Мақала "Қазақстанның болашағы-қазақ тілінде"

                                   Айдарова Алмагүл Жаңбырбайқызы

                                                    Облыстық мамандандырылған спорттағы дарынды балалар

                              мектеп-интернатының жоғары санатты қазақ тілі мен әдебиет           

пәні мұғалімі. Тараз қаласы

Қазақстанның болашағы – қазақ тілінде

        Құрметті  әріптестер, қымбатты тіл жанашырлары! Осы мақаланы сіздерге ұсынудағы мақсатым: спорттағы дарынды балалар мектеп-интернатындағы  білім алушыларының қазақ тіліне деген құрмет пен дұрыс қөзқарасын қалыптастыру.                    

 Біз алдағы уақытта да мемлекеттік тілді дамыту жөнінде көптеген кешенді жұмыстар жүргізуіміз міндетті. Тіл саласында қызмет етіп жүрген ұстаздар қауымы ғана емес, жалпы ата – аналар, жас ұрпақтар тіл мәселесін келешек ұрпақтың ертеңгі болашағы деп түсінуіміз қажет. Болашақта кез- келген ұрпақ осы заманғы ғылыми терминологияның негізін латын тілінен енген сөздер құраса, ақпараттық технология дамыған қазіргі дәуірде күн сайын дерлік ағылшын тілі дүниежүзі халықтарының тілдеріне жаңа сөздер мен ұғымдар арқылы батыл ену үстінде. Сондықтан бұл үдерістен біз де тыс қалмауымыз керек. «Қазақ тілі – біздің рухани негізіміз. Біздің міндетіміз – оны барлық салада белсенді пайдалана отырып дамыту. Біз ұрпақтарымызға бабаларымыздың сандаған буынының тәжірибесінен өтіп, біздің де үйлесімді үлесімізбен толыға түсетін қазіргі тілді мұраға қалдыруға тиіспіз.

 Тіл саясаты - мемлекеттік саясат, ол егеменді еліміздің берік арқауы, демографиялық, әрі саяси ахуалдың қалыптылығын қамтамасыз ететін ықпалды күш.

Мемлекеттік тіл – мемлекеттің бүкіл аумағында, қоғамдық қатынастардың барлық салаларында  қолданылатын тіл болғандықтан, жүргізілетін барлық іс-қағаздары мен құжаттар мемлекеттік тілде болуы тиіс. Өйткені өркениетке құлаш ұратын елдің өрісі қашанда білікті де, саналы ұрпақпен кеңеймек. Әлемдегі мүйізі қарағайдай елдердің санатына енуді көздеген халықтың басты мақсаты да сауаты ұрпақ тәрбиелеу. Сауатты ұрпақ тәрбиелеу дегеніміз, өз ана тілінде еркін сөйлей алатын, оны терең меңгерген ұрпақ. Ал ана тілін жақсы білмейінше сауатты сөйлеп, сауатты жазып, тіл байлығын мол қолданбайынша, шын мәніндегі мәдениетті адам бола алмайсың деген тоқтамға келіп отырмын. Олай болса, «халық пен халықты, адам мен адамды теңестіретін - білімі»,- деп жазушы М.Әуезов айтқандай, елімізді өркениетке бастар жолдың бастауы - тілімізді жоғалтпайық. Тіл тағдыры - ел тағдыры екенін ешуақытта ұмытпайық. Анамыздың ақ сүтімен бойымызға дарыған тілімізді ұмыту - бүкіл ата-бабамызды ұмыту деген екен атамыз Бауыржан Момышұлы, сондықтан да ананың ақ сүтімен бойымызға тараған ана тілімізді ақсатпай, мәртебесін көтере білейік!

Құрметті ұстаздар, ата – аналар, жас ұрпақтар «Қазақстанның болашағы – қазақ тілінде», «Мен қазақпын» деген ғажап, ұлы сөзді қазақ тілінен бастайық, тіл мәселесін сөзбен емес іспен бастау алайық.

                            Спорттағы дарынды балалар мектеп-интернатының өмір үрдісі

 22 –қыркүйек Қазақстан Республикасы Халықтарының тілдер мерекесі күніне арналған «Тіл мерейі, ел мерейі» атты әдеби сазды кеш өткізілді.Онда оқушылар ана тілге деген махаббаттарын жыр шумақтары арқылы төгілтіп, мемлекеттік тілдің маңызы туралы баяндамалар оқып, шығармалар, суреттер көрмесі ұйымдастырылып, қазақ тілінің сұлулығын,өткірлігін,көркемдігін  дәлелдеді десем артық болмас.Осындай іс-шаралардың көп өткізілуі тілімізді одан әрі жетілдіріп, әдебиетімізге зор үлесін қоспақ. Еліміз көркейе берсін, сөзіміз таусылмасын, тіліміз өз беделін жоғалтпасын!

Облыстық мамандандырылған спорттағы дарынды балалар мектеп – интернатының қазақ тілі мен әдебиет пәнінің мұғалімі:  Айдарова Алмагүл Жанбырбайқызы