Жеке тұлғаның дамуы және тәрбиесі (Шебер сынып)

Педагог-шебер: Хайруллаева Алия Базарбайқызы

Тақырыбы: «Жеке тұлғаның дамуы және қалыптасуы»

Шебер сыныптың мақсаты: Аудиторияның өмір тәжірибелеріне сүйене отырып, тәрбие, орта, тұқым қуалау туралы білімдерін жаңғырту.

Міндеттері:

1. Жеке тұлғаның ой-санасының, білім көлемінің толысуына байланысты оның көзқарасындағы белгілі құбылыстарға баға беруіндегі өзгерістерді өмір қажеттіліктеріне қолдану.

2. Сөйлеу және тыңдау, белсенді талқылау дағдыларын дамыту

Күтілетін нәтиже: Тәрбие, орта, тұқым қуалау туралы білімдерін жаңғыртып, олардың адам дамуындағы ролі туралы қорытынды жасайды.

Әдістер мен тәсілдер: «Кластер» әдісі, «Тікелей радиоэфир» әдісі «Тв шоу» әдісі, қалыптастырушы бағалау әдісі.

Өткізу ұзақтығы, уақыты: 20 минут

Керекті құрал-жабдықтары: слайд, микрофон, ватман, карандаш, маркерлер

Әдебиеттер тізімі:

Ш.Х.Құрманалина т.б. (Педагогика, Астана Фолиант, 2007) оқулығы. Жеке тұлғаның тәрбиесі, қалыптасуы бойынша схема, дәріс материалдары

Шебер сынып жүрісі:

Кіріспе бөлім:

Салематсыздар ма, құрметті ұстаздар және әділ қазы алқасы!

Жеке тұлғаның дамуына әсер негізгі үш факторды білеміз. Олар:

1. тұқым қуалаушылық;

2. орта;

3. тәрбие.

Адам баласы материалдық және рухани өмірдің ортасында тіршілік етеді де, өзі өмір сүріп отырған қоғамның, ұжымның, ұлттың, рудың мүшесі ретінде өзіндік ақыл-парасатымен, жеке бастың өзіне тән ақыл-ой, ерік-жігер, мінез-құлық ерекшелігімен көрінуге тырысады. Қоғам мүшелерінің бәріне ортақ біркелкі мінез-құлықтың, қасиеттің болуы мүмкін емес. Әр адам өзінше жеке тұлға.
Адамдардың қоршаған ортадағы құбылыстарды түсініп қабылдауы да әр түрлі. Ол әр адамның жеке басына тән физиологиялық, психологиялық, биологиялық ерекшеліктеріне байланысты. Жеке тұлғаның ой-санасының, білім көлемінің толысуына байланысты оның өмірге көзқарасы, белгілі құбылыстарға баға беруінде де өзгерістердің болуы, толысып жаңарып отыруы заңды құбылыс.
Тәрбие және балалардың дербес ерекшеліктері.

Баланың дербес ерекшелігі тәрбие процесінде, даму кезеңінде байқалады. Дербес ерекшеліктерге түйсік, қабылдау, ойлау өзгешеліктері, жеке адам бойындағы мінез-құлық, темперамент, қабілет жатады. Жүйке жүйесінің типтік қасиеттері - адамның мінез-құлығының, темпераментінің, қабілетінің табиғи негізі.

Негізгі бөлім:

1 топ: Тұқым қуалаушылық(тұқымына тарту)

«Кластер». ( мәтін бойынша талдау жұмыстарын жүргізіп нақты және негізгі ақпараттар плакатқа теріліп жазылады.

Биологиялық фактор (тұқым қуалаушылық) адам дамуында үлкен маңызға ие болып отыр. Ол жеке тұлғаның өзіне тән сипаттамаларын айқындайды: темперамент, мінез, қабілет.

Қалыптастырушы бағалау: «Екі жұлдыз, бір тілек»

/ тілек жазу/

Әлеуметтік фактор

Ортаның (әлеуметтік қоршау) адам дамуындағы ролін ашады. Оның маңызды фактор екендігін атап көрсетеді. Себебі, адам қарым – қатынас процесінде, басқа адамдармен әрекеттестікте қалыптасады. Қарым – қатынас сипаты, ерекшеліктері жеке тұлға дамуына үлкен ықпал етеді. Әлеуметтік орта - адам дамитын нақты болмыс.

2 топ: «Тікелей радиоэфир» әдісі

Радио жүргізуші талқыланатын тақырыпты таңдайды. Студия қонақтарына карточка береді, сол карточкадағы тақырыпты талдайды. тыңдаушылар аудиториясы сұрақ қою үшін «қоңырау» шалады. Тыңдаушылар аудиториясы «бағдаршам» түстерімен бағалайды.

Әлеуметтік фактор / әлеуметтік фактор түрлері

Макроорта – қоғам (тоталитарлық қоғамда өскен адамның мінезі демократиялық мемлекеттен өзге), ел, мемлекет, мәдениет

Микроорта (топ, микротоп, отбасы, тәрбие институттары, діни ұйымдар)

Мезофактор (этнос – ұлт, аймақтық жағдай, елді мекен типі(село, поселок, қала, облыс), бұқаралық ақпарат құралдары)

Адам таза ақ қағазға ұқсағандықтан параққа не жазсаң сол қалады. Практика, өмір тәжірибесі көрсеткеніндей адамның қандай болатындығы оның ортасына байланысты. Ортасы қандай болса да адам да сондай болады.

Қалыптастырушы бағалау: «Бағдаршам»

3 топ: Тәрбиені қай уақытта бастау керек?

«ТВ шоу» ұйымдастыру

Жүргізуші қатысушы қонақпен тақырыпты талқылайды. Аудитория сұрақтар қояды, талқылауға қатысады.

Қалыптастырушы бағалау: «Қол шапалақ»

Қорытынды:

Жеке тұлғаның дамуына әсер ететін факторларды талдадық. Ал, осы негізгі үш фактордың қайсысы көбірек әсер етеді деп ойлайсыз? Ең бірінші әрине біз ол – тәрбие деп ойлаймыз. Себебі, тәрбиенің ерекшелігі орта мен тұқым қуалаушылықтың ықпалын түзете алады.

Рефлексия «Кемпірқосақ топтары»