«Білім басы - ?ліппе!»

Сабақтың тақырыбы: «Білім басы - Әліппе!»

Сабақтың мақсаты: Оқушылардың ой-өрістерін, ойлау қабілетін, сөздік

қорларын молайтуға ықпал жасау. Бірлікке,

ынтымақтастыққа, мейірімділікке тәрбиелеуге

ахуал туғызу.

(Бастаушылар екі оқушы.)

1-жүргізуші: Құрметті ата-аналар!

2-жүргізуші: Ұстаздар!

1-жүргізуші: Оқушылар!

2-жүргізуші: Тойларың құтты болсын!

1-жүргізуші: Білімдерің мықты болсын!

2-жүргізуші: Пейілдерің ашық болсын!

1-жүргізуші: Пәле-жале қашық болсын!

2-жүргізуші: Алдарыңызда әліппе оқулығын аяқтағалы отырған 1 «А» класс оқушылары.

1-жүргізуші: Міне, кеше ғана кішкентай балапандар құшақтары гүлге толып, мектеп табалдырығын аттап, қолдарына сүйікті Әліппе кітабын алған болатын. Сол әліппемен бүгін қоштасқалы отыр.

2-жүргізуші: Ендеше, «Білім басы - Әліппе!» атты ертеңгілігімізді бастауымызға рұқсат етіңіздер!

1-жүргізуші: Міне, Әліппе бітіру – алдағы өмірге бастайтын көп белестердің бірі. Ендеше, балалар сендер бүгінгі күні сол белестердің бірінен астыңыздар!

2-жүргізуші: Құрметті ата – аналар, ұстаздар, оқушылар бүгінгі той сіздер мен біздер үшін ортақ той салтанатты мереке!

1-жүргізуші: Қош келдіңіздер!

2-жүргізуші: Өтті оқу сан сабақ

Бүгін үлкен салтанат

Оқулықпен достасып

Әліппемен қоштасып

1-жүргізуші: Өтті қызық көп күндер,

Алты жасқа жеттіңдер,

Келдіңдер де мектепке

Бір белестен өттіңдер.

2-жүргізуші: Өсті міне бойларың,

Өсті ақыл ойларың,

Қуанышқа ортақпыз,

Құтты болсын тойларың – дей отырып ендігі кезекті Әліппемен қоштасқалы отырған оқушыларға береміз.

Хор: «Ұстазым»

1-жүргізуші: Олай болса, ең қымбат досымыз Әліппені ортаға шақырайық!

Хор: Әліппе! Әліппе! Әліппе!

2-жүргізуші: Жақсы досым келіңіз,

Тамашаны көріңіз

Төрімізде орын бар,

Құтты мейман болыңыз.

Әліппе: Армысыңдар жас достар

Армысыздар ата –ана

Болашаққа жол бастар,

Әліппең келді ортаға!

1-жүргізуші: Ой білімі арғымақ,

Тақпақ айтып тақылдап,

Тыңдайықшы жарқылдар, - дей келе кезекті бүлдіршіндерге

берелік.

1-оқушы: Күн нұрындай білімнің

Күнімен мол білімнің

Құттықтаймын достарым

Құтты болсын ұлы күн.

2-оқушы: Әліппем менің, Әліппем,

Сені қолға алып мен.

Есігін аштым мектептің

Ертеңгі сәуле жарықпен

3-оқушы: Әліппені бастадым

Есепті де үйрендім

«Бестік» баға алған күн

Масаттанып үйге ендім

4-оқушы: Түсінбеген жерімді

Мұғалімнен сұраймын

Әріптерді тізілтіп

Сөзді өзімше құраймын

5-оқушы: Оқуды көп ойладық

Қызығғына тоймадық

Әріптерді үйреніп

Сауат аштық ойланып

6-оқушы: Барлық әріп бағалы

Айттық әділ бағаны

Әріпсіз сөз болмайды

Буын онсыз толмайды

Адам барлық әріпті

Ардақтайды, қолдайды.

7-оқушы: Әсем ою-өрнекпен

Көмкерілген Әліппем

Сен болмасаң білімге

Бастайтын жолды біліп пе ем?

8-оқушы: Бар кітапқа бас болған

Әліппе ғылым атасы

Әліппеден басталған

Даналықтың данасы

Әліппе деген – алтын жол

Апарар сені алысқа

Әліппем, менің әліппем

2 -жүргізуші: Ал, балалар сіздердің тойларыңа ең жақын достарың келіп тұр. Қарсы алайық.

Қоңырау: Саламатсыздар ма балалар, менде сендердің мектептегі достарыңның бірімін, сіздер мені өте жақсы көресіңдер. Солай ма....?

(Балалардың жауабы) Иа а а а...

Қоңырау: Өйткені мен сіздердің бойларыңды, ойларыңды сергітіп, бір – біріңмен мәз – мейрам қылам, ал кеттік...

( Барлығы сергіту сәтін жасайды)

Сергіту сәті: Шынықтырып денені

Тісін жуып, тазалап

Мектебіне барады

Міне, нағыз азамат!

Орамалы қалтада

Үсті, басы тап - таза

Отырады партада

Міне, нағыз азамат!

1-жүргізуші: Ортаға кішкентай әншіміз «Әліппе» әнімен Нұрайды шақырамыз. Қарсы алыңыздар!

2-жүргізуші: Міне, қызық; Бүлдіршіндеріміз әліппені оқи отырып «Жаңылтпаш» айтуды да меңгерген екен.

1. Мұз мұзға ұқсас

Тұз тұзға ұқсас

Мұзда тұзда ұқсас

1. Бүлдір, бүлдір бүлдіршін,

Бұл бір қызық бүлдіршін

Білгірлігін білдірсін.

1. Шамалы шыршасы шырайлы,

Шынары ішінара ұшырайды.

1. Жағажай

Жағажайда Қамажай,

Жағажайда жағалай

Жүгіреді Қамажай

1. Үш кіші ішік піштім,

Бес кіші ішік піштім,

Неше кіші ішік піштім?

1. Қыс қатты –ақ,

Қыспаққа – ап

Құс тоңып жүр

Қыстап қап.

1. Қабат – қабат үй салдық,

Үйлер толы күй сандық

Күй сандықтан үй салдық,

Күй сандыққа күй салдық.

1. Бүлдіргенді Бүлдірген,

Күлдіргенді күлдірген,

Күлдіргенде Бүлдірген

Бүлдіріп ап күлдірген,

Дейді екен бүлдірмен.

1. Шалабай шыл Шалағай

Шалағай шы Шалабай.

Шақша басы шарадай,

Шаладай шала Шалабай.

1-жүргізуші: Келесі, кезекті балғын домбырашыларға береміз.

1. Моцорт «Алегретто»

2. Ғизатовтың әні «Біз өмірдің гүліміз»

2-жүргізуші: Сіздер әр сабақта жақсы сөздермен танысасындар. Сыпайылыққа, адамгершілікке, әдептілікке, кішіпейілдікке үйреніп келесіңдер. Егер сендер осы кезден әдепті болып өссеңдер, есейгенде ата – анаңның, өз Отаныңның мақтанышына айналасыңдар.

1-жүргізуші: «Мақал–сөздің мәйегі» – дегендей бүлдіршіндердің мақалдарын тыңдалық.

1. Білекті бірді жығар,

Білімді мыңды жығар.

1. Оқусыз білім жоқ,

Білімсіз күнің жоқ.

1. Әдепті бала арлы бала,

Әдепсіз бала сорлы бала.

1. Досы көпті жау алмайды,

Ақылы көпті дау алмайды.

1. Туған жердей жер болмас

Туған елдей ел болмас

(Қоңырау өтеді) Сергіту сәті: Үйрек аузын ашады

Қанаттарын қағады

Бір отырып, бір тұрып

Билеп – билеп алады.

2-жүргізуші: Келесі кезекте Хор: «Отан»

1-жүргізуші: Ақыл ойым кеңейді,

Сөздік қорым көбейді,

Жасырын сөзді табуға

Жұмбақ шештік жабыла – деп бүлдіршіндердің жұмбағын ойланып, тез шешейік.

1. Жазу – жазып жалықпаған,

Жаза жаза арықтаған

(бор)

1. Қабат – қабат қаттама,

Ақылың болса аттама

(кітап)

1. Өшірді, сүртті,

Өзгені құртты,

Өзін де құртты.

(өшіргіш)

1. Жоқ өзінде бас та, қас та, мойын да,

Ұзындығы жазумен тұр бойын да.

(сызғыш)

1. Үйреткен і лімді

42 білімді

(Әліппе)

1. Бетін адам ашады,

Білім нұрын шашады.

(кітап)

2-жүргізуші:Кішкентайәншіміз Ақботаның орындауында ән:«Мектебім»

1-жүргізуші: Қош бол, құтты Әліппем!

Көп нәрсені үйреттің

Таныстырып әріппен,

Тақылдатып, сөйлеттің! – деп сөз кезегін Әліппе досымызға беремін.

ӘЛІППЕ.

Рахмет, құрметті оқушылар мен сіздерге өте ризамын. Мені жақсы меңгердіңдер, таза ұстадыңдар. Адамгершіліктеріңе көп рахмет, кішкентай достарым.

Ризамын, құрметті шәкірттер,

Меңгердің болмадың басқа тер,

«Ана тілі» атты әпкем бар,

Сендерді жетелеп әкетер.

2-жүргізуші: Біз енді «Әліппемен» қоштасамыз,

Жолына біздер оның жыр шашамыз,

Білімнің булағынан сусындауға

Көптеген кітаптармен достасамыз.

Әліппе: Қош сау болыңыздар, кішкентай шәкірттер.

Балалар. Қош сүйікті Әліппе!

1-жүргізуші: Хор: «Әліппемен қоштасу әні»

2-жүргізуші: Әліппемен қош айтысып қаламыз,

Енді қолға басқа кітап аламыз,

«Ана тілі» қуанышқа ортақ бол,

Әрі қарай сізден білім аламыз.

(Қоңырау ана тіліні ортаға әкеледі)

Ана тілі. Сәлеметсіз бе, балалар!

Тойларыңыз құтты болсын!

Сөйлетер сөзді шеберлеп,

Өзіңнің ана тіліңмен,

Байытып жақсы оқысаң,

Негізі менде білімнің.

Терең білім, ой саналы

Әрбір сезім, ой салады,

Ғылым, тәлім өнерім көп,

Достасқанға берерім көп.

1-жүргізуші: Балғын бишілердің орындауында биді қабыл алыңыздар

2-жүргізуші: Міне, балалар, әліппені толық аяқтадыңдар. Енді тек буын мен сөзді ғана емес әңгіме, ертегі оқып, хатта жазасыңдар.

1-жүргізуші: Міне, азаматсыңдар мектебіміздің үлгілі, білімді, саналы оқушыларын тыңдайық.

1-оқушы: Қоңырау үні мектепте,

Шақырады мені жолға алыс,

Әкетті мені жетектеп,

Арманға қарай сол дауыс

2-оқушы: Партаға тұңғыш отырдым,

Қалам алып қолыма,

Қалдырмай дәптер жолында,

Үйрендім көркем жазуды

3-оқушы: Сәлем алтын мектебім,

Алғыстарым көп менің,

Оқу, білім, тәрбие,

Ой санама еккенің

4-оқушы: Достарым көп, құрбым көп,

Мектепке де кірдім кеп,

Хат жазам-ау ағама,

Оқу оқып жүрмін деп.

5-оқушы: Осыдан да көлемді,

Оқи алам өлеңді,

Бардым бүгін мектепке,

Оқушымын мен енді.

6-оқушы: Ана тілің арың бұл,

Ұятың боп тұр бетте,

Өзге тілдің бәрін біл,

Өз тіліңді құрметте.

7-оқушы: Соғылған сомдап алтыннан

Әліппе білім бесігі,

Ашылды енді алдымнан,

Кең дүние есігі.

8-оқушы: Асыл сөзін тілімнің

Бойға құйған әліппе

Нақ бастауы білімнің

Қырық екі әріпте

2 жүргізуші: Әсемпаз болма әрнеге,

Өнерпаз болсаң арқашан,

Сен де бір кірпіш дүниеге,

Кетігін тап та бар қалам.

(Қоңырау өтеді) Сергіту сәті: Мынау менің жүрегім

Осыдан бәрі басталады

Мынау менің басым

Осы бәрін басқарады

Мынау менің оң қолым

Мынау менің сол қолым

Бір, екі, үш

Біз жинаймыз күш!

1 -жүргізуші: : Келесі, кезекті балғын домбырашыларға береміз.

1. Қуатбаев «Сурет сабағы»

2. Орыстың халық әні «Ва саду ли в огороде»

2 -жүргізуші: Міне, балалар сыннан да сүрінбей өттіңдер, білім жолындағы сапарларың сәтті болсын дей отырып, құттықтау сөз кезегін мектебіміздің директоры: Қартпағамбетова Дәмелі Қойбаққызына береміз.

1-жүргізуші: Келесі сөз кезегін мектеп директорының орынбасарлары Гүлмира Құспанқызы, Бағдагүл Жақсылыққызы, Сауле Садуақасқызы, Роза Қасқабайқызына сөз кезегін береміз.

Мұғалім сөзі: Міне, бүгін біз барлық ғылымның атасы, біздің болашағымыздың негізі Әліппені бітіріп отырмыз. Балалардың білімдері құтты болсын! Білімі артып, сөз байлығы молайып, санасы өсіп еліміздің тірегі бола берсін!

Әліппені бітірді балаларым

Әліппеден нәр алған даналарым.

Өзі жазып, оқитын кезге жетті,

Құтты болсын білімі балалардың!.

Балалар, ата – аналар! Мектептегі тұңғыш тойларың құтты болсын!

2-жүргізуші: Кішкентай әншіміз Ақботаның орындауында ән:«Көңілді күн»

1-жүргізуші: Баланы білімді саналы, ақылды, адам етіп тәрбиелеуде ата – аналардың үлесі зор. Сондықтан келесі сөз кезегін ата – аналарға береміз.

2-жүргізуші: Осымен бүгінгі «Білім басы - Әліппе!» атты ертеңгілігіміз аяқталды.

Сау, саламатта болыңыздар!

Пайдаланылған әдебиеттер:

1. Бастауыш мектеп, 2008, №4

2. Бастауыш мектеп, 2009, №3

3. Мектептегі мерекелер 2009, №5

4. Мектептегі мерекелер 2009, №6

5. Мектептегі сыныптан тыс жұмыстар 2008, №12

6. Әліппе серігі Алматыкітап, 2009

7. Алғашқы қоңырау кітабы.

№34 орта мектеп

Кластан тыс шара

Тақырыбы: «Білім басы – Әліппе!»

Класы: 1 «А»

Өткізген: Сатыгалиева А.Т.

Ақтөбе – 2013ж