Досты? бізді? тірегіміз

Достық біздің тірегіміз.

2015 жыл – ұлттық тарихымызды ұлықтау және бүгінгі бағалау тұрғысынан мерейлі белестер жылы. Қазақ хандығының 550 жылдығын, Қазақстан халқы Ассамблеясы мен Конституциямыздың 20 жылдығын, Ұлы Жеңістің 70 жылдығын атап өтеміз. Осынау тарихи белестер Жаңа Қазақстандық Патриотизімді ұрпақ жадына сіңіруде айрықша рөлге ие. Қазақстан халқы Ассамблеясының 20 жылдық мерейтойы республикалық деңгейде мерекеленеді. Елбасы Нұрсұлтан Әбішұлы Назарбаев «Нұрлы жол - болашаққа бастар жол» атты халыққа арнаған Жолдауында «Ассамблея құрылуының 20 жылдығын атап өту арқылы біз қазақстандықтардың рухани күш қуатын арттыруымыз және толеранттылығын еселеуіміз керек. Сондықтан да, біз Қазақстан халқын ең үздік және мәңгілік құндылықтар - ел игілігі жолында ынта мен жігерді, еңбекқорлықты және мақсаткерлікті арттыруға шақырамыз» деген болатын.

Қазақстан Республикасы Президентінің Жарлығымен 2015 жыл – Қазақстан халқы Ассамблеясының жылы деп жарияланды. Халық бірлігі - мемлекеттілік негізі. Қоғамдық бірлікті ту етіп ұстау арқылы ғана біз алдымызға болашағы күшті, өркендеп, дамыған Қазақстан елі туралы ұлы мақсаттар қоя аламыз. Қазақ жерінде қазір 130-тан аса ұлт пен ұлыс өкілдері өмір сүріп жатыр. Оларға Қазақстан азаматтары ретінде тең құқық берілген.Елімізде мекен еткен ұлт пен ұлыстарға өз мәдениетін дамытып, салт-дәстүрлерін сақтауға лайықты жағдайлар жасалған.

Қазақстан халықтарының әдебиетімен таныстыру, әр ұлттың атақты ақын-жазушыларының шығармашылығын насихаттау және достық қарым-қатынасты нығайту мақсатында 5 ақпан күні «Достар» МС жанындағы қалалық кітапхананың ұйымдастыруымен Қазақстан халқы Ассамблеясының 20 жылдығына арналған «Достық біздің тірегіміз» атты әдеби фестиваль өткізілді.

«Достар» мәдениет сарайының көпфункционалды залында Қазақстан халықтарының әдебиетіне арналған ашық көрме ұйымдастырылды. Іс-шара барысында әр ұлттың өкілі өз тілінде халқының әдебиетімен көпшілікті таныстырып өтті. Шара барысында фестивальға қатысушылармен елімізде мекен еткен ұлт пен ұлыстарға өз мәдениетін дамытып, салт-дәстүрлерін сақтауға лайықты жағдайлар жасалғаны жайлы айтылды. Сонымен қатар поляк, әзірбайжан тілінде өлең оқылса, татар, неміс, өзбек тілдерінде ән шырқалып би биленді.

Фестивальға қазақ, орыс, өзбек, әзірбайжан, поляк, неміс, татар қоғамдық бірлестіктерінің жетекшілері, атап кетсек «Қазақ тілі мен мәдениеті» қоғамдық бірлестігінің мүшесі Қиықова З. Е, татар қоғамдық бірлестігінің төрағасы Абдуллин М.И., әзірбайжан қоғамдық бірлестігінің төрағасы Шихалиев Н.А., поляк қоғамдық бірлестігінің төрағасы Байковский В.Т, Ақмола облыстық неміс қоғамдық бірлестігінің төрағасы Татаринцева Е.Н., Славян қоғамдық бірлестігінің төрағасы Булычева Г. М. және осы бірлестіктердің өкілдері, кітапхана оқырмандары және Ақан сері атындағы мәдениет колледжінің «Кітапхана ісі» факультетінің, Құрылыс-техникалық колледжінің студенттері, №8 орта мектептің ұстаздары мен оқушылары қатысты. Достық фестивалі Ақмола облыстық Қазақстан халқы Ассамблеясының әнұранына айналған «Достық бесігі» әнімен ашылды.

Одан кейін сөз алған Қазақстан халқы Ассамблеясының мүшесі Қиықова Зере Еспайқызы фестивальға қатысушыларды Қазақстан халқы Ассамблеясының жылы аясында өткізілетін мәдени шаралардың бастау алатыны жайында хабардар ете отырып, бұл іс –шараның маңыздылығын атап өтті және бірлік халқымыздың басты байлығы екенін,әр халықтың ынтымақ жолындағы қосып келе жатқан еңбегін жоғары бағалап сол жолда аянбай тер төгу керектігіне тоқталды. Мәдениет және тілдерді дамыту бөлімінің басшысы Сабитова Айгуль Баубекқызы өз кезегінде іс-шараға қатысушыларды Елбасы жарлығымен «2015 жыл – Қазақстан халқы Ассамблеясының жылы» деп жарияланғаны өте дұрыс шешім екенін және бұны барша ұлт өкілдері қолдайтынына сенетіндігін айтып өтті.Сонымен қатар «Достық біздің тірегіміз» атты әдеби фестивальне қатысушыларды шын жүректен құттықтап, ел бірлігін,халықтар арасындағы достықты нығайту жолында қосқан үлестері үшін Қоғамдық бірлестіктерді және бір қатар азаматтарды Мәдениет және тілдерді дамыту бөлімінің Алғыс хаттарымен марпаттады.

Әзірбайжан қоғамдық бірлестігінің атынан сөз алған Шихалиев Н.А. қазақ халқы жайындағы алғашқы түсінік оның тілі,салт-дәстүрі,тарихы жайлы бала кезінде Мұхтар Әуезовтың «Абай жолы» романын оқу арқылы келгенін және қазіргі жастарымызға әдебиетті көбірек оқып,әр халықтың тіліне, тарихына,салт-дәстүріне құрметпен қарау керектігін тілге тиек етті.Еліміздегі басты байлық бірліктің қадірін біліп,барша ұлт өкілдері осы сыйластығымызды одан әрі дамытып, нығайту жолында аянбай еңбек ету әрқайсымыздың парызымыз деп білемін деген өз ойын білдірді .

Көп ұлттың ортақ мекеніне айналған қазақ еліне деген құрметін, сүйіспеншілігін білдіру мақсатында Поляк қоғамдық бірлестігінің мүшесі Байковская Альбина Кирриловна осы шараға арнап жазған «Достық үні» өлеңін оқып көпшіліктің көңілінен шықты.

Іс- шараға белсене қатысқан №8 орта мектеп оқушылары Амирасланова Нилуфар Қ.Аманжоловтың «Туған жер», Старостин Кирилл М.Шахановтың «Құдіретті төрт ана», Рожко Марина К.Салықовтың «Үкілі Ыбырай», Тремасова Анна Т.Молдағалиевтың «Тіл» туралы өлеңдерін оқыса,Ахмалыш Гүлдана өзбек халқының ұлттық биімен,Қасен Ділназ қазақтың «Қара жорға» биімен әдеби фестивальдің ажарын аша түсті, №19 орта мектептің оқушылары Серикбаев Сұңғат және Жүсіпбеков Сұлтан қазақтың «Адай», «Балбырауын» күйлерін нақышына келтіре орындап, жиналған қауымды бір қуантып тастады.

Қоғамдық бірлікті ту етіп ұстау арқылы ғана біз алдымызға болашағы күшті, өркендеп, дамыған Қазақстанға және алға қойған ұлы мақсаттарға жете аламыз деген жақсы оймен «Достық біздің тірегіміз» атты әдеби фестиваль өз мәресіне жетті.

№8ОМ қазақ тілі мен әдебиеті пәнінің мұғалімі Ахметбеков Тлеукен Тайбағарұлы.