Урок на эрзянском языке

МОУ «Александровкань СОШ»

Эрзянь келень ловномань урок

4-це классо

Ютавтызе уроконть: Тарчуткина О.М.

2023 иесь

«Эряк, эряк, монь тиринь келем!» - эрзянь келень ловномань урок 4-це классо.

Уроконть целензэ:

1. Келейгавтомс кель-валонь сюпавчинть эрзянь келенть коряс.

2. Тонавтомс парсте ловномо

3.Явомс мель эсеть перть-пельксэнтень, тиринь ёнксонтень

Оборудованиясь: «Тиринь кель» учебникесь, ракшань маскат

Уроконь молемась:

1. Листь ушов, варштак перть пельга-

Тундо тенек сась!

Чудикерькстнэ мельга мельцек

Леентень сыргасть.

Лейс сяворсь домка менелесь.

Ведесь весе сэнь,

Ашо галакс шожда пелесь

Экшели ведесьсэнть.

Сырнень сеелькс эрькинесэнть

Налкси тундонь чись.

Пандо чирентень эжнеме

Луганарнэ лиссь. А.Эскин «Тундо» ( слайдось 1-це)

- Шумбратадо, эйкакшт! вечкивикс ялгат, инжеть! Эйкакшт! Минек течинь урокось аволь овсе эрьва чинь кондямо, секскак минь эрзянь национальной оршамопелесэтано. Те урокось алтазь чадыковонь 16-це чистэ эрзянь келень покш чинь коряс ды тундонь самонтень. Секскак мон ушодыя уроконть Эскинэнь поэтэнть стихотворениясо. Ловносынек уроконь теманть…( слайдось 2-це)

Минь эрятано Тиринь мода лангсо, кортатано тиринь кельсэ. Минек тиринь келесь- эрзянь. Сонзэ вечксынек сень кис, што эрзякс кортыть аванок-тетянок, кортыть весе минек ёнксонь эрицятне. Эрзянь келесь мазый, теке нармунень моро. Секскак уроконь эпиграфокс минь сайсынек С.М. Люлякинань валтнэнь:

« Эрзянь кель, эрзянь кель-

Ашо килей, чуди лей,

Чольдердиця горнипов,

Гайсэ морыця цеков…» (слайдось 3-це)

2. - Эйкакшт, тыненк кудов ульнесь максозь задания сермадомс течинь урокс тиринь веледе сочинения ды арсемс стихотвореният. Проверясынек кудонь важодеманть.

Кечуткина Настя ловны сочинения «Паракина веледе»

Минек веленть лемезэ саезь кезэрень пингень лемстэ Парай. Сон нейгак вастневи Паракшин фамилиясо. А сыре ломантне ёвтнить: ульнесть кавто брат Алкой ды Паркай, конатне сёвность эсест ютксо. Паркой кадовсь эрямо Паракинас, а Алкой тусь Промзав.

Паракина велесь ашти Штырма лей лангсо. Сонзэ перька касыть эрьва кодат вирть,паксят, конатне максыть ламо лезэ ломантненень.

Кавто тежа иестэ (2000г.) панжовсь церьковась Рождество Христова. Конасонть важоди иероманахось Калинник.

Паракина велестэ лиссть ламо талантливой ломанть. Пек умок ули минек

фольклорной ансамблясь «Парынза», конатне морсить кезэрень морот.

Мон эсь велем пек вечкса сень кис, што чачинь те велесэнть.

Макушкина Анжелика ловны стихотворения, конань арсизе сонсь.

Паракина велем.

Поронь сэрей пандонть алга

Сравтовсь Паракина велесь!

Эмежпиретнень удалга

Жойсэ чуди Штырма леесь!

Велесэнть сэтьме эрямось,

Менелеськак валдо-сэнь.

Эрицятнень чевте оймест,

Лездыть вейке-вейкинень.

Келейде келей паксятне,

Сюронь ялтке сынст лангсо.

Прок, пиже парсейть, лугатне

Тиринь моданть чамасо!

Сюкпря теть, чачома велем,

Эсь элесэть нурсимик….

Кеняркссто пештик седеем,

Паро ломанькс теемик!

Якунин Коля ловны сочинения « Монь велем »

Минек велесь эрзянь и лемезэ Аллу Парынз Веле.

Сон ашти Штырма лей лангсо . Бокаванзо касы вирь .Велень куншкасо кавто лавкат ,икеле ульнесь школа , но ней сонзэ пекстызь. Тосо ней почта, медпункт и велень администратция . Велесэнек колмо ульцят: Набережной , Центральной и Молодёжной .Омбоце ие велезэнек ветясть паро ки, ули газонок. Кизна сакшныть ламо оймсицят.

Бибарсов Олег складясь стихотворения Аловеле ланга

Мон эрян Промза велесэ

Конась ашти лей чиресэ

Маласонок вирь касы

Маней кошт тенек максы

Вадря минек кизна велесь

Пертьпельксэсь пижелды келес

Леенть ванькс пек ведезэ

Калтнэ уйнеть эйсэнзэ

Штырма леенть лемезэ

Вечктяно минь эйсэнзэ

Пек паро минек велесь

Эсенек эрзянь келесь

Вечкеде эсенк веленк

Вечкеде эрзянь келенть

- Сочинениянк ды стихотворениянк пек парт! Мон тынк заданиятнень коряс анокстынь фотографият Паракина ды Аловеле ланга (слайдось 4, 5-це)

3.- Невтсынек седе тов, кодамо сюпав эрзянь келесь .Течинь урокоссто минь карматано аволь ансяк ловномо, но и налксеме, нурька моронь морамо.

4.- Ней невтяно ёвкс «Кие алкуксонь ялгась» С. Люлякинань (слайдось 6-це)

Зярдо лембстэ варштась чись

Пизэстэнзэ Овтось лиссь.

Цють молеви, тоштямгадсь-

Пекезэ пек вачомгадсь

Вансы, Урось вере ярсы:

Пештенть чулгсы, лукшонть ёртсы.

Пшкадсь сон: - Вишкине Урнэ,

Ёрт тень васоньгоморнэ.

Урось яходсь пулосонзо-

Юрк - ды совась ундозонзо.

Овтось допрок абунгадсь,

Укстась, састыне сыргась.

Понгсь Ривеське каршозонзо.

Овтось ёвтась сонензэ:

- Саемак, ёжов, мартот.

Мон а стувтса тонь парот.

- Пейдят лангсон, Овто леляй!

... Теяк юхадсь пулосонзо-

Кадызе Мишань ськамонзо.

Одов тусь вирьганть пиштякась.

Пеедсь лангсонзо сезякась…

Вансы: ашти Нумолнэ,

Сермав, нурька пулыне.

Пурькат каязь икелензэ,

Репст каволи пейнесэнзэ.

- Шумбрат, Нумолнэ?

- Шумбран.

- Мон вана вачо кулан.

- Мекс истя?-

Нумол кевкстизе

Ды сонсь пурькатнень венстинзе:

- Ярсак Миша, иля куло.

- Сюкпря теть, нурькине пуло

5.- Ней ловнотано. Панжсыннек тиринь кель учебникенть стр.175 ловносынек Н. Суняйкинань « Тиринь кель» стихотворениянть.

( Эйкакшонь ловномась. Выводось)

6.- Аламос оймсетяно! Минь кармато налксеме « Верьгизнэсэ». Кунсолынк те налксеманть. (слайдось 7 -це)

Эряви муемс верьгиз , а остаткатне кармить ломанть, конат нуить паксясо. Верьгизэсь мади куракш алов, а ломатне лисить паксяв нуеме. Сынь комить ды кедьсэст аволить-нуить. Пачкодсть верьгизэнть малас, верьгизэсь сти ды карми кунцеме.

Нуицятне пижнить: «Вай, верьгиз!» -ды чиить кудов.

Истя налксить весе ломантнень кунцевемс…

- Но миненек эряви муемс, кие карми верьгизэкс.

Ловомка: Вейке, кавто, колмо, ниле,

Мон сэвинь саразонь пиле.

Кавто, колмо, ниле, ветесь,

Кинень понги псакань пекесь?

7. – Нурька морот моратано! (слайдось 8-це)

Коля: Давай, ялгай, мирятано,

Сёвонь пире пирятано,

Тозонь репст видитяно.

Кона моли саламо,

Сень превензэ аламо.

Кундасынек, чавсынек

Чапанонзо нельксынек.

Настя: Чики-чики, сорока,

Очко пеке онока!

Шукшт-шукшт толганзо.

Карандашка шубазо,

Ленгень локшо кедьсэнзэ,

Кшнань карькске перьканзо,

Сиянь повне песэнзэ…

Олег: Вирь чиресэ кудыне,

Кудынесэ бабине.

Бабась пани пачалксеть,

Ривезь вадни лемсэ,

Овто кишти кемсэ.

Топ-топ кемензэ,

Калдор-калдор шубазо.

Таня: -Тон чеерне-урыне,

Адя пештень кочкамо

-Вай, а молян. а молян,

Вирьсэ эри псакине,

Кундасамам, порьсамам,

Мазы шапкакс тейсамам.

Базар куншкас ливьтсамам,

Калацядо мисамам.

Анжелика: Хоть вишкинян-шишкинян,

Лувужасто чавозян.

Молиндерян мон баняс,

Шлиндерян-париндерян,

Весемеде ашо улян.

Кузиндерян човар лангс

Весемеде покш улян.

8.-Чипаесь чиде-чис эжди яла виевстэ, читне кармить кувалгадомо, телень сундерькстнэ потамо.Чикуншкасто латочиретнестэ ушоды солы ведень кольгема, чопоньбелев сынь кельмить ды теевить эйзюрокс(сосулькакс) нама кода

чарькодиде те ковось лемдяви эйзюрковокс (март).Те ковстонть ютавтовить покшчить ды кенярьксчить конатат алтазь норовжорчонь-нарминень тердемантень ды телень якшамотнень панемантень, эрзятне кемсть , што тундонть кандыть селмост лангсо норовжорчтнэ (слайдось 9-це)

Ноорожорч, ноорожорч!

Морык жойни морынеть,
Тердик Норовавиненть,
Максозо сон маней чить,
Улест лембе пиземнеть,
Панжост мазый цецинеть,
Ливтяст бизны мекшинеть,
Теест нармунть пизынеть,
Соласт ловонь шушминеть,
Чадост, чудест лейнетне,
Жольнест чудикерькскетне,
Панжост минек паксятне,
Штавтост пиреть, уматне,
Лисест лугав ракшатне,
Мораст морост эрзятне!

-Весенень сюкпря! Ней тыненк норовжорчт!

Вана пачкодсь пес минек  вастовоманок. Илинк стувто тиринь келенк! Зярдояк илядо визде кортамс эсенк кельсэ. Содадо: сон сехте питней, сон сехте мазый!