«Жалауша»

«Жалауша»

Мақсаты: балаларды Отан сүйгіштікке баулу,өз еліне,жеріне патриоттық сезімін ояту.Отанға деген сүйіспеншілігін арттыру,қол моторикасын дамыту.

Қазақстан Республикасының Әнұраны орындалады.

Балалармен шаттық шеңберін құру.

Арайлап таң атты,

Алтын сәуле таратты.

Жарқырайды қаламыз,

Жарқырайды даламыз.

Жайнай түсті даламыз,

Қайырлы таң, достарым!

Тәрбиеші: Балалар,Қазақстан -біздің Отанымыз.Отан дегеніміз еліміз,жеріміз,туған туыс-бауырымыз,ауыл-қаламыз,өзіміз өсіп-өнген жеріміз.Біз Отанымызды жақсы көреміз бе?Биыл біздің еліміздің тәуелсіздік алғанына 25 жыл толып отыр.Балалар,сонымен қатар әрбір егеменді елдің өзінің мемлекеттік рәміздері болады.Олар: Әнұран,Елтаңба,Ту.

Тәрбиеші: Балалар, біз қай мемлекетте тұрамыз?

Балалар: Қазақстанда

Тәрбиеші:Біз қандай ұлтпыз?

Балалар: қазақпыз

Тәрбиеші: Ал,біз қандай тілде сөйлейміз?

Балалар: қазақ тілінде

Тәрбиеші: Біздің тәуелсіздік алғанымызға неше жыл толды?

Балалар: 25 жыл

Тәрбиеші: Балалар,біз Отанымызға ,Туымызға арнап қандай тақпақтар білеміз?

Жаннұр: Құт-береке шаңырақ,

Орын алған ол төрден.

Қанатты қос арғымақ,

Екі жақты көмкерген.

Сымбат Қ.: Айнымайды аспаннан,

Біздің тудың бояуы.

Оны халық қадірлеп,

Биікке іліп қояды.

Исламбек: Тәуелсіздік жанында

Талай-талай тер тамған.

Билігіміз қолында

Еркіндігіміз-Елтаңбам.

Қуаныш: Отан менің ата-анам,

Отан-досым,бауырым.

Отан-өлкем,Астанам.

Отан-туған,ауылым.

Ақнұр: Ел ордасы Астанам,

Саған айтам асқақ ән.

Әрқашанда қазақ боп,

Туғаныма мақтанам.

Алихан Т: Туымызға көгілдір

Бір қарамай өтпейміз

Сол көк тудың астында

Көгереміз,көктейміз.

Жәңгір: Әнұраным-жан ұраным,

Айтар әнім,сөйлер сөзім.

Туған жерім сағынарым,

Мәңгі бақи шырқалады,

Республика Әнұраны.

Балалар кім мақал-мәтелдер айтады?

1.Отансыз адам - ормансыз бұлбұл.

2.Отан -елдің анасы.

3.Отан- алтын бесік.

4.Отан оттан да ыстық.

5.Отансыз дүние бос.

Тәрбиеші: Жарайсыңдар балалар.

Балалардың назарын тақтаға аудару.

Қазақстан Мемлекеттік Туына сипаттама беру.

Тәрбиеші:-Тудың түсі қандай?

Балалар: Көк

Тәрбиеші.Пішіні қандай?

Балалар:Тіктөртбұрышты

-Тудың бетінде ненің суреті бейнеленген?

-Күн,қыран құс,ою.

Тәрбиеші жалауды бояудың әдіс-тәсілін көрсетеді.

Балалар ақ парақтағы жалауды бояуға кіріседі.

Тосын сәт: Қолында домбырасы бар әндете Алдар көсе кіреді.

«Мен Алдармын,Алдармын

Сақалымды талдырамын.

Сақал түгіл мұрт та жоқ,

Сендерді де алдармын».

Тәрбиеші: -Сәлеметсіз бе,Алдар ата!Қайдан жүрсіз?

Алдар Көсе: -Ассалаумалейкум,жамағат,сүйікті балалар!Мен ел аралап жүрген жайым бар,балалардың дауыстарын естіп,осында бұрылдым.Сендердің өнерлерің,білімдерің қандай екен деп келдім.Сендермен ойын ойнап,көңіл көтерсем бе деймін.

Тәрбиеші: Жарайды,Алдар Ата,ойын ойнаңыз онда,балалармен!

«Доппен ойын»

Шарты: жүргізуші әр балаға допты лақтыра отырып,сұрақтар қояды.Допты қағып алған бала жауап береді.Жауап бере алмаса айыбын тақпақ,өлең айтып айыбын өтейді.

Балалар Алдармен ойын ойнайды,сұрақтарға жауап береді.

-Біз қандай елде тұрамыз?

-Еліміздің Президенті кім?

-Рәміздерді ата?

-Біз қай тілде сөйлейміз?

-Ұлтымыз қандай?

-Біздің ауылымыз қалай аталады?

Алдар Көсе: -Жарайсыңдар,балалар!Білімді екенсіңдер!Сендер мені қуантып тастадыңдар!Ал,мен рұқсат болса кетейін,тағы аралайтын жерлерім бар,сау болыңдар,балалар!

Балалар Алдар көсемен қоштасып шығып кетеді.

Сергіту сәтін жасау. Жоғары қарап күн көрдім

Төмен қарап жер көрдім.

Оңға қарай бұрылып,

Солға қарай бұрылып

Егеменді ел көрдім.

Ұйымдастырылған оқу-іс әрекетін балаларға сұрақтар беру арқылы қорытындылау.

-Балалар,теледидардан кімді көрдік?

-Н.Ә.Назарбаев

-Біз ненің суретін көрдік?

-Елтаңбаның,Тудың.

-Тудың пішіні қандай,түсі қандай?

Балаларды бүгінгі іс-әрекеті үшін мақтау сөздер айтып,мадақтау.