Асық ойыны.
Асық ойыны негізінен ер балаларға тән. Асық ойнау үшін керекті құралдың ең негізгісі – сақа. Әдетте оны үлкен оңқай асықтан шіге жағынан қорғасын құйып ауырлатып, тәйке жақ табанын, шіге жақ бетін тегістеп, оң қолға ұстап асық атуға ыңғайлап жасайды. Асық ойынын жазды күні тақыр жерде ойнайды. Бір-біріне қарсы екі бала не бірнеше бала екі топқа бөлініп ойнаулары мүмкін. Ойынның негізгі шарты бір-бірінен асық ұту. Асық ойынының үштабан және алтыатар деп аталатын өте кең тараған түрлері болған. Үштабан ойнау үшін тақыр жерге көлденең сызық сызылады да, оған әр ойыншы бір бірден арасын сиректеу етіп асық тігеді. Содан соң ойнаушы балалардың барлығының сақаларын біреуі жиып иіреді. Қімнің сақасы шықса сол бірінші болып сақасын көннен алысырақ жерге иіреді. Сақасымен тігулі тұрған асықтарды атып, үштабаннан артықтау жерге жіберуі керек үш табаннан кем, я болмаса сақасы асықтарға тимей кетсе, ойынды сақасы шыққан келесі ойыншы бастайды. Ойын көндегі асықтарды ұтып біткенше созылады. Алтыатар ойыны бұдан басқаша. Көндегі асықтардың бір шетіне түпте қалған ( сақасы шықпаған) баланың сақасы тігіледі. Асықтар арасында саңлау болмай тіркестіріле қойылады. Көннің екі жағына 1м жерден су (сызық) ал 5-6 м жерден қарақшы белгілейді. Кімде кім түптегі сақаны жұлып кетсе (судан шығарса) бүкіл асықты сол алады. Ал сақаға тимей асықты ұшырса, оның судан шыққаны ғана соныкы болып табылады. Ату саны-6 рет. Алғаш сақасы шыққан бала, қалғандары одан кейінгі кезекте атады. Алты рет атыстан қалған асықтар бәрі түпте қалған баланікі болып есептеледі.
