Внеклассное мероприятие "Урок КВН"

Урок – КВН

     КВН- нтнэ састь урокс аволь классонь мероприятиятнестэ. Сехте сеетьстэ сынь ютавтовить , зярдо мельс ледстявить ютазь тематне ды разделтнэ.

    Максови уроконь – КВН – энь план « Валонть составось ды валонь теевемась» разделэнть коряс.

     Налксемадонть ды сонзэ правилатнеде тонавтницятненень евтави икелепелев. Классось явови кавто командав.Эрьва командась арси эстензэ лем, девиз, кочки капитан, учителенть лесксэнзэ вельде теи а покш «шумбракстнема», арты эмблемат.

     Теде башка, командатне теить кавтонь – кавтонь кудонь задания:

1)      муемс эли, паряк, тынстенк арсемс содамоевкст, конатнень ответэст - сложной  валт;

2)      арсемс вал  ды теемс эйстэнзэ суффикс вельде од валт – неть чарькодематне невтевить эли кодамояк теевемасо ( примеркс: лаз – лазномс – невтеви пенгень лазномась), эли артовкссо.

КВН – ть молемазо.

1.Шумбракстнема (командатне евтасызь лемест, девизэст, арсить паро мельть – бажамот ялгаст туртов).

2. Разминка (тонавтницятне максыть вейкест – вейкест туртов колмонь – колмонь кевкстема разделэнть коряс).

3. Командатненень заданиятне.ч

1.Налксема «Дежуриця буква».( Командань капитантнэ « керсемань» азбукастонть таргить буква марто кавтонь – кавтонь карточкат ( икелепелев сынст сельмест сюлмавить). Эряви мельс ледстямс ды сермадомс вейке слогонь валт, конатнесэ ули ансяк вал юр.

               Эрьва видестэ арсезь валось – «очка».

2.Эрьва командастонть вейкень – вейкень ломань важоди доска икеле.

Заданиясь: сермадомс васня вейке валонь форматнень, мейле – раськень валтнэнь.

а) сал, салсо, салов, салтомс, састо, салшка, салтома.

б) чувто, чувтсто,чувтомомс, чувтокс, чувтомома, чувтошка, чувтонь.

         Лиятне теить истямо задания: максозь вал юртнестэ эрьва кодамо суффикс вельде теемс од валт. Изни се, кие максозь шканть перть теи седе ламо валт:

Ашо - …

Лаз - …

Питне - …

Ярсамс - …

3. Кавто ломанть важодить доска икеле.

Максозь валтнэстэ теемс сложной валт:

Ведь, прамс; пицемс, палакс; кирьга, парь; эй, сюро; шта, тол.

Лиятне теить истямо задания: максозь кавонзазь валтнэнь васенце пелькстнэнень муинк омбоце пельксэст:

Ават - …, суреть - …, карть - …, однэк - …, симемс - …, кшить - …, пенчть - … .

Кавонзазь валтнэнь ютавтомс рузонь кельс.

4.Налксема « Нилецесь – а эрявикс вал». Толковамс, кона валось рисьмесэнть а эрявикс.

Кшить – салт, кетькс, нетькс, ласкс ( кшить – салт – кавонзазь вал)

Ведьгев, кудазор, пизелкс, эйзюро ( пизелкс – аволь сложной вал).

Чувто, койме, вирь, умарькс ( умарькс – производной).

5.Налксема «Кие седе курок ». Эрьва командантень максовить кеменень – кеменень карточка, конатнесэ сермадозь нолдазь буква марто валт. Доскас лисить кавто ломанть ( вейте – вейте эрьва командасто). Эрьвась эйстэст сермадсынзе ансяк сеть валтнэнь, конань сермадомасо сон а кавтолды. Бути жо сон теи ильветькс, доскас лиси лия тонавтниця, витьсы ильветьксэнть ды прядсы роботанть. Изни се командась, кона седее курок ды ильветькстэме тейсы заданиянть.

Карточка лангс валтнэ:

Тов…юро, тол..андя, ке…кс, ла..кс,  се…мукшт, кан…еро, нер…гема, тан …ть, тен ..т …, лис…мапря.

6.Кевкстемат – пеетькшнемат.

      1. Кода атянть велявтомс кудонь нармунекс?

      2. Мезе эряви теемс, штобу кедесь теевель браслетэкс?

 (Саезь Д.В.Цыганкинэнь « Занимательной грамматикастонть»).

4.Кудонь заданиянть проверямось.

5.Капитанонь конкурсось.

     1.Муемс С.Люлякинань « Емазь сараске» стихотворениястонть валтнэнь, конат теевсть вишкалгавтыця ды кольневтиця суффикс вельде. Суффикстнэнь тешкстамс.

Титя – титя, сараскем,

Титя, тарваз коклацькем,

Титя, понав пильгинем,

Ашо – ожо сермавнем.

Титя – титя, ти-ти-ти!

Кува, превтеме, якат?

Кува эсь принеть кантнят?

Моданть стяко мезть тапат?

Мекс а нарват ципакат?

     2. Теемс составонь коряс разбор ашолгадсь, кудынесэ валтнэнень.

Эрьва виде ответэнть кис капитанонтень максовить веете «очкат».

6. Выводтнэнь теемась. Эрьванень заданият.