Тестовые задания по теме "Деепричастие"

Сергеева Л.А. 7 класс. Марий йылме. Тест –влак

                                         Деепричастий

1-ше тест

1. Могай ойлымаш ужашым деепричастий манына?

1. Глаголын посна формыжо. Тудо предметын действийже гыч лийше палым ончыкта.

2. Глаголын посна формыжо, тудо ешартыш действийын кузе але кунам лиймыжым ончыкта, полшышо глагол пелен тÿҥ действийым каласен пуа.

3. Предметын палыжым (могай улмыжым) ончыктышо ойлымаш ужаш.

4. Глаголын, пале мутын, вес наречийын признакыштым ончыктышо ойлымаш ужаш.

2. Деепричастий могай ойлымаш ужаш гыч ышталтеш?

1. Тÿрлӧ ойлымаш ужаш гыч ышталтше шомак.

2. Глаголын формыжо: тудо эртак глагол гыч веле ышталтеш.

3. Пале мут гыч кум йӧн дене ышталтыт: суффикс полшымо дене, мут ушалтме дене, мут мужыралтме дене.

4. Тÿрлӧ ойлымаш ужашан мут сочетаний дене.

3. Пуымо примерлаште деепричастийым ыштыше суффикслам муза.

1. Кенета, ушыжо пурен, тудо тайнышт-тайнышт кынел шогале. (К.Васин.)

2. Пызле лышташ йоген пытыме гаяк, кичке орлаҥгыже чумыргыл-чумыргыл кеча.

3. Копаж мучко левыше вÿд шарла, шокш кӧргышкыжат пура. (В.Исенеков.)

4. Тудо ялышке таче веле толын.

1) 1,2. 2) 1,3. 3) 2, 4. 4) 3,4.

4. Шуко точко олмеш келшыше суффиксым шындыза.

… суффиксан деепричастий тÿҥ действий деч вара лийше ешартыш действийым ончыкта.

  1) – ен          2) – де             3) – шыла                4) – мешке

5. Шке значенийышт дене деепричастий-влак мом ончыктат?

1. Действийын кунам лиймыжым.

2. Глаголын признакыштым.

3. Вес наречийын признакыштым.

4. Предметын действийже гыч лийше палым.

2-шо тест

1. Жапым ончыктышо деепричастийым ончыктыза.

1.Тышке толшыжла, шольым клубыш пурен.

  2.Рвезе-влак, икте-весыштлан ала-мом йышт ойлен, класс гыч лектыч.

  3. Кугызалан чыла ойлен кошартымекше, Сакарын чонжылан луш чучо.(С.Ч.)

  4. Туге гынат чевер шыже черланышыла ойганен шога.

1)   1,2                     2) 1,3                   3) 1,4                      4) 3,4

2. Деепричастийын числа ден лицажым чын ончыктыза?

Сылне кайык, веселан чогыматен колтен, коя шукшым руалта.

1. множественный числа, 3-шо лица

2. единственный числа,1-ше лица

3. единственный числа, 3-шо лица

4. множественный числа,1-ше лица

3. Деепричастий предложенийыште могай член?

Садерыштем мÿкш-влак мÿйым мурен-мурен погат.

1. умландарыше член                 3) сказуемый

2. дополнений                             4) определений

4. Запятойым чын палемде.

Пӧтыр 1 кагаз-влакым пинчак кÿсенышкыже 2 пыштышыла 3 кок кагазым ÿлык камвозыкта 4 тудым 5 ок шиж.

1. 1, 2, 3. 2) 1, 3, 4. 3) 1, 4, 5. 4) 2, 3, 4.

5.    Чын огыл вашмутым палемде.

Деепричастный оборот запятой дене ойыралтеш:

1. Кунам деепричастный оборот да тудын рашемдыме мут коклаште иктаж вес мут уло гын.

2. Деепричастный оборот сказуемый пеленак шога гын.

3. Кунам деепричастный оборот сказуемый деч вара шога.

4. Кунам деепричастный оборот предложений тÿҥалтыште шога да рашемдыме мут коклаште вес шомак уло.

3-шо тест

1. Чын огыл вашмутым палемде.

Предложенийыште деепричастий лиеш:

  1) сказуемый                       3) умландарыше член

  2) определений                   4) дополнений

1) 1, 2                 2) 2, 4   3) 1, 3                 4) 1, 4

2. Кузе лиймым ончыктышо деепричастийын суффиксшым ончыкто:

1. – ын            2.– де             3. – ен (-эн)             4. – мешке

1) 1, 3, 4. 2) 2, 3, 4. 3) 1, 2, 3. 4) 1, 2, 4.

3. Келшыше суффиксым палемдыза.

- шыла

1. суффиксан деепричастий тÿҥ действий деч ончыч ышталтше ешартыш действийым ончыкта.

2. суффиксан деепричастий тÿҥ действий деч вара лийше ешартыш действийым ончыкта.

3. суффиксан деепричастий тÿҥ действий дене ик жапыште лийше действийым ончыкта.

4. суффиксан деепричастий лийдыме ешартыш действийым каласен пуа.

4. Кузе лиймым ончыктышо деепричастиян предложений-влакым ончыктыза.

1. Йоҥылыш тошкалшыжла, Миша сер гыч шуҥгалте.

2. Школ гыч пӧртылмеке, шольым-влак вÿдым нумалаш тарванышт.

3. Сочиненийым возен пытарыде, тетрадьым пуаш ом шоно.

4. Киндым тӧр пайлен, авана чыланам тӧрыш ÿжӧ.

1. 1, 2                  2) 2, 3                3) 3, 4               4) 1, 4

5. Притяжательный суффикс-влак могай суффиксла почеш возалтыт, чыла числа да лицаште вашлиялт кертыт?

1. – ын.

2. – де.

3. – меке, - мешке.

4. – ыде.