балалардың жауабы).

- Ал бүгін біз мақтақыз бен мысық ертегісімен танысамыз.
(Ертегі желісін интерактивті тақта арқылы көрсетіп, түсіндіру) 
Сұрақ- жауап. 
Мақтақыз үй жинап жүріп не тауып алды? 
Мысықты неге шақырды? 
Мысық келді ме? 
Мақтақыз сосын мейізді не істеді? 
Мысық оның қатығын неге төкті? 
Сөздік жұмыс жүргізу. Қатық дегеніміз не? Ол ұйытылған сүт. Сүттің жылы кезінде үстіне кішкене айран құйып бетін жауып қойсақ, ол сәлден соң ұйып қатық болады, сонымен қатық дегеніміз ұйыған сүт.

Ашуланған қыз мысыққа не істеді? 
Құйрығынан айрылған мысық қандай күйге түсті? 
Мақта қыз оған қандай тапсырма берді? 
Тапсырманы орындау үшін мысық қайда келді? 

Педагог: Балалар сендер мысыққа тапсырмаларды орындап, құйрығын қайтып алуға көмектесесіңдер ме?
Педагог: Олай болса енді назарымызды тақтаға аударайық (тақта ертегі сюжеті бойынша безендірілген)

Педагог:  Балалар, мақта қыз мысыққа қандай тапсырма берді? Қатық істеу үшін бізге не керек? Мысық қайда барады?

Мысық: (педагог мысықтың суретін сиырдың суретінің жанына іліп)

Сиыр, сиыр сен маған сүт берші, мен оны Мақта қызға апарып беремін. 
Сиыр: саған сүт керек болса менің тапсырмаларымды орында. 
Мысық: Жарайды, бірақ маған кім көмектеседі екен? Балалардан көмек сұрау. 
Бірінші тапсырма: Қандай үй жануарларын білесіңдер? Үй жануарларының қандай пайдасы бар? Балалардың жауабы.

Балаларға тапсырма тарату «Үй жануарларының төлдерін табуға көмектес» (№1 қосымша)
Сиыр: Балалар, сендер бәрін дұрыс айттыңдар, мысық енді екінші тапсырмамды орындап көр? Маған жапырақ әкеліп берсен, сосын мен саған сүт берем. 
Педагог: мысық жапырақ алу үшін қайда келді?
Балалардың жауабы. (талға келді) 
Мысық: Тал, тал сен маған жапырақ берші, мен оны сиырға апарып беремін. 
Тал: Егер саған жапырақ керек болса менің тапсырмаларымды орында. 
Мысық: Жарайды, балалардың көмегімен тапсырмаларды тез орындап беремін.

Тал:Бірінші тапсырма: мына жапырақтардың сыртына жазылған буындарды оқи аласыңдар ма?. (№2 қосымша)

Тал: Керемет! Балалар сендер буындарды оқып қана қоймай, олардан сөз де құрастырдыңдар. Енді мысық екінші тапсырманы тыңда. Мен қатты шөлдеп тұрмын. Маған су әкеліп бер, сосын саған жапырақ беремін.
Сұрақ -жауап. Мысық су іздеп бара жатып кімдерді көрді? 
Балалардың жауабы: Қыздарға кездесті.
Мысық: Қыздар, қыздар сендер маған су беріңдерші, мен оны талға апарып беремін. 
Қыздар: Егер саған су керек болса біздің тапсырмаларымызды орында. 
Мысық: Жарайды, бірақ маған кім көмектеседі екен?Балардан көмек сұрау. 
Қыздар: Бірінші тапсырманы тыңда. Сендер дыбыстар туралы не білесіңдер? Сөздерге дыбыстық талдау жасай аласыңдар ма?(балаларға сөз жазылған қағаздар, қызыл және көк түсті картоннан қиылған карточкалар таратылады)

№3 қосымша

Қыздар: Өте жақсы балалар, мысық енді екінші тапсырманы орындап көр. Бізге сағыз әкеліп берсең, су береміз.

Мысық сағыз іздеп қайда барды? 
Балалардың жауабы: Дүкеншіге келді. 
Мысық: Дүкенші, дүкенші маған көмектесіңізші , маған сағыз керек мен оны қыздарға беремін. 
Дүкенші: Егер саған сағыз керек болса менің тапсырмаларымды орында. 
Мысық: Жарайды, менің кішкентай көмекшілерім бар, солармен бірге орындаймын.
Дүкенші: Бірінші тапсырма: өлең немесе тақпақ білесіндер ме?

Сергіту сәті. ( ортаға шығып қимылмен көрсетіп орындау)

Бала –бала балақан,

Кәне жайшы алақан.

Саусақтарын әйба,

Былай- былай ойнат.

Топ – топ басайық,

Жалаудан күн жасайық.

Жаса – жаса алтын күн!

Жаса, жаса жарқын күн

Дүкенші: Қандай керемет! Енді екінші тапсырманы тыңда. Менен сағыз алғың келсе, орнына сатуға жұмыртқа әкеліп бер, сонан соң мен саған сағыз беремін. 
Педагог: Мысық жұмыртқа іздеп қайда барды? 
Балалардың жауабы. Тауыққа келеді. 
Мысық: Тауық, тауық маған көмектесші, маған сенің жұмыртқаң керек мен оны дүкеншіге беремін. 
Тауық: Егер саған жұмыртқа керек болса менің тапсырмаларымды орында. 
Мысық: Жарайды, маған балалар көмектеседі. 
1-тапсырма: Үй құстарын ата, олардың қандай пайдасы бар? 
Балалардың жауаптары: Бізге жұмыртқа, ет береді, жүнін жастықтың, киімнің ішіне саламыз және т.б.
2- тапсырма: Менің қарным ашып тұр маған тары әкеліп берші, сосын саған жұмыртқа беремін. 
Мысық тары табу үшін не істеу керектігін ойланды, ал оның ойына не түсті? 
Балалардың жауабы. Тышқанға келеді. 
Мысық: (ініне қарай жүгіріп бара жатқан тышқанды көріп) тоқта, тоқта тышқан сені көргенім қандай жақсы болды. Сен маған тары тауып берсең, мен сені жемеймін. 
Тышқан: Жарайды ендеше менің інімде бір табақ тары бар еді соны берейін. 
Қуанған мысық тарыны неге береді.

Сұрақ –жауап.

Балалар ертегіні презентация арқылы әрі қарай жалғастырады.

Сабақты қортындылау.Балалар қағаз бетіне салынған ертегінің суреттері бойынша мысықтың жолын белгілеп, суреттерді бояйды.

Балаларды мадақтау. Үйде ұнаған кейіпкердің суретін салып келу.