Сабақтың тақырыбы: «Жүзден жүйрік»
Сабақтың мақсаты: Тілі, танымдық деңгейі, ой-өрісі, ойлау қабілеттері жоғары сыныпты анықтау.
Сабақтың көрнекілігі: кеспе қағаздар, сылдырмақ.
Сабақтың әдіс-тәсілдері: ойын, сұрақ-жауап, көрнекілік.
Сабақтың жоспары І Кіріспе
Ұйымдастыру кезеңі
ІІ Негізгі бөлім
1 кезең «Таныстыру»
2 кезең «Аламан бәйге»
3 кезең «Көкпар»
4 кезең «Жорға»
5 кезең «Теңге ілу»
ІІІ Қорытынды бөлім
Марапаттау
Сабақтың барысы: І Кіріспе. Ұйымдастыру кезеңі
Барлығы: Үлкенге де сіз, кішіге де сіз,
Сәлемдестік бәріңе әдеппенен біз.
Қуансаңыз сіз, қуанамыз біз.
Сізге де, сізге де, сізге де.
Сәттілік тілейміз біз.
-Армысыздар қадірлі қонақтар, ұстаздар және оқушылар! Ұлы Абай атамыз айтқандай «Сүйер ұлың болса сен сүй, сүйінерге жарар ол» - деп келешек ұрпаққа берер тағылымы мол, іздер қалдырған. Олай болса бүгінгі сайысымызда, ойынымызда өзімізді жаңаша қырынан көрсетіп, жақсы атсалысайық. Ал, қанекей, келіңдер,
Бір-біріңе еріңдер.
Біліміңді тексеріп,
Ойынға қатысып көріңдер, – дей отырып, «Жүзден жүйрік» атты сыныптан тыс зияткерлік ойынымызды бастаймыз. Ойын топтық сайыс түрінде 1 «А», 1 «Б» сынып оқушыларының арасында өтеді.
-Ендігі кезекте бүгінгі сайысымыздың шарттарымен таныссақ деймін. Сайысымыз 5 - кезеңнен тұрады.
1-кезең «Таныстыру»
(әр топ атымен, ұранымен таныстырады және бір-бірімен сәлемдеседі)
2-кезең «Аламан бәйге» (алдарыңызда тұрған кеспе қағаздағы сөздерді оқып, неше дыбыс, неше әріп, қанша буын, дауысты дыбыс, дауыссыз дыбыстар санын анықтау)
3-кезең «Көкпар» (әр топ 2 санамақтан айту)
4-кезең «Жорға» (қоржыннан асықтарды алып, онда берілген өрнектердің мәнін табу)
5-кезең «Теңге ілу» (бұл кезеңде сан артында жазылған тапсырмаларды орындау)
Балалар сендердің дұрыс жауаптарың үшін әр кезеңге 5 қойып отырамын. Ойын соңында жинаған ұпай сандарын санау арқылы жеңіске жеткен топты анықтаймыз. Жауап беру кезінде сигналдық белгілерді қолданамыз. Әрқайсысыңның алдыңда сигналдық белгі жатыр. Ал, олай болса оқушылар сіздерге сәттілік тілеймін.
ІІ Негізгі бөлім. 1 кезең «Таныстыру»
Топтың аты: «Алғырлар»
Ұраны: Жарыс десе жанамыз,
Бүгінгі күн жеңісті алғырлықпен аламыз.
Топтың аты: «Тапқырлар»
Ұраны: Білекті бірді жығады,
Білімді мыңды жығады.
2 кезең «Аламан бәйге»
Бірінші кезеңде менің «баста» деген белгімді күтесіңдер! Кім дайын сигналдық белгіні көтереді.
* *Қыс, жаз, оқушы, парта, мектеп, наурыз.
Үлгі: қазан - 5д, 5ә, 2б, 2д, 3д.
3-кезең «Көкпар»
Әр топ 2 санамақтан айтады. Кім дайын сигналдық белгіні көтереді.
4-кезең «Жорға»
Қоржыннан асықтарды алып, онда берілген өрнектердің мәнін табамыз.
9 - 3 - 3 + 7 -- 7 - 3 -- 4 + 2 -- 10 - 0
5 + 4 -- 4 + 3 -- 8 - 5 -- 2 + 3 -- 9 - 5
5 + 0 -- 8 + 2 -- 9 - 4 -- 2 + 0 -- 8 - 3
7 - 3 - 5 + 5 -- 10 – 5 -- 7 + 3 -- 4 - 3
5-кезең «Теңге ілу»
Бұл бөлімде ұяшықтар берілген. Әрбір ұяшықтың артында берілген сұрақтарға жауап береміз. Ұяшықты таңдау екі топтың өз еркінде.
| 10 | 10 | 10 | 10 |
| 20 | 20 | 20 | 20 |
| 30 | 30 | 30 | 30 |
10 саны белгіленген ұяшықтың сұрақтары:
1. Қазақстанның астанасы қай қала?
2. Жыл мезгілдерін ата?
3. Медеу мұз айдыны қай қалада орналасқан?
4. ҚР Рәміздерін ата?
20 саны белгіленген ұяшықтың сұрақтары:
1. Табиғат нешеге бөлінеді?
2. Апайда 3 гүл бар. Мен 3 гүл сыйладым. Апайда қанша гүл бар?
3. Ауаның температурасын өлшейтін құралды ата? (Термометр)
4. Менде 6 кітап бар, сендерге 5-ін сыйладым. Менде неше кітап қалды?
30 саны белгіленген ұяшықтың сұрақтары:
1. Адамдардың табиғаттан үйреніп жасаған заттарын ата? (қайық, ұшақ.)
2. Көлден ұшты 7 қаз,
Қайтып қонды 3 қаз.
Қонбады оның нешеуі,
Кәне кім тез шешеді? 7 – 3 = 4
3. Қосынды дегеніміз не? Айырма дегеніміз не?
4. Дыбыстар нешеге бөлінеді?
ІІІ Қорытынды бөлім
Жеңістер мен жеңілістен тұратын,
Өмір – күрес, жеткізе ме мұратын?
«Жеңбедім, жеңілдім» деп ренжіме,
Қатысу да бір жеңіс, жан болсаң сен ұғатын.
- Ендігі кезекті әділ қазыларымызға береміз. Қай тобымыздың көп ұпай жинағанын да анықтайтын уақыт болды.
Марапаттау. Жеңіске жеткен топты марапаттау.
-Құрметті ұстаздар, оқушылар! Уақыт бөліп келгендеріңізге көп - көп рахмет! Және балалар сендерге де рахмет, өз білімдеріңді көрсете білдіңдер.
Осымен бүгінгі сайысымыз аяқталды. Жарыс болған соң жеңіс пен жеңіліс қатар жүреді. Жарыста жеңілсек те, өмірде жеңіске жете берулеріңе тілектеспін!
