Туған тіл – сатылмайтын байлық

Тақырыбы: Туған тіл – сатылмайтын байлық.

Мақсаты: 1. Отанын, жерін, тілін сүюге, болашақта Қазақстанды өркендетуге

өз үлестерін қосатындығын түсіндіру.

2. Туған тілге деген сүйіспеншілігін, ынтасын арттыру. Ана тілін

құрметтеуге баулу.

Білімділік: Отанға, тілге деген құрметті қалыптастыру

Дамытушылық: тез ойлауға, танымдық ойларын дамытуға дағдыландыру.

Тәрбиелік: Ана тілін қадірлеуге тәрбиелеу. Тіл туралы айтылған ұлы

адамдардың сөздерін қолдана білуге үйрету.

Түрі: тәрбиелік өнеге сабақ

Көрнекілік: магнитофон, фотостенд, нақыл сөздер жазылған бетшелер.

Пәнаралық байланыс: қазақ тілі мен әдебиеті, таным, тарих.

Өнеге сағатының өту барысы:

Мұғалім:

• Құрметті оқушылар, ұстаздар. Тәуелсіз мемлекетіміздің төл мерекелерінің бірі «Қазақстан халықтарының тілдері күні». Бұл мереке жыл сайын мемлекетімізде 22- қыркүйек күні аталып өтеді. Елбасы Н.Ә.Назарбаев өзінің бір сөзінде : «Бабаларымыз ғасырлар бойы қорғаштап, сақтаған туған жеріміз – бірінші құндылығымыз. Бұл жер жүзден астам этностарды құшақ жая қарсы алған, қазір олар тату-тәтті өмір сүріп жатыр»-деді. Міне, кең байтақ елімізді мекендеген әрбір ұлттың құндылығы бұл – туған тілі.

Баян Бекетованың тіл туралы өлеңін оқимын.

Тілім, ділім – тірлігім, арым, барым,

... Жанға жара кей кезде жаңылғаным.

Сені мүкіс еткенше мәңгүрт болып,

Неге осы орнымда жарылмадым?!

Елдігімді сақтаған, пірім менің,

Қасиетіңе бас иіп, жүгінемін.

Жүрегімді беймезгіл шаншытады,

Тірі тұрып қайтадан «тірілгенің».

Ғасырларды келесің кешіп әман,

Керуен мен қазына, көшің аман.

Тасалардан тас атқан тақуалар,

Мен оларды қалайша кешіре алам?!

Осы тілмен жырларын жазып Абай,

Ел тағдырын шешті ғой қазы талай.

Осы тілмен от шайнап, жалын жұтсам,

Жүрегімнің жетпейді назы қалай?

Өгейсітті-ау кей балаң, есіл анам,

Кінәсізбін деп қалай есіле алам?

Осы тілмен танимын тарихымды,

Осы тілмен Сәкенді есіме алам.

Мұғалім:

• Балалар, біздің Отанымыз- байтақ та, бай ел. Елімізде көп ұлт өкілдері тұрады. Әр халықтың өз ана тілі бар. Адам шыр етіп дүние есігін ашқаннан өмірі тілмен тығыз байланысты. Ана тілі адам баласының бойына ананың ақ сүтімен беріледі. Жарқын болашаққа ұмтылған Қазақстанның әрбір азаматы үшін көп тіл білу қажет. Бірнеше тіл білгеннен біз ұтылмаймыз. Сондықтан білімге ұмтылайық, бірақ өзге тілді білсек те, өз ана тіліңді білу, анаңдай қастерлеу басты мақсат. Әуел бастан ана тілін үйреніп, жақсы меңгермеген адам өзге тілді де меңгере алмайды.

1. оқушы Көп тіл білсең көкжиегің кен болар,

Құрметтейді кісі екен деп төрге озар.

Қай елде жүрсен де бұл дұрысы

Мемлекеттік тілді үйренген жөн болар.

1. оқушы Туған тілім – бабам тілі, өз тілім,

Туған тілім – анам тілі, өз тілім.

Туған тілім- далам тілі, өз тілім,

Туған тілім –адам тілі, өз тілім

1. оқушы Армысың ардақты анам – қазақ тілім,

Бір өзіңнен тараған өнер – білім.

Құтты болсын, бүгінгі тіл мейрамы

Жарқын болсын әрқашан келер күнің.

1. оқушы Танытқан қазағымның қазақтығын,

Танытқан қазағымның азаттығын.

Танытқан қазағымның ғажаптығын,

Айналдым құдіретіңнен Қазақ тілім.

Ән: «Ананың тілі»

Тақтада ілінген нақыл сөздерге тоқталу:

1. «Ана тілін жақсы меңгере алмай тұрып, өзге пәндерді түсіну мүмкін емес» . (Ж.Аймауытов)

2. «Өз алдына ел болуға өзінің тілімен әдебиеті бар ел ғана жарай алады». (А.Байтұрсынов)

3. «Анамыздың ақ сүтімен бойымызға дарыған тілімізді ұмыту – бүкіл ата-бабамызды, тарихымызды ұмыту». (Б.Момышұлы)

Топқа бөліп мақал-мәтел жарысы.

Мұғалімнің қорытындылау сөзі:

М.Мақатаев «Үш бақытым»

Ең бірінші бақытым – халқым менің,

Саған берем ойымның алтын кенін.

Ал екінші бақытым – Тілім менің,

Тас жүректі тіліммен тілімдедім.

Бақытым бар үшінші – Отан деген,

Кім мықты ? – десе біреу, - Отан дер ем.

Қымбатты оқушылар ақиық ақын М.Мақатаев атамыз жырлағандай Отанын, халқын, жерін, елін сүймеген адам тілін де сүймейді. Халқымыздың рухын, ұлттық салт- санасын, қаһармандығы мен даналығын, болашаққа деген сенімін, арман-тілегін паш еткен ана тіліміз мәңгі жасасын.