"Мен патриотпын"

Тәрбие сағатының тақырыбы: Мен- патриотпын!
Мақсаты: 
1.    Оқушыларды Отанды сүюге, құрметтеп қастерлеуге, өз елінің  тарихын білуге тәрбиелеу.
2.    Оқушылардың таным белсенділіктерін, қызығушылықтарын дамыту.
3.    Оқушыларға патриоттық, эстетикалық, адамгершілік тәрбие беру, өз

ой-пікірін білдіре алатын оқушыларды  тәрбиелеу.

Көрнекілігі: интербелсенді тақта
Барысы: 
1.    Ұйымдастыру. 
2.    Мұғалімнің кіріспе сөзі:

Мұғалім: – Балалар, бүгін қандай күн?

Кіріспе:

-Қадірлі ата-аналар! Қымбатты оқушылар! «Мен -патриотпын» атты ашық тәрбие сағатына қош келдіңіздер!

Елбасы Н.Ә. Назарбаев: «Қазақстан – 2030 » жолдауында  «Біздің балаларымызбен немерелеріміз бабалардың игі істерін, дәстүрін сақтай отырып, қазіргі заманғы, нарықтық экономика өркендеу үстіндегі, күллі әлемге, әйгілі әрі сыйлы, өз елімнің патриоттары болады» – деп нақты көрсетілген.

П-парасатты

А-ақылды

Т-талантты

Р-рухты

И-иманды

О-отаншыл

Т-табанды

Жалпы «Патриот» деген сөзді өздеріңіз қалай түсінесіңіздер?

Топтық жұмыс

Мұғалім:

- Елім, жерім, тілім, дінім деген әрбір қазақты патриот дейміз. Алайда бүгінгі өсіп келе жатқан жаңа буын, ертеңгі ел тізгінің ұстайтын азаматтарымыз патриот ұғымын қалай түсінер екен?

– Сен өзіңізді патриотпын деп айта аласың ба?

Ержан:

Мен өзімді патриотпын деп есептеймін. Менің бұған дәлелім, кез келген жерде кез келген уақытта тек қазақ тілінде сөйлеймін.

Патриоттық деген еліне, туған жеріне деген  сүйіспеншілік, барлық ұлттық құндылықтарды құрметтеу болып табылады.

Айбота:

Әрбір қазақпын деген азамат, ол өз елінің патриоты болуы тиіс.  Мен  өз Отанымның патриотымын, өйткені, кішкентай күнімнен ата-анам мені мектепке бермей тұрып-ақ маған ән ұранды жаттатқызып,олардың мемлекет үшін маңызы қандай екенін ұғындырып өсірді. Осылай менің өз Отаныма деген алғашқы патриоттық сезім қалыптасты.

Ержан: Бірліктің берік туы тек ынтымақ,

Өсиетім: сол үшін құшағыңды аш!

Өсиетім: шындықты, адалды сүй,

Ардақтаған халықты, адамды сүй!

Елдің тіккен іргесін игілікке,

Тап бүгінгі бақытты заманды сүй.

Отанды сүй, Отан сүйген көсемді сүй,

Соған айт, әдемі жыр, сүйкімді күй!

1938, Жамбыл Жабаев

Әсемгүл: Байтақ Отан – туып өскен өз елім,

Өмірімдей өршіп аққан өзенім?

Артым жақсы,

Алдым қандай тамаша,

«Бөтен елдің падишасы болғанша,

Өз елімнің терсем артық тезегін!»

1946, Қасым Аманжолов

Гүлжанат: Күн күзетіп, түн қатып,

Азаттық үшін алысқан,

Дауылда туын шулатып,

Ер қасына шанышқан,

Исатай, Махамбеттердей

Ұл туған халық кім еді?

Білмесең, бауырым, біл енді:

Ол – қазақ, менің ер халқым.

1943, Жұбан Молдағалиев

Аманболат: Ана тілі – біздің туған анамыз!

Анамыздай сыйлап, бағып-қағамыз.

Ана тілін бағаласақ қалай біз,

Өзіміздің сондай болмақ бағамыз.

Ана тілін кім аялай білмесе,

«Анасынан безген ұл» деп қараңыз.

Мұзафар Әлімбай    

Айбота: Туған жер, туған ауыл қымбат маған,

Ешкімге бұл сезімді былғатпағам.

Мен оның өзім ғана сезінетін

Қастерлі қасиетін жырлап бағам.

Ол жерге деген менде сезім бөлек,

Жатпасын келгенімде өзімді елеп!

Ал оның қасиетін сезу үшін

Тек менің жүрегім мен көзім керек!

Фариза Оңғарсынова

Айсәуле: Еділге дейін сонау Ақжайықтан

Ақ бидай ақтарылып кең жазықтан,

Маржан тау бола қалды қырманда астық,

Аймалап сүйген оны ғажайып таң!

Ойнайтын қырда бұрын кұйын ұйтқып,

Кең далам кетті жайнап құйылып құт!

Отанның қоймасына құйды бүгін,

Орденді Қазақстан қыруар пұт!

1958,Тайыр Жароков

Мұғалім: - Ия, балалар, елін, жерін сүйетін азамат болып шығу үшін қандай бала болуымыз керек?
-    Білімді, өнерлі, ақылды, еңбексүйгіш бала болуымыз керек.
-    Дұрыс-ақ, ендеше Отан, туған жер туралы қандай мақал- мәтелдер білеміз?

Ержан: Ән «Көк тудың желбірегені».

Қорытынды: - Міне, балалар, бүгін өздеріңді Тәуелсіз еліміздің болашағы екендеріңді, яғни, нағыз азамат екендіктеріңді көрсете білдіңдер.

Сондықтан, халқымыздың бүгінгі уақытқа дейінгі жеткен жетістіктері өздеріңе аманат. Сондай-ақ, еліміздің егемендігін танытатын ресми ерекшелік белгілері: Ана тіліміз, Елтаңбамыз, Туымыз, Ата заңымыз, Әнұранымызды бойындағы бой тұмарындай сақтап қана қоймай, қашанда еліміздің, жеріміздің еркіндігін сақтар мықты ұрпақ, мықты азамат болатындарыңа сенімім мол. Жолдарың ашық, жарқын болсын, Тәуелсіз елдің азаматтары!