Сын сағатта ерлік көрсеткен азаматтар
2017 жылғы 17 ақпан күні Павлодар – Астана бағытындағы тас жолда жол апаты орын алды. Павлодар қаласына жарысқа бара жатқан баянауылдық 18 оқушы мінген автобусқа еріп келе жатқан полицей машинасы қарсы жолға шығып кеткен «Камаз» машинасының соққысын өздеріне дарытты. Балалардың өмірін қорғап, өздеріне төнген ажалды қаймықпай қарсы алды. Қиын сәтте дұрыс шешім қабылдап, ажалмен бетпе – бет келген баянауылдық полицияның аға сержанттары Мұрат Нұрсейітов пен Баянбек Жүнісов ел алдындағы өз міндеттерін абыроймен атқарды. Балаларға төнген қауіп – қатерге өз бастарын тікті. Сын сағатта ажалға қарсы келген осы асыл азаматтарға балалардың ата – аналары, ұстаздары шексіз ризашылықтарын білдіріп, алғыс айтуда. Ерлік көрсеткен батыр азаматтар «Қаһарман» атағын алуға лайық.
Ауыр жарақат алған Мұрат Нұрсейітов тез жазылып, аман – есен жанұясына қосылуын барлық Баянауыл халқы тілеп отыр. Ажалға көзбе – көз қарсы келіп, көптеген адамның өмірін сақтап қалу екінің бірінің қолынан келе бермейді. Еш ойланбай – ақ, өз өмірлерін бәске тігіп, балалардың амандығын тілеген қазақтың осындай батыр да батыл ер – азаматтары әрқашан аман болсын. Екі азаматқа да Алланың нұры жаусын демекпіз.