Просмотр содержимого документа
«Тәуелсіздік төрімде»
Тақырыбы: Тәуелсіздік төрімде.
Мақсаты: Қазақстан республикасының тәуелсіздік алуы, еліміздің тәуелсіздігіне биыл 25 жыл толуы туралы түсінік беру. Отанымыздың байлығы туралы, жеріміздің үлкендігі туралы түсініктерін қалыптастыру арқылы есте сақтау қабілеттерін дамыту. Балалардың Отанға туған жеріне деген сүйіспеншілігін арттыру.
Залдың іші мерекеге лайық безендірілген.
Көк тудың желбірегені әнінің әуенімен балалар залға қолдарына көк туларын желбіретіп кіреді.
Жүргізуші:
Қуан халқым! Қуанатын күн бүгін, Серпін таста мұңды жүрек түндігін Шарықтайық, шаттанайық, тынбайық Тәуелсіздік күнін бүгін, халқым бірге тойлайық!
Шайқалмасын ешкімнің шаңырағы, Бақыт көрсін Отанның сан ұланы. Енді ағайын, көгінде қалықтасын, Қазағымның қастерлі - Әнұраны!
Құрметті аса қадірменді қауым! Еліміз егемендік алып, тәуелсіз мемлекет болғанымызға 25 жыл толуына орай ұйымдастырылған “Тәуелсіздік төрімде” атты ашық тәрбие сағатын еліміздің мемлекеттік әнұранымен бастайық.
ҚР мемлекеттік әнұраны орындалады. Мультимедиялық тақтадан Президент қалай сайланғаны және Тәуелсіздігімізді қалай алғанымыз туралы кино көрсетіледі.
Жүргізуші: Тәуелсіздік күніне арналған мерекелік жылы лебіздерді қабыл алыңыздар:
Күлімде, күн күлімде,
Жер жасарып көгерсін.
Кешегіндей бүгінде,
Қанат қақсын көгершін.
Балалар шаттық шеңберіне тұрып қимылмен айтады.
«Жаса Қазақстан» әні орындайтын Мағжан, Абылай,Диас қарсы алыңыздар.
Назерке:
Он алтыншы желтоқсан
Тәуелсіздік алған күн
Ерекше боп мәңгілік
Ел жадында қалған күн
Мейрамбек:
Жасай берсін ұлы күн
Үміті боп елінің.
Ақ күні боп баланың
Шаттығы боп Ананың
Нұрсая:
Он алтыншы желтоқсан
Елдің ұлы мейрамы
Жаңа шыққан көктемдей
Жаз күніндей жайдары
Думан:
Арымыздай тап-таза
Жанымыздай шуақты
Көтерілді биікке
Қазақстан байрағы
Жанерке:
Он алтыншы желтоқсан
Ел мерейі тасыған
Қазақ деген қалың жұрт
Бәрін кешті басынан
Жүргізуші:
Шетсіз шексіз қиырсыз ұлы дала
Шуақ болып шашылмай жылына ма
Сүй отанды шынымен сүйіп өт те
Гүл боп қадал ойына, қырына да
Би «Астана вальсі»
Келесі кезекте балалардың жылы тілектерін қарсы алыңыздар.
Әдина:
Естісін ел үніңді,
Дүние түгел естісін.
Тәуелсіздік туыңды
Биік көтер, жас ұлан!
Диас:
Зеңгір аспан, көгілдір
Алтын күні төрінде
Тамылжытып, төгіп нұр
Шаттық сыйлар көңілге
Арсен:
Көк аспандай көгілдір
Қазақстан байрағы
Тұрса күндей төгіп нұр
Жылдарыңыз жайдары.
Ұлжан:
Көк байрақтың бетінде
Қыран бүркіт қанатты
Сол қырандай еркіндеп,
Бала өседі талапты
Ерлан:
Елтаңбасы елімнің
Неткен әйбат, әдемі
Тұнығындай көңілді, -
Ортада – аспан әлемі.
Тимур:
Құт, береке, шаңырақ,
Орын алған ол төрден
Қанатты қос арғымақ
Екі жақтан көмкерген.
Ән «Туған жер» орындайтын Жұлдызай, Кәусар, Ұлболсын қарсы алыңыздар.
Жүргізуші: Еліміз егемендік алып, міне сендер таза ана тілінде сөйлей бастадыңдар. Тіліміз бен дініміз қайта оралды. Еліміздің нағыз ұлт-жанды, елін, Отанын сүйетін нағыз азаматтары сендерсіңдер. Болашақтарың жарқын болатынына сенімім мол. Енді Отанымыз жайында тақпақтар тыңдайық.
Әнуар:
Шұғылалы таңымыз,
Қазақ жері – бағымыз
Қайнарынан мөп-мөлдір
Сусындайды жанымыз.
Рамазан:
Қазақ жері – сәніміз
Мәуесі мол бағымыз
Саясында жетілер
Балдай бала шағымыз
Гүлсезім:
Отанды біз атамекен
Деп аялап айтамыз.
Өйткені оны мекен еткен
Бабамыз бен атамыз
Ермұхан:
Отанды әркім анасындай,
Қастерлейді бағалап
Өйткені Отан баласындай
Бізді өсірер аялап.
Арсен:
Отан деген – атамекен,
Отан деген – туған жер.
Отан – ана, Отан – үлкен,
Қазақстан – туған ел.
Жүргізуші: Балалар, мен сендерге бірнеше сұрақ қойып,білімдеріңді сынағым келіп тұр.
1.Қазақстан Республикасының президенті кім? (Н.Назарбаев)
2.Қазақстанның астанасы қай қала? (Астана)
3.Біз қандай елде тұрамыз?
Жүрг: Балалар, еліміз туралы көп мәлімет біледі екенсіңдер. Оларыңа ризамын. Білімді азаматтар болып өсетіндеріңе сенімдімін.
Жүргізуші: Бүгін, міне, Егеменді тәуелсіз еліміздің ұлы мерекесін тойладық. Жүзіміз жарқын болып, аспанымыз ашық болсындеп тілейміз. Егеменді елдің болашағы – сендерсіңдер! Сендерге зор денсаулық, көңілдеріңе шаттық тілей отырып, атар әрбір таңдарың арайлы да шуақты болсын, күннің нұры сәулесін мол төксін деп ертеңгілігімізді «Атамекен» әнімен аяқтағым келіп отыр.
