Ұйымдастырылған оқу қызметінің технологиялық картасы
Білім беру саласы: Шығармашылық. Бөлімі: Сурет салу. Тақырыбы: Қазақтың ұлттық ою-өрнегінің элементі. Мақсаты: өрнекті кілемшені қазақтың ою-өрнек элементтерімен әшекейлей білуге үйрету. Ою-өрнектер туралы түсініктерін дамыту. Кілемшені «Қой ізі» және «ирексу» өрнегімен әшекейлеуді үйрету. Бояуды дұрыс пайдалана білуге, әсемдікке, ұқыптылыққа тәрбиелеу. Қолданылатын көнекілік құралдар: демонстрациялық материалдар. Қажетті құрал-жабдықтар: сурет дәптері, бояулар, қылқалам, картоптан жасалған сұлба.
Іс -әрекет кезеңдері
Тәрбиешінің іс-әрекеті
Балалардың
іс-әрекеті
Мотивациялық-қозғаушылық
Тәрбиеші балалардың назарын үлкен жайлаудың суретіне аударады. Жайлау өмірі жайында түсіндіріп, малдар жайлы, олардың төлдері туралы әңгімелейді. Олардың қалай дыбыстайтынын, таудан ағып жатқан өзеннің шуылын үнтаспадан тыңдатады. Қазақтың ою-өрнектері, олардың түрлері жайлы әңгімелеп, түсіндіреді. Бүгін осындай ою-өрнектер элементтерінің бірі «ирексу» және «қой ізі» өрнектерін салып үйренетіндерін айтады.
Сөздік жұмыс жүргізеді.
Табиғат көрінісін, жайлаудың бейнесін тамашалап, олар туралы өз ойларын әңгімелеп айтады. Төрт түлік малдың қалай дыбыстайтынын салып көреді. Қазақ ою-өрнекрерінің түрлерін қайталап айтады.
«Қой ізі», «ирексу» сөздерін жаңғырық әдісімен айтады.
Ұйымдастырушылық-ізденістік
Тәрбиеші балаларға кілемшенің дайын суреті салынған дәптерлер таратады. Белгілі бір түске боялған жолақшаға «қой ізі»мен «ирексу» өрнегін қалай салудың жолдарын түсіндіреді.
Алдын ала дайындалып езілген қоңыр түсті гуашь бояуына қатырмақағаздан жасалған сұлбаны (қой ізінің бейнесі) батырып, жолақшаның төрт бұрышына оның бейнесін түсіруді өзі жасап көрсетеді. Қылқаламның ұшымен жолақшаның ортасына «ирексу» өрнегін қалай сызу керектігін түсіндіреді. Бұдан кейін балалар тапсырманы орындауға кіріседі.
Сергіту сәті:
Ал, балалар, тұрайық,
Ою-өрнек сызайық.
«Түйетабан», «ботакөз»,
«Қой ізі» мен «қос мүйіз»,
«Бүршік» пен «гүл» әдемі,
Ою-өрнек әлемі.
Қылқаламды алайық,
Сәнді өрнек салайық.
Балаларға дайын үлгілерді таратады. Қатырмақағаздан жасалған сұлбаны дайын бояуға батырып, үлгідегі жолақшаның төрт бұрышына сұлбаның бейнесін түсіреді.
Өлең сөздеріне сәйкес қимылдар жасайды
Рефлекциялық - түзетушілік
Дайын болған жұмыстарға талдау жасап, сәтті шыққан жұмыстар мадақталады.
Тәрбиеші балалармен бірге тыныс алу жаттығуларын жасайды.
Балалар өздері жасаған жұмысты талдап, ұнаған суреттерін айтады. Тыныс алу жаттығуларын екі-үш рет қайталайды.
Күтілетін нәтиже: Біледі: қазақтың ұлттық ою-өрнектерін. Игереді: «ирексу», «қой ізі» ою-өрнек элементтерін. Меңгереді: қылқаламмен ирек сызықты түсіруді, біркелкі бояуды.
