Тәрбие сағаты; "Ұрпақтар ұмытпайтын Жеңіс"

«№152 қазақ орта мектебі» КММ

Дайындаған 10-сынып оқушылары және сынып жетекшісі Гүлмира Әлихан

Мамыр, 2019 жыл

Тәрбие сағатының тақырыбы: «Ұрпақтар ұмытпайтын Жеңіс»

Мақсаты:  Ұлы Отан соғысында ерлікпен қаза тапқан жауынгерлердің рухына бас иіп,Ұлы Отан соғысын басынан өткерген ардагерлерге құрмет көрсету. Балаларды Отанын, елін сүюге тәрбиелеу, патриоттық сезімін ояту.

Барысы:

Мұғалім сөзі.

Соғыс!!! Не деген суық та қорқынышты сөз. Бұл сұм соғыс қаншама адамды зарлатып кетті: қаншама анасыз бала, ұрпақсыз ана күңіреніп қалды. Бұл зұлматтың уыты әлі күнге дейін сезңлетіндей...

Бірақ біз бүгін соғыс туралы емес, Ұлы Жеңіс туралы айтқанымыз дұрыс. Жеңістің 74 жылдығы баршамызға құтты болсын!

Жеңіс деген жақсылықтың сыңары

Жігерменен құштарлықтың құралы

Күрескердің арманы мен ұраны

Қуаныш пен мерекенің бұлағы.

Қамықпаған қиындықтың үрейінен,

Өздеріңе силап қырдың гүлінен

Бүгінгі ұрпақ – бақытты ұрпақ атанып

Құттықтаймыз Ұлы Жеңіс күнімен! –дей келе, келесі сөзді оқушыларға берейік. Ұрпақтар ұмытпайтын бұл жеңіс мәңгі болсын!!!

Жүргізуші: Армысыздар, бүгінгі «Ұрпақтар ұмытпайтын Жеңіс» атты кешке жиналған қауым! Ұлы Жеңістің 74 жылдық мерейтойына арналған салтанатты жиынымызды бастауға рұқсат етіңіздер.

Жеңістің жырын айтсын тіл-көмей,
Абзал досым, мүгедектері жүр демей!
Ел дегенде еңіреп туған ерлерді,
Еске алайық бір сәт тұрып үндемей.

Бейнеролик «Тыныштық сәті»

Ғафу Қайырбеков. «Жеңіс солдаты». Оқитын Майқанова Ақбота.

Соққанда жылына бір Жеңіс күні 

Жаныңның жазылғандай кеңістігі,

Қарт солдат өз полкінің туын ұстап,

Білдірмей жалғыз аяқ кемістігін.

Алаңға шығушы еді таңғы шақта,

Полктас бауырларын сан құшақтап.

Сүйісіп, амандасып болғаннан соң,

Қасқайып тұрушы еді алғы сапта.

Соңынан тізілетін жауынгерлер,

Отанның әр тұсынан келген ерлер,

Жарқырап өңірінде ордендері,

Бір кезде алып берген елге бедел.

Бір кезде алып берген елге Жеңіс,

Сарбаздар бірте-бірте келмей тегіс,

Жыл санап сирек тартып бара жатты,

Сарқылып сабасынан бейне теңіз

Қырық жыл, қырық қатар жиналысқан

Сағынып, бір-біріне түу алыстан.

Туған жер аспанында айқұш-ұйқыш

Жол қалып, қарт бүркіттер зулап ұшқан.

Кездесіп тоғызыншы май мейрамында,

Алысқан ғарасаттың майданында.

Еске алып ескі жорық асуларын,

Қанатын қараушы еді жайған туға.

Ал бүгін... Өзге полк солдаттары

Қатарға тұрып жатыр аңдап бәрі...

Олар да түгел емес, сиреп кеткен

Кешегі бір-бір үйдің шаңырақтары.

Жалғыз тұр жалғыз аяқ мына солдат,

Төмендеп, көтерілмей туы аспандап,

Жалғыз тұр... Әлі келген бір адам жоқ,

Жаңғырып дуылдайды тулап жан-жақ.

Сағаттар зырылдайды, ағады уақыт,

Өмірдің баянсызын баяндатып,

Байлайды бір орында қарт солдатты,

Әлі де қайран үміт алаңдатып.

Жоқ ешкім.

Күн еңкейді, жұрт азайды...

Қанатын түн жетектегі бұлт та жайды.

Еңіреп қоя берді бетін басып,

Солдаттың бар үмітін жұтты қайғы.

Дегендей "бұлттан бұрын мен жауайын",

Көз жасын соңғы тамшы қан жуайын.

Дегендей солқ-солқ еткен кеудесіне

Көк тасқа тамды қасірет, тамды уайым.

Қайтадан сол тамшыны бір сіміріп,

Қараған өзге жұртты күрсіндіріп,

Көп талған күні бойы жалғыз аяқ

Кешкі ымырт қойнауына кетті кіріп.

Дейтіндей мезгіл емес - ертең-бүгін

Еске алдым қырық төрт жыл өткендігін.

Дәл бүгін сол солдаттай ұққан жан жоқ

Жалғанда жалғыздықтың не екендігін!

Жүргізуші: Ұлы Отан соғысы миллиондаған адамның өмірін алып кеткен, талай боздақты қыршынынан қиып, ананы жесір, сәбиді жетім еткен қанды шайқастарға толы 1418 күн мен түн ешқашан да ұмытылмас. Ол мәңгі есімізде сақталады.

Көрініс «Соғыс пен бейбітшілік».

Жүргізуші: Есімін жас ұрпақ есінде мәңгі қалдыру – баршамыздың азаматтық борышымыз. Еліне, туған жеріне оралмай, жат жердің топырағы бұйырған ерлерді біз әрқашан құрметпен еске аламыз.

Би «Смуглянка». Орындайтын қыздар тобы.

Талай  жанды  қиды  ажал  балтасы.

Жауды  жеңіп  қайтты ауылға  қаншасы.

Біздің  мына  бейбіт  өмір  алаңсыз.

Ел  қорғаған  батырлардың  арқасы.

Ән «Сарбазым». Орындаушылар: Пірімжанова Перизат, Қазбекова Алтынай.

Жүргізуші: Осы сұрапыл соғыста ер азаматтармен бірдей біздің апаларымыз да өздерінің естен кетпес ерліктерін көрсетіп, Отан үшін қан майданда жараланған солдаттардың жанын сақтап, өз көмектерін аяған жоқ.

Көрініс «Соғыс өрті болмасын!»

Ән: «Жойылсын жалғыз сөз соғыс деген» (хор).

Жүргізуші: Ендігі жерде соғыстың өзі түгілі аты аталмасын, жер бетінде, бүкіл әлемде тек бейбітшілік, бейбіт өмір болсын, әрқашан күн сөнбесін!

«Бейбіт өмір жастары» биі, қыздар тобы.

Жүргізуші: Біз аға-апаларымыз үшін қарыздармыз. Отан үшін жанын аямай, орасан зор қайсарлық, батырлық, ерлік көрсеткен ержүрек батырларды бүгінгі күнде еске алу, ұмытпай есімдерін тарихта жаңғыртып отыру - сіздердің және біздердің парызымыз! 

Ән «Самға, қазақ!». Орындайтын Пірімжанова Перизат.

Жүргізуші: Соғыста ерлік көрсетіп, Отан үшін жанын қиған апа-аталарымыз өте көп. Олардың ұрпақтарына қалдырған мұрасы – бақытты балалық шақ, бал дәурен, бейбіт өмір!!! Ерлеріміздің ерлігі әрқашан қадірлі және ешқашан ұмытылмайды.

Видеофильм: «Ерлердің ерлігі ұмытылмайды»

Ән «Әкеге арнау» (хор)

Жүргізуші: Тек қана елге амандық орнасыншы

Бейбіт болып әрбір күніміз,

Береке тола берсін жылымыз,

Биіктерге тұрсын мәңгі желбіреп

Көк аспанмен түстес біздің туымыз! – деп осымен мерекелік тәрбие сағатын аяқтаймыз!