Ұлы Жеңістің 74 жылдығына арналған "Ұлы Жеңіс жасасын!" атты тәрбие сағаты

№5 мектеп-лицей

(Жеңістің 74 жылдығына арналған тәрбие сағаты)

«Ұлы Жеңіс жасасын!»

Өткізген: Дәрменқұлова Л.Ж.

2 А сынып

2018-2019 оқу жылы

Тақырыбы: Ұлы Жеңіс жасасын!
Мақсаты: Оқушыларды Ұлы Отан соғысымен, Қазақстандықтардың ерлік істерімен таныстырып, ой — өрісін дамыту; Оқушыларды адамгершілікке, Отанын сүюге, оны құрғауға баулу; Отанға деген сүйіспеншілікті арттыру, патриоттық сезімге баули отырып, балаларды үлкен адамдарды сыйлауға, оларды құрметтеуге баулу.
Көрнекілік: нақыл сөздер, газеттер, буклеттер, суреттер.
Барысы:
Тарих кеші үнемі жаңаланып отырады. Десе де ұмытылмайтын, ескірмейтін тарихи оқиғалар бар. Соның бірі әлемді дүр сілкіндірген екінші дүниежүзілік соғыстың қасіреті мен Ұлы Жеңістің қасиетін, батыр ағаларымызбен апаларымыздың ерлігін ешкім де ешқашанда ұмытпақ емес. Әлемді дүр сілкіндірген оқиға 1941 жылы 22 маусым күні таңғы сағат 4 — те бейбіт жатқан елімізге Германия тұтқиылдан соғыс ашты. Суық хабар сол күні байтақ елімізге, жер — жердегі ауыл — селоға тарады. Ер азаматтар асығыс соғысқа аттанды. Кейбірі өздері сұралып кетті. Қасиетті жеріміз, бейбіт жатқан еліміз, құлақ естіп, көз көрмеген апатқа ұшырады. Еліміздің жауынгерлері қасық қаны, шыбындай жаны қалғанша шайқасты. Жеңіс жеңілдікпен келген жоқ.
50 млн адамның өмірін қиды. Міне, осынау еліміздің жеңісіне 73 жыл толып отыр. Ешкім де, ешқашан да ұмытылмақ емес. Осы қан майданда мерт болған ерлердің рухына, бүгін арамызда асқар таудай болып жүрген аталарымызға басымызды иіп тағзым етейік. Олардың ерлік істерін ешкім де, ешқашанда ұмытпауы тиіс.
Дәл осынау жадыраңқы жай күйі,
Болса дағы қай ғасырдың қай жылы
Ұлы Отаным басым иіп бір минут
Есіңе алмақ сол бір апат қайғыны
( 1 минут үнсіздік)
1 — оқушыБұлт түнеріп аспаннан
Талай көзен жас тамған
Тұтқиылдан жау тиіп,
Қырғын соғыс басталған
2 — оқушы:Соғыс жалмап аға — іні бауырды,
Зар жылатты тыныш жатқан ауылды
Жалғызынан айырыпты ананы
Әкесінен айырыпты баланы

3 — оқушы:Ару қыздар — алаулап от кешкендер
Сыздап тұр — ау әлі күн оқ тескен
Қаласыңдар мәңгілікке ел есінде
Ару қыздар — алаулап от кешкендер.
4 – оқушы:Әлия 1924 жылы Қобда ауданы, Көкбұлақ деген жерде туған. Екі жасында жетім қалып, Әубәкір деген ағасы тәрбиелеген. Кейін ол ағасы Санкт-Петербург қаласына көшіп келеді де, Әлия сол қалада оқиды. Отбасының жағдайына байланысты Әлия кейін балалар үйінде тәрбиеленеді.
5 — оқушы:Әлия ерекше ұстамды зерек болды.(буклетпен жұмыс)
6 — оқушы:Соғыс басталғанда ол небәрі 17 жаста еді.
7 — оқушы:Әлия Казачиха деревниясында болған ұрыста оққа ұшты. Ол кезде ол небәрі 19 жасқа толмаған кезі еді.
Ән: Солдаты шли в последний бой
8 — оқушы:Естідім — ау Жеңіс күнін
Дүрілдейді көкпен жер
Қуанышпен қағып гүлім
Ойнақтайды қуанған ел.
9 — оқушыЖеңіс деген жақсылықтың сыңары
Жігерленген құштарлықтың құралы
Күрескердің арманы мен ұраны
Қуаныш пен мерекенің бұланы
10 — оқушы:Мәншүк 1922 жылы дүниеге келген. Шын аты — Мәнсия. Анасы еркелетіп Моншақ деп атаған. (буклетпен жұмыс)
11 — оқушы:Мәншүк соғысқа өз еркімен аттанғанда 19 — ға жаңа шыққан талдырмаш, пысық, жігерлі қыз еді.
12 — оқушы:Қазақтың атын, халықтың атын самғаттың!
Жасасын Жеңіс!
Бақытты елім күле бер!
Тәуелсіз болып болашағыңа жүре бер!
Ән: Ел қорғауға әзірміз.

13 — оқушы:Тыныштық! Жаса, тыныштық!
Осы сөз бізге тым ыстық
Көркейе берсін еліміз

Көбейе берсін ырыс — құт
14 — оқушы:Бақытты болсын балалар
Соғысты сүймес адамдар
Өркендей берсін қалалар
Гүлдене берсін далалар

15-оқушы:Күндер өткен күңіреніп жылдар күткен
Ана күткен, жетімек бала күткен
Келді, Жеңіс арқалап ақ арманды
Жиырма млн құрбандықпен
16-оқушы:9 мамыр – Жеңіс күні өмірді сүйер адамзаттың есінен мәңгі кете ме? Бірақ бұл Жеңіс оңайлықпен келген жоқ. Гитлершілдер соғыстың бас кезінде 190 дивизияны, 5 мыңдай ұшақты, 3700 танкті, 50 мыңдай қаруды шабуылға шығарды. Жерімізге басып кірген жау әскерінің жалпы саны 5,5 миллион адамға жетті.

17-оқушы: Қазақстандықтар Брест қамалын қорғады, Мәскеу түбінде де өлімге бастарын тікті. Сталинград, Курск доғасындағы шайқастарда ерекше көзге түсті. Берлинге шабуыл жасады, Рейхстагқа қазақ жігіті Рақымжан Қошқарбаев Жеңіс туын 1945 жылдың 30 сәуірде тікті. Рақымжан Қошқарбаев туралы бейнематериал көрсетіледі:

18-оқушы: Біздің халқымыз қазақтың батыр қыздары Әлия Молдағұлова мен Мәншүк Мәметованың есімдерін мақтанышпен атайды. Ата-анасынан ерте айрылған Мәншүк жастық шағын да тәрк етті. Алматы медициналық институтында оқып жүрген шағында жау жақтан ескен соғыстың ызғарлы желі жас қайыңның жапырағындай жайқалған бойжеткенді жұлып түсіреді. Халқына төніп тұрған қауіпке жаны шыдамай, дамыл таппастан әскерге өзі сұранып, жоғарыға мынадай өтініш жазады: «Фашистерді жою үшін майданға жіберетін менің ағайым да, апайым да жоқ, сондықтан өзімді жіберіңіз». Ел үшін қан төгіп, жан беріп жатқан отандастарына қалай да өз жәрдемін бергісі келген ниетпен, 1942 жылдың тамыз айында «Қызыл армия» қатарына алынды. 1943 жылдың 15 қазанында Псков облысындағы Невель қаласын босату үшін Изоча станциясындағы 173,7 биіктігінде қантөгіс соғыс болды. Сол күні Мәншүк жан серігі - пулеметімен дамылсыз оқ атып, ерен ерлік көрсетті. Жауыз жаудың Мәншүкке қарсы атқан оғы оның ажал оғы болып, өрімдей қызды қыршыннан қиып түсті.

19-оқушы: 1942 жылы Әлия өз еркімен майданға аттанып, мергендер мектебін үздік бітірді. Бірақ біраз уақытқа дейін оның алғы шептегі атыс-шабыс алаңында білім-білігін іс жүзінде көрсетуіне рұқсат етпеді. Бірақ жас қазақ қызы алға ұмтылды, жауға қарсы оқ жаудыруға асықты. Бір хатында ол өз құрбылары мен достары үшін фашистерден кек алуды қалайтынын жазады. Өзі оқыған қаласының құрсауда қалғаны оны қатты алаңдататын еді. 1943 жылы Снайперлер дайындау орталық әйелдер мектебін аяқтайды. 1943 жылдан бастап, 54-ші арнайы атқыштар бригадасы 4-батальонының снайпері болған (22-ші әскер, 2-ші Балтық жағалауы фронты). Жау әскерінің 30-дан аса сарбазы мен офицерінің көзін жойған. 1944 жылы 14 қаңтарда Псков облысының солтүстігіндегі Новосокольники ауданында қаза тапты.

Әлия мен Мәншүк туралы ән орындалады. Әлия туралы бейнематериал көрсетіледі:

20-оқушы: Оны – «дала сермеңдесі», «көк тәңірісі», «аспан перісі», «қанаттылар ханы» деп құрмет тұтты. Дәл осындай текті құстың болмысы қазақтың арда ұлы, Кеңес одағының батыры атағын екі рет алған қыран текті Талғат Бигелдинов еді. Дүниежүзілік екінші соғыстың ажал қорғасындары аспан көгін осқылап жатқан тұста, қазақтың сайын даласынан, Қараөткелден түлеп ұшқан сарша қыран көкке темір тегеурінді әскери ұшақты 305 рет көтерген екен.

21-оқушы: Қабиденұлы Төлеген Тоқтаров – қатардағы жауынгер. 1942 жылдан бастап 1943 жылға дейін Сталинград майданында соғысқан. «Германияны жеңгені үшін» медалімен марапатталған. 22-оқушы: Ұлы Отан соғы­сының ержүрек батыры, халқымыздың біртуар перзенті – Қасым Қайсенов 1918 жылы 23 сәуірде Шығыс Қазақстан облысының Ұлан ауданында дүниеге келген.1941 жылдың қараша айында Оңтүстік-Батыс майданның штабына аттандырылып, бас­қыншылар қолында қалған Украина жерін азат ету үшін жау тылына түсіріледі. Қайсенов атамыз сол жерде Чапаев атындағы партизан құрамасының үшінші отрядының басқарушысы болады. Бұдан кейін, 1944 жылдың соңына дейін Чехославакия (қазіргі Чехия), Румыния, Молдавия елдеріндегі партизан қозғалыстарына қатысты. Соғыс аяқталған жылдардан соң бейбіт еңбекке араласып, Қазақстан Жазушылар одағында, баспа мекемелерінде қызмет атқарған. Ұлы Отан соғысының қиын-қыстау кезеңін, жауынгерлердің ерлігін суреттейтін «Жас партизандар» (1954), «Ажал аузында» (1959), «Жау тылындағы бала» (1961), «Жау тылында» (1973) секілді көптеген шығармалардың авторы.

16- оқушы:Жеңіс келді қалама
Жеңіс келді далама
Жеңіс келді әке бол
Жеңіс келді ән болып
Жеңіс келді алақай!
Тоя жейтін нан болып!

17-оқушы:Жасасын Жеңіс!
Бақытты елім күле бер!
Тәуелсіз болып болашағына жүре бер!
Болмасын соғыс!
Болмасын соғыс!
Болмасын!
Осы тілекпен барша халайық түрегел!
Отанымызды жаудан қорғау жолында қасық қаны қалғанша шайқасқан Кеңес Одағының батырларына бас иеміз!