Білімге құштарлық

Сабақ мақсаты: Оқушыларға ақиқат құндылығын білімге құштарлық арқылы ашу.

Міндеттері:

• (Білімділік) Оқушыларға білімнің маңыздылығын түсіндіру;

• (Дамытушылық) Оқушылардың оқуға деген қызығушылығын дамыту;

• (Тәрбиелік) ізденімпаздыққа, білім құмарлыққа, парасаттылыққа тәрбиелеу.

Ресурстар: (құрал, мәлiметтер) үнтаспа,қағаз, оқулық, дәптер.

Сабақ барысы:

1.Ұйымдастыру кезеңi.

«Өзін - өзі тану» сабағының «5Т» ережесін еске түсіру.

Тыныштық сәтi. «Нұрға бөлену»

  Ыңғайланып отырыңыздар, денелеріңізді түзу ұстаңыздар. Аяқ-қолыңызды айқастырмаңыз. Қолыңызды тізеңізге немесе үстелге қоюға болады. Көздеріңізді жұмуларыңызды өтінемін.

Елестетіп көріңіз: Күн нұры сіздің төбеңізден өтіп, кеудеңізге қарай бойлап барады. Кеудеңіздің орта тұсында гүл түйнегі орналасқан. Гүлдің түйнегі нұрдан баяу ашылып келеді. Балғын және таза әсем гүл сіздің әр ойыңызды, әр сезіміңізді, эмоцияңыз бен тілек-қалауыңызды  шайып, жүрегіңіздің қауызын ашты. 

Нұр сәулесі сіздің бойыңызға ақырын тарай бастағанын елестетіңіз. Ол біртіндеп күшейе түсуде. Оймен осы нұрды қолдарыңызға түсіріңіз. Сіздің  қолдарыңыз нұрға бөленіп, сәуле шашуда. Қолымыз тек жақсы, ізгі істер істейді және баршаға көмектеседі. Нұр аяқтарыңызға тарады. Аяқтарыңыз  нұр сәулесін шашуда. Олар сізді тек жақсылық жасау үшін жақсы жерлерге апарады. Нұрды құлақтарыңызға бағыттаңыз, құлақтарыңыз тек жақсы сөз бен әсем әуенді ғана естиді. Нұр көздерімізге де жетті, көзіміз  тек жақсыға қарап, бәрінен жақсылықты ғана көреді. Сіздің басыңыз түгелдей нұрға бөленіп, басыңызға тек ізгі, сәулелі ой келеді. 

Нұр бірте-бірте қарқын және шұғылана бастайды, сіздің денеңізден шығып, жан-жағыңызға сәуле шашады. Осы нұрды туысқандарыңызға, мұғалімдеріңізге, достарыңызға, таныстарыңызға бағыттаңыз. Нұрды уақытша  түсініспей, ренжісіп жүрген адамдарға да бағыттаңыз, олардың да жүрегі нұрға толсын.

Осы нұр бүкіл әлемге: барлық адамдарға, жан-жануарларға, өсімдіктерге, барлық тірі жанға таралсын... Ғаламның барлық түпкір-түпкіріне нұр бағыттаңыз. Ойша айтыңыз: «Мен нұрлымын... Нұр менің ішімде... Мен Нұрмын».

Осындай Нұр, Махаббат және Тыныштық күйінде  отыра тұрыңыз... 

Енді осы Нұрды жүрегіңізге орналастырыңыз. Нұрға толы бүкіл әлем  сіздің жүрегіңізде. Оны осындай әсем қалыпта сақтаңыз.

Жаймен көзіңізді ашуға болады. Рахмет.  

 Оқушылар өз әсерлерімен бөліседі.

Баяу әуен

2. Үй тапсырмасын тексеру.

Оқулықтың 12-беттіндегі Қ.Толыбаевтың «Құштарлық» әңгімесін оқу

Сұрақтар:

1. Баланың бойынан өздеріңе ұнайтын қандай жақсы қасиеттерді көрдіңдер?

2. Білімнің адам өмірінде қандай маңызы бар?

3. Өзіміз не үшін білім аламыз?

1. Дәйексөз

Оқу-білім бұлағы, білім-өмір шырағы.

Халық мақалы

Сыныптағы қыз балалар – 2 рет, ұл балалар – 2 рет және

Барлық оқушылар 2 рет қайталап оқиды. Дәптерлеріне жазып алады.

1. Әңгiмелеу

«Білім мен тәжірибе» /Аңыз әңгіме/

Бір күні шәкірті қария данышпанға келіп:

- Ұстазым, сіз өмір бойы біліммен сусындап келесіз. Білімнің сіз алмаған қамалы жоқ шығар. Айтыңызшы, күнделікті тұрмыста да сондай шеберсіз бе?-деп сұрайды.

Артынша ұстазының жауабын күтпестен:

- Мен болсам, балтамен ағаш бұтауды шебер меңгердім. Алдыма жан салмаймын. Сізді де жеңетініме сөз жоқ, жарысып көрейік,-деді.

Данышпан асықпай, сабырлылықпен:

-Мен дайынмын,-деп жауап берді.

Олар орманға барып, әрқайсысы өзіне жер бөліп алады да, жарысты бастап кетеді.

Шәкірт дем алмастан ағашты шаба береді.Ұстазы жаққа құлақ салып қояды. Ол данышпан балтасының даусын естімей қалса, демалып отыр екен деп қуанып қояды.

Жарыс біткен кезде, данышпанның шапқан ағашы көп болып шығады.

-Қалайша?-деп айқайлап жібереді шәкірті. -Сіздің кейде ағаш шаппай, демалып отырғаныңызды естідім ғой...

- Иә, ол кезде мен балтамды қайрап отырғанмын. «Ісім өнсін» десең, алған біліміңді өмірде дұрыс қолдана біл, балам. Қайралған балта сияқты білім де тәжірибемен шыңдалып отыруы керек,-дейді данышпан шәкіртіне.

Шәкірт ұстазының сөзі мен ісінен өзіне мәңгілік сабақ алды.

1.Данышпанның өз шәкіртімен жарысқа түсуінің мәні неде?

2.Ұстаз шәкіртіне дұрыс өмір сүруді қалай үйретті?

3.Білімді өмірде қалай қолдануға болады?

4.Шәкіртінің ұстазымен жарысқа түсу мақсаты қандай болды?

5.Өздерің білімді қайдан аласындар?

1. Шығармашылық жұмыс, топтық жұмыс

Оқушылар түсті (көк, жасыл, сары) стикерлердің көмегімен 3 топқа топтасып, келесідей тапсырмалар алады:

1 топ: білім туралы өлең құрастыру немесе бұрын жаттаған өлеңдерін еске түсіреді.

2 топ: оқу, білім тақырыбында мақал-мәтелдер жазу

3 топ: соңғы рет оқыған кітаптары мен қызықтырған кейіпкерлері туралы айтып береді

Оқушылардың жауаптары тыңдалып, қорытындыланады.

1. Топпен ән айту

«Ұстазға мың тағзым» әні

Әні мен сөзі: Б.Бейсенованікі

1.Мектеп-кеме, білім-теңіз,
Толқыныңда біз жүземіз.
Желбіреген ақ желкені
Ұстазым сенсің ұланымның ертеңі. 

Қайырмасы:

Ұстазым,
Жыр сазым.
Бір өзіңе,
Мың тағзым,
Ұстазым. 

2.Ұстаз ана, ұстаз дана,
Нұрлы жүзің жанға пана.
Сенің маржан асыл сөзің
Әнұранымдай жаңғырады санамда.

Қайырмасы: 

1. Үй тапсырмасы

Оқулықтың 17-бетіндегі Ы.Алтынсариннің «Асан мен Үсен» әңгімесін оқу.

1. Соңғы тыныштық сәтi

Балалар бүгінгі сабақтан алған жақсы қасиеттерді жүрегімізде сақтап алайық. Сабаққа белсенділік танытып, қатысқандарыңызға көп рахмет! Сау болыңыздар!