Мустакиллик меъёрлари

РЕСПУБЛИКА МАЪНАВИЯТ ВА МАЪРИФАТ КЕНГАШИ

МИЛЛИЙ ҒОЯ ВА МАФКУРА ИЛМИЙ-АМАЛИЙ МАРКАЗИ

МУСТАҚИЛЛИК МЕЪМОРИ ҲАҚИДА

Ўзбекистон Республикаси Вазирлар Маҳкамасининг 2017 йил 12 январдаги 3-сонли баёни

Бугун биз халқимизни ишонтириб, баланд овоз билан айтишимиз зарурки, буюк устозимизнинг сиёсий мероси, яъни у киши белгилаб берган тараққиётимизнинг асосий тамойиллари, устувор йўналишлар, мақсад ва вазифаларни сўзсиз ва тўлиқ амалга ошириш биз учун ҳам қарз, ҳам фарздир.

Шавкат МИРЗИЁЕВ

Мустақил Ўзбекистоннинг Биринчи Президенти, истиқлол меъмори Ислом Абдуғаниевич Каримов замонамизнинг улуғ сиёсатчиси, Ватанимиз равнақи, юртимиз тинчлиги, халқимиз фаровонлигига улкан ҳисса қўшган шахс сифатида халқимиз қалбидла, юртимиз тарихида мангу сақланиб қолади. Муҳтарам Президентимиз Шавкат Мирзиёев таъбири билан айтганда, вақт ва ҳаётнинг ўзи Ислом Каримовнинг узоқни кўрадиган ва стратегик фикр юритадиган шахс, дунёда ва турли минтақаларда юз бераётган ўта мураккаб воқеа-ҳодисаларнинг моҳиятини давлатчилик нуқтаи назаридан кўра билиш қобилиятига эга бўлган, ўз юрти ва халқи учун, ҳар бир ватандошимизнинг тақдири учун улкан масъулият туйғусини чуқур ҳис қиладиган атоқли раҳбар эканини ҳар томонлама тасдиқлади.

Ўзбекистон Республикасининг Биринчи Президенти, Ўзбекистон давлатининг асосчиси Ислом Абдуғаниевич Каримов агар ҳаёт бўлганида шу йилнинг 30 январида 79 ёшга кирган бўлар эди. Унинг ватанимиз равнақи, юртимиз тинчлиги, халқимиз фаровонлигига қўшган улкан ҳиссаси, у кишининг сермазмун ҳаёти ва фаолиятининг ёш авлод тарбиясида тутган ўрни ва аҳамиятини инобатга олиб, ушбу санани улуғ халқимиз байрами сифатида нишонлаш, шубҳасиз, Ислом Каримовнинг руҳини шод этади. Қуйидаги материаллар мустақил Ўзбекистоннинг Биринчи Президенти Ислом Каримовнинг фаолияти, бой сиёсий меросининг баъзи қирралари ҳақида маълумот беради.

Шавкат Мирзиёев 2016 йил 20 октябрда бўлиб ўтган Тадбиркорлар ва ишбилармонлар ҳаракати – Ўзбекистон либерал-демократик партиясининг VIII съездидаги “Демократик ислоҳотларни изчил давом эттириш, халқимиз учун тинч ва осойишта, муносиб ҳаёт даражасини яратиш – барқарор тараққиёт кафолатидир” номли маърузасидан:

“ Замонамизнинг буюк давлат арбоби, мамлакатимиз ва халқимизнинг тақдири, бахту саодати йўлида ўз ҳаётини бағишлаган улуғ Йўлбошчимиз, Ислом Абдуғаниевич Каримовнинг вафоти барчамиз учун ўрнини тўлдириб бўлмайдиган оғир жудолик бўлди.

Бутун дунёда таҳликали вазият, миллатлараро тўқнашувлар, сиёсий ва иқтисодий инқирозлар ҳамда турли хавф-хатарлар авж олган даврда Ислом Каримовнинг мамлакатимизга раҳбарлик қилгани Яратганнинг халқимизга кўрсатган бебаҳо марҳамати бўлди.

Муҳтарам Ислом Абдуғаниевичнинг босиб ўтган умр йўллари, мустақиллигимизни ҳимоя қилиш ва мустаҳкамлаш борасидаги тарихий хизматлари барчамиз учун, шу жумладан, мен учун ҳам энг ёрқин ибрат намунаси ва катта ҳаёт мактаби бўлиб қолади.

Буюк устозимизнинг сиёсий мероси, у киши белгилаб берган тараққиётимизнинг асосий тамойиллари, устувор йўналишлар, мақсад ва вазифаларни сўзсиз ва тўлиқ амалга ошириш – биз учун ҳам қарз, ҳам фарздир.

Бу улкан масъулиятни чуқур ҳис этган ҳолда, азиз Юртбошимиз Ислом Абдуғаниевич Каримовнинг ғояларини амалга ошириш, мамлакатимизда олиб борилаётган давлат сиёсатини изчил давом эттириш, олдимизда турган стратегик вазифаларни оғишмай бажаришни халқимиз олдидаги ўзимнинг асосий бурчим деб биламан”.

Шавкат Мирзиёевнинг Ўзбекистон Республикаси Конституцияси қабул қилинганининг 24 йиллигига бағишланган тантанали маросимдаги маърузаларида шундай келтирилади:

1992 йил 8 декабрда мустақил Ўзбекистонимиз Конституциясининг қабул қилиниши мамлакатимиз ҳаётида муҳим тарихий воқеа бўлди.

Конституциянинг яратилиши ва ҳаётимизга татбиқ этилишида замонамизнинг буюк давлат арбоби, улуғ йўлбошчимиз, муҳтарам Ислом Абдуғаниевич Каримовнинг хизмати беқиёс эканини барчамиз яхши биламиз.

Халқимизнинг онгу тафаккури, дунёқараши ва бутун ҳаётини тубдан ўзгартирган ушбу муҳим сиёсий ҳужжатни ишлаб чиқишда Ислом Абдуғаниевичнинг концептуал аҳамиятга эга, теран фикрлари мустаҳкам замин бўлди.

Олий Кенгаш депутати сифатида мен ҳам Конституциявий комиссия таркибида Бош қомусимизни яратиш ва қабул қилиш жараёнида бевосита иштирок этганимни доимо фахрланиб эслайман. Конституциямизнинг қандай қилиб ҳозирги мазмун ва шаклга келгани, бу мураккаб жараёнда кечган қизғин тортишув ва баҳс-мунозаралар бугунгидек ёдимда.

Шавкат Мирзиёевнинг Ўзбекистон Республикаси Президенти лавозимига киришиш тантанали маросимига бағишланган Олий Мажлис палаталарининг қўшма мажлисидаги “Эркин ва фаровон, демократик Ўзбекистон давлатини мард ва олижаноб халқимиз билан бирга қурамиз” номли маърузаларида:

Бугун мен Ўзбекистон Республикаси Президенти вазифасини бажаришга киришар эканман, буюк давлат ва сиёсат арбоби, азиз устозимиз Ислом Каримовнинг ишларини давом эттирган ҳолда, 32 миллионлик катта халқ, катта мамлакатни бошқариш қанчалик масъулиятли ва мураккаб эканини, давлат раҳбари сифатида зиммамдаги жуда улкан жавобгарликни ҳар томонлама чуқур ҳис қилиб, англаб турибман.

Биринчи Президентимиз ўзининг серқирра сиёсий фаолияти, олижаноб инсоний фазилатлари билан Ватанимизнинг кўп асрлик тарихида ўчмас ва ёрқин из қолдирди.

“ КЕЧА КИМ ЭДИГУ БУГУН КИМ БЎЛДИК, ЭРТАГА ҚАНДАЙ МАРРАЛАРНИ ЭГАЛЛАЙМИЗ?”

1989 йил . Собиқ марказ томонидан сунъий равишда тиқиштирилган “Қайта қуриш”, “жадаллаштириш” жараёнлари аслида илмий асосга, пухта-пишиқ дастурга эга бўлмагани учун халқ томонидан қўллаб-қувватланмади. Миллатлараро муносабатлар тобора кескинлаша бошлади, аҳолининг иқтисодий аҳволи кескин даражада ёмонлаша борди, норозиликлар кучайди. Кишилар иккита нарсанинг ғамида яшай бошладилар: бири – қоринни тўйғизиш ғами, иккинчиси – Ўзбекистонда барқарор тинчликни таъминлаш.

2015 йил. Қўлимизда Ислом Каримовнинг “Она юртимиз бахту иқболи ва буюк келажаги йўлида хизмат қилиш – энг олий саодатдир” деб номланган китоби. Ўзбекистон Республикасининг Биринчи Президенти Ислом Каримовнинг барча асарлари, хусусан, махсус китоб тарзида битилган “Ўзбекистоннинг ўз истиқлол ва тараққиёт йўли” (1992), “Ўзбекистон – бозор иқтисодиётига ўтишнинг ўзига хос йўли” (1993), “Ўзбекистон иқтисодий ислоҳотларни чуқурлаштириш йўлида” (1995), “Ўзбекистон XXI аср бўсағасида: хавфсизликка таҳдид, барқарорлик шартлари ва тараққиёт кафолатлари” (1997), “Юксак маънавият – енгилмас куч” (2008), шунингдек, 2011 йилда нашр этилган “Ўзбекистон мустақилликка эришиш остонасида” асарлари қатори юқорида номи келтирилган янги асар ҳам нашр этилди.

Китобдаги ўта жиддий аҳамиятга эга ва бир-бири билан узвий боғлиқ қуйидаги атамалар эътибор лойиқ: Мустақиллик, Ватан, Миллат қайғуси, дахлдорлик, тинчлик, омонлик, Миллий тикланиш Шукроналик. Китобхон диққатини тортадиган яна бир муҳим жиҳат борки, у ҳам бўлса, юқоридаги масалаларнинг “Ким эдигу ким бўлдик? Эртага ким бўлишимиз, қандай янги марраларни эгаллашимиз керак?” деган фикр асосида таҳлил этилганидир. Ягона тўғри йўлни танлаш масъулияти ҳаммага ҳам берилавермайди. Қолаверса, бундай масъулиятни ўз бўйнига олган ҳар қандай лидердан кучли билим, эътиқод, мақсадга эришиш сари собитқадамлик, воқеа-ҳодисаларни илмий жиҳатдан тўғри таҳлил қила олиш кўникмаси талаб этилади. Шу ўринда буюк бобомиз Мир Алишер Навоийнинг қуйидаги фикрларини баён этиш лозим: “Мамлакат бадан бўлса, подшоҳ – унинг жони ва бадан бир мулк бўлса, кўнгил – унинг султони”. Бир ижтимоий-сиёсий тузумдан бошқасига ўтиш шароитида барча масъулиятни ўз зиммасига олган давлат раҳбари том маънода мамлакат шаъни ва жонига айланиши мумкин

• Китобнинг мазмун-моҳиятида “Кеча ким эдигу бугун ким бўлдик”, тараққиётнинг халқаро ҳамжамиятда, фуқароларимиз томонидан тан олинган “Ўзбек модели”нинг том маънолари нималардан иборат, деган саволларга жавоб топгандек бўламиз. Ана шу саволларга китобда берилган жавобларнинг айримлари хусусида тўхталсак:
• - КЕЧА ёлғон “изм” лар асосида сунъий равишда “барпо этилган” том маънода маъмурий буйруқбозликка асосланган, маърифатли дунёнинг кўплаб мамлакатлари томонидан тан олинмаган, ўзининг замонавий давлатчилик тузумига эга бўлмаган “давлат” эдик. БУГУН эса мамлакатимизда унинг Биринчи Президенти Ислом Каримовнинг бевосита раҳнамолигида демократик ислоҳотлар янада чуқурлаштирилди ва фуқаролик жамиятини ривожлантириш кучли илмий жиҳатдан асосланди, концепциясига эга бўлди ва унга қатъий амал қилиб келанаётир. Биз бугун дунёнинг кўплаб мамлакатлари, халқаро ташкилотлари томонидан тан олинган суверен Ўзбекистонмиз.

• - КЕЧА иқтисодиёти бирёқлама “ривожланган”, пахта яккаҳокимлиги ҳалокатли тус олган, пахта етиштириш энг катта мақсад саналиб, ҳатто одамлар ҳаёти ва саломатлигидан устун турган, 6 миллион тонна пахта етиштириш режасини бўйнига бўйинтуруқ қилиб осиб олган, фақат томларимиздагина пахта экилмай қолган халқ эдик. БУГУН эса бирёқлама ривожланган ночор иқтисодиётдан, “шок терапияси” каби номақбул моделлардан бутунлай воз кечиб, машҳур беш тамойилга асосланган “ўз тараққиёт йўлини танлаб олган, дунёда “ўзбек модели” сифатида эътироф этилган ривожланиш стратегиясига, тез ривожланиб бораётган саноат индустриясига эга, кейинга ўн йил давомида ялпи ички маҳсулоти йилига 8 фоиздан кам бўлмаган ҳолда ривожланиб келаётган, рақобатбардош экспорт товарлари ишлаб чиқараётган, биз учун янги бўлган автомобилсозлик, нефть ва газ кимёси, юқори технологияларга асосланган озиқ-овқат, тўқимачилик саноати каби соҳа ва тармоқларга эга мамалакатга айландик.

• - КЕЧА ижтимоий ҳаётимиз тўлиқ сиёсий тус олган, устуворлик фақат сиёсий-мафкуравий жиҳатларга қаратилган, Ленин бобо, Сталини бобо ва бошқа “бобо”ларимизнинг бизни бахтли қилиш йўлидаги “хизматлари”дан миннатдорчилик руҳи билан йўғрилган қўшиқлар куйланган, ҳеч қандай ғояга асосланмаган, ёлғон мафкурани тарғиб этган “октябрят”, “комсомол” тамғаларига эга бўлган, комсомол бўлмасанг, партияга кирмайсан, партияга кирмасанг, ҳеч қандай вазифада ишлай олмайсан, деган қараш ҳукмрон бўлган, ўзининг миллий қаҳрамонлари, жаҳон цивилизациясига улкан ҳисса қўшган маърифатпарвар, алломаларини тан олмасликка маҳкум этилган халқ эдик. БУГУН эса ўз аждодлари, боболаридан фахрланадиган, улардан руҳий қувват оладиган, Ўрта асрлар Шарқининг математика, астрономия, тиббиёт, кимё, геология, адабиёт, тилшунослик, мусиқа илмини ривожлантирган боболарининг ишларини давом эттиришдан фахр туядиган ва ўшанга шай, дунёнинг атоқли олимларнинг ҳайратидан ўзи ҳайратга тушган ўзбекмиз.

- КЕЧА миллий маданияти, урф-одатлари, анъаналари, дини таъқиб остига олинган, сохта “Совет маданияти”га ишонган, ўз маданияти ва санъати орқали собиқ совет тузумини улуғлаган, кўнгли тўлиб маънавий қувват олишдан маҳрум бўлган, мустақиллик, эрк ғоялари учун отиб ташланган минг-минглаб миллат гулларини эслаш, ёд этишдан жудо қилинган, жаҳон андозаларига мос билим олишдан кўра, дипломлар олишга қизиқтирилган, минглаб авария ҳолатларидаги таълим, маданият муассасаларига “эга” эдик. БУГУН эса маънавият-марифат давлат сиёсатининг устувор йўналишига эга, “Озод ва обод юртда яшайдиган, янгича фикрлайдиган одамларнинг ўйлари ҳам, уларнинг ҳаёти, турмуши ҳам гўзал ва фаровон бўлиши керак”, деган юксак баҳога сазовор, жамиятни соғломлаштиришни, мамлакатни обод қилишни “кўнгилдан бошлаган”, замонавий, жаҳон андозаларига мос таълим, соғлиқни сақлаш, маданият, маиший хизмат муассасаларига эга, бутун мамлакатнинг барча шаҳар ва қишлоқлари, ҳатто энг чекка жойларида ҳам катта-катта ўзгаришлар бўлаётган, фуқароларимиз фаровон яшашини таъминлаш давлат сиёсатининг муҳим жабҳасига айланган давлатмиз.

КЕЧА диний қадриятларимиз топталган, диний байрамларимиз тақиқланган, масжидларимиз омборхона, отхона, машина сақлаш жойлари айлантирилган, бутун совет тузуми даврида атиги 173 нафар юртдошимиз ҳаж сафарига муносиб бўлган, “дин – афюн”, деб эълон қилинган мамлакатда яшовчилар эдик. Бугун эса, муқаддас ислом динимиз тикланган, уни пок сақлаш, турли хил ғаразли хуруж ва ҳамлалардан, туҳмат ва бўҳтонлардан ҳимоя қила оладиган, ислом дининг асл моҳиятини униб-ўсиб келаётган ёш авлодга тўғри тушунтира оладиган, Имом Бухорий, Абу Исо ибн Муҳаммад Исо Термизий, Имом Мотуридий, Бурҳониддин Марғиноний, Абдухолиқ Ғиждувоний, Баҳоуддин Нақшбанд каби алломалар асарларини ўқиш, улардан ибрат олиш имконига эга бўлган, нуфузли халқаро ташкилот бўлмиш Ислом конференцияси ташкилотининг таълим, фан ва маданият масалалари бўйича тузилмаси – АЙСЕСКО томонидан Тошкент шаҳрининг 2007 йилда “Ислом маданияти пойтахти” деб эълон қилинишидан фахрлана оладиган, йилига 5200 нафардан ортиқ фуқароларимиз муборак ҳаж сафарига, яна 6000 ватандошларимиз умра ибодатини амалга ошириш имконига эга мамлакатга айландик.

- КЕЧА ижтимоий муаммолар тўлиб-тошиб ётган, колхозчилар қўлига ҳар ойда 42 сўм пул оладиган, энг аввало, қишлоқ аҳолиси ўта қийналган, ер муаммоси ҳал этилмаган, бутун совет ҳокимияти йиллари қишлоқ аҳолисига жами 300 минг гектарга яқин ер томорқа сифатида берилган, қишлоқ инфратузилмаси тўлиқ ишдан чиққан, гувала уйларда яшашга маҳкум этилган ночор кишилар эдик. БУГУН қишлоқ хўжалигидаги ислоҳотларни чуқурлаштириш, фермерлик ҳаракатини қўллаб-қувватлаш, моддий ва молиявий базасини мустаҳкамлаш, уларга янада кенг йўл очиб бериш, бу борада янги имтиёз ва имкониятларни туғдириш, қишлоқда пайдо бўлаётган мулкий муносабатларни, янги ўрта синф вакиллари – мулкдорлар, тадбиркор ва ишбилармонларнинг манфаатларини ҳимоялаш бўйича пухта ўйланган илмий асосланган дастурга, қишлоқ жойларида йилига 10 мингдан ортиқ намунавий лойиҳалар асосида қурилаётган замонавий уй-жойларга эга мамлакат ҳисобланамиз.

“ Она юртимиз бахту иқболи ва буюк келажаги йўлида хизмат қилиш – энг олий саодатдир” китоби, дарҳақиқат, бизнинг кечаги ва бугунги кунимизни ёрқин кўрсатиб берадиган, хулосалар чиқаришга қўмаклашадиган асар ҳисобланади. Китобда келтирилган ҳар бир фикр-мулоҳаза ўқувчини ишонтира олади. Чунки китобда берилган рақамлар, баён этилган мулоҳазаю хулосалар бизнинг кўз олдимизда, замондошларимиз иштирокида содир бўлмоқда. Бошқача сўз билан айтганда, китобда бугунги Ўзбекистон фуқаролари – олиму мутахассислар, фермерлару ишбилармон, тадбиркорлар, жамиятнинг барча қатламларининг фидокорона меҳнатлари, ижодлари ўз аксини топган. Шунга кўра, китоб қаҳрамони – Ўзбекистон фуқаролари, дейиш мумкин.

Шу билан бирга, китоб биз учун айрим нохуш ҳолатлардан сақлаш йўлидаги саъй-ҳаракати билан ҳам қадрлидир. Жумладан, ҳозирги пайтда собиқ СССР таркибига кирган айрим мамлакатларда уни яна қайтадан тиклаш, совет даврини қўмсаш кайфияти мавжудлигига алоҳида эътибор берилади. Шу ўринда, айрим мамлакатларда барча соҳалардаги ислоҳотларнинг равон кетмаётгани, катта-кичик раҳбарларнинг мамлакат ва миллат олдидаги масъулиятсизлиги – буларнинг бари баъзи фуқароларда, сиёсий ташкилотларда яна эски тузумга қайтиш кайфияти билан уйғунлашиб бораётганига эътибор қаратилади.

ИСЛОМ КАРИМОВ ВА ЎЗБЕКИСТОННИНГ ТИНЧЛИКПАРВАР СИЁСАТИ

Ислом Каримов Ўзбекистон Республикаси Президенти сифатида иш бошлаган биринчи кунданоқ тинчлик масаласини давлат сиёсати даражасига кўтарди. Бунда асосий эътибор ички ва ташқи, яъни яхши қўшничилик ва дунё мамлакатлари билан тенг ижтимоий, иқтисодий, сиёсий, маънавий ва маданий ҳамкорлик ришталарини боғлашга қаратилди. Энг муҳими, Ўзбекистон фарзандлари бирор ҳар бий ҳаракатларда иштирок этмаслиги, ўзга юртларда хизмат қилмаслиги, энг муҳими, фақат ўз юрти сарҳадларини ҳимоя қилиши алоҳида таъкидланди ва бунга оғишмай амал қилиб келинмоқда.

Юрт тинчлиги фақат назария эмас. Ушбу ғоя – халқимизнинг асрлар давомида яратгандан, илтижо қилиб, истаб келган қадрият. Тан олиш лозимки, мустабид тузум шароитида, том маънодаги тинчлик, хотиржамликка эришиш имкони бўлмади. Ҳукмрон мафкуравий сиёсат натижасида қарийб 73 йил ўзбек халқи бошига турли зуғумлар ёғдирилди.

• Мустақилликнинг дастлабки куниданоқ ўзбек халқи мамлакат раҳбарияти олдига ҳақли талаб қўйди: тинчлик ва хотиржамликсиз бирор соҳага ютуқ ва муваффақиятларга эришиш мумкин эмас. Юрт тинчлиги ғояси – халқимизнинг асрий орзуси. Ўзбекистон Республикасининг биринчи Президенти Ислом Каримов буни аллақачон англаб етган эди: “Мамлакат катта фалокат ёқасига, жар ёқасига келиб қолганини кўриб турибмиз. Халқ эртанги кунга бўлган ишончини кундан-кунга йўқотяпти. Одамлар ўзининг, оиласининг, бола чақасининг тинчлигига кафолат истайди. Тўкис хотиржам ҳаёт талаб қиляпти. Бу истаклар, бу талаблар сафсатабозлик ва вадабозликлар остида кўмилиб кетяпти.
• Бизнинг халқимиз сабр-бардош, яхшилик, осойишталик, бошқа халқларга нисбатан хайрихоҳлик руҳида тарбияланган. Бу халқ бугун биздан ҳимоя талаб қиляпти, тинч-тотув ҳаёт, оғир меҳнатига яраша турмуш шароитлари талаб қиляпти. Бу ҳаққоний талабдир”.

Мана шу фикрлар асосида юрт тинчлиги ғоясининг асосий меъзонлари ишлаб чиқилди. Улар қуйидагилардан иборат эди:

Сабр-бардош, яхшилик, осойишталик – ўзбек халқига хос хислат.

Унинг учун энг олий қадрият – тинчлик.

Ўзбек миллий ҳарактеридаги энг олий жиҳат – унинг бошқа халқларга нисбатан хайрихоҳлиги.

Ўзбек халқи нафақат ўзининг, айни пайтда оиласининг, бола-чақасининг, бутун жамиятнинг тинчлигини истайди.

Бу халқ мамлакат раҳбариятидан ҳаққоний тарзда ҳимоя талаб қиляпти, ўзининг тинч-тотув, оғир меҳнатига яраша ҳимоя тизимининг кафолатини сўрамоқда.

Конституциянинг 17-модда сида тинчлик ғояси ўзининг мукаммал ифодасини топган: Ўзбекистон Республикаси халқаро муносабатларнинг тўла ҳуқуқли субъектидир. Унинг ташқи сиёсати давлатларнинг суверен тенглиги, куч ишлатмаслик ва куч билан таҳдид қилмаслик, чегаралар дахлсизлиги, низоларни тинч йўл билан ҳал этиш, бошқа давлатларнинг ички ишларига аралашмаслик қоидаларига ва халқаро ҳуқуқнинг умумэътироф этилган қоидалари ва нормаларига асосланади.

Республика давлатнинг, халқнинг олий манфаатлари, фаровонлиги ва хавфсизлигини таъминлаш мақсадида иттифоқлар тузиши, ҳамдўстликларга ва бошқа давлатлараро тузилмаларга кириши ва улардан ажралиб чиқиши мумкин.

Мамлакатимизда юрт тинчлиги ғоясини амалга жориш этишга алоҳида аҳамият берилди, жаҳон ҳамжамияти билан алоқаларни йўлга қўйиш учун ташқи сиёсий фаолиятнинг миллий механизмлари яратилди. 1944 йилда ташкил этилган Ташқи ишлар вазирлиги фаолияти тубдан ислоҳ қилинди. 1992 йил Ташқи иқтисодий алоқалар вазирлиги, 1991 йил Ташқи иқтисодий фаолият банки ташкил этилди. Кадрлар тайёрлаш миллий дастури асосида дипломатия, халқаро ҳуқуқ ва ташқи иқтисодий фаолият соҳасида малакали кадрлар тайёрлаш давлат тизими яратилди, Ташқи иқтисодий ва сиёсий фааолиятни тартибга солувчи “Чет эл инвестициялари тўғрисида”ги (1998), “Ўзбекистон ташқи иқтисодий фаолияти тўғрисида”ги(2000), “Ўзбекистон Республикаси ташқи сиёсий фаолиятининг асосий принциплари тўғрисида”ги (1996), “Ўзбекистон Республикасининг халқаро шартномалари тўғрисида”ги (1995) Қонунлар, Консуллик устави, Ўзбекистон Республикаси Ҳарбий доктринаси, Ўзбекистон Республикасининг Миллий хавфсизлик концепцияси (1997) каби муҳим ҳужжатлар қабул қилинди. Мамлакатимизнинг жаҳондаги энг нуфузли халқаро ташкилот – Бирлашган Миллатлар Ташкилотига (1992 йил 2 март) аъзо бўлиши Ўзбекистоннинг жаҳон ҳамжамиятига қўшилишида муҳим ўринга эга бўлди. Мамлакатимиз жаҳон ҳамжамиятининг тўла, тенг ҳуқуқли аъзоси бўлди.

Ислом Каримовнинг БМТ Бош Ассамблеясининг 1993 йилда бўлган 48-сессиясида иштирок этиши ва унда 27 сентябрда қилган маърузаси Ўзбекистонни жаҳонга кўҳна ва навқирон давлат сифатида намоён этди. Ўзбекистон Республикаси номидан Марказий Осиёда хавфсизлик, барқарорлик ва ҳамкорлик масалалари бўйича БМТнинг Тошкентда доимий ишловчи семинарини чақириш, наркобизнесга қарши курашни кучайтириш, Орол муаммосини ҳал этиш ва бошқа масалалар бўйича бир қатор таклифларни ўртага қўйди .

БМТ Бош котиби Пан Ги Муннинг 2010 йилда мамлакатимизга ташрифи давомида Ўзбекистон ташаббуси билан ШҲТ ва БМТ котибиятлари ўртасида ҳамкорлик тўғрисида қўшма декларация қабул қилинди.

2016 йилнинг 23-24 июнь кунлари Тошкент ШҲТга аъзо мамлакатлар Давлат раҳбарларининг 15 юбилей саммити бўлиб ўтди. Саммит якунида ШҲТ ўн беш йиллигининг Тошкент Декларацияси, ШҲТнинг 2025 йилгача ривожланиш стратегиясини амалга ошириш бўйича 2016-2020 йилларга мўлжалланган ҳаракатлар режасини тасдиқлаш тўғрисидаги қарор, ШҲТга аъзо давлатларнинг туризм соҳасидаги ҳамкорлигини ривожлантириш дастури ва бошқа ҳужжатлар имзоланди.

ИСЛОМ КАРИМОВ “ЎЗБЕК МОДЕЛИ” АСОСЧИСИ СИФАТИДА

• 1990 йил 20 июнда “Ўзбекистоннинг Мустақиллик Декларацияси” ва 1991 йилнинг 31 августида "Ўзбекистон Республикасининг Давлат мустақиллиги асослари тўғрисида”ги Қонун қабул қилинди. 1991 йил 31 август тарихий санасидан эьтиборан ўз мустақиллигини қўлга киритган Ўзбекистон тенглар ичра тенг бўлиб, суверен демократик республика сифатида мустақил ички ва ташқи сиёсатини юрита бошлади. Шу билан бирга ўз байроғимиз, гербимиз, она тилимиз, миллий мадҳиямиз, миллий валютамиз, миллий армиямиз ва Конституциямизга эга бўлдик. Буларнинг барчаси Биринчи Президентимиз томонидан ишлаб чиқилган “Тараққиётнинг ўзбек модели” ва машҳур беш тамойил асосида амалга оширилаётган ишларнинг намоёнидир.

Машҳур беш тамойилга – иқтисодиётнинг сиёсатдан устуворлиги, давлат – бош ислоҳотчи, қонун устуворлиги, кучли ижтимоий сиёсат юритиш, бозор иқтисодиётига босқичма-босқич ўтишга асосланган ана шу модель бозор муносабатларига асосланган ҳуқуқий демократик давлат қуриш стратегияси сифатида барча амалий ишларимизнинг мустаҳкам пойдевори, тараққиётимизнинг асосий ҳаракатлантирувчи кучига айланди.

Ҳеч бир муболағасиз айтиш мумкинки, бу стратегия бозор иқтисодиёти назарияларини янада бойитди, ўтиш даврини бошидан кечираётган давлатлар учун яна бир намунага айланди.

Бу моделнинг барча синовдан муваффақиятли ўтишига сабаб бўлган омиллари кўп. Уларнинг энг асосийси иқтисодий, сиёсий ва ижтимоий ислоҳотларни амалга оширишда турли хил сакрашларсиз, яъни инқилобий йўлдан эмас, балки тадрижий ривожланиш йўлидан бориш тамойилидир.

ИСЛОМ КАРИМОВ ВА ЁШЛАР

  “ Дунёда ҳеч бир нарса мамлакатни, миллатни спортчалик дунёга тез танитмайди, машҳур қила олмайди”

Ислом КАРИМОВ

Мамлакатимизнинг биринчи Президенти Ислом Каримов “Бизнинг ишончимиз ва таянчимиз бўлмиш ёшларимизга янада кенг йўл очиб бериш, фарзандларимизни замонавий билим ва тажрибага, ўз мустақил фикрига эга бўлган, маънавий юксак комил инсонлар этиб тарбиялаш, уларнинг жамиятмизда мустаҳкам ва муносиб жой олиши йўлида зарур шарт-шароитларни яратиб бериш барчамиз учун ҳам қарз, ҳам фарз” деб таъкидлаган.

1997 йилда қабул қилинган Кадрлар тайёрлаш миллий дастурига асосан амалга оширилган туб ўзгаришлар дунё ҳамжамияти томонидан ҳақли равишда эътироф этилмоқда. Бу борада мамлакатимизда кадрлар тайёрлашнинг ноёб тизими яратилди. Бугун 9+3 тамойили асосида 12 йиллик умумий мажбурий бепул таълим тизимига ўтилди ҳамда таълим тизимининг узлуксизлиги таъминланди.

Олий таълим муассасаларининг моддий-техник базасини модернизация қилиш ва мутахассислар тайёрлаш сифатини тубдан яхшилаш бўйича 2011-2016 йилларга мўлжалланган дастурни амалга ошириш учун 277 миллиард сўмдан ортиқ маблағ йўналтириш кўзда тутилган бўлиб, 2011 йилнинг ўзида 39 миллиард сўмдан ортиқ тадбирлар молиялаштирилган.

Мамлакатимизда таълим тизимини ривожлантириш ва унда инновацион технологияларни жорий этиш бўйича Ўзбекистон таълим соҳасидаги инновациялар кўрсаткичи бўйича 75,38 балл билан дунёда иккинчи ўринни эгаллаганлиги бу соҳада амалга оширилган ишларнинг ютуғи ҳамда кадрлар тайёрлаш тизими тўғри шакллантирилганлигидан далолат беради.

Бугунги кунда дунё юксак тараққий этаётган давлатлари қаторида Ўзбекистон тажрибаси қисқа вақт ичида таълим тизимида амалга оширилган ишларни “ўзбек таълим мўъжизаси” деб эътироф этса бўлади.

Кейинги ўн йил мобайнида ўзбек ўқувчиларнинг халқаро фан олимпиядаларида муносиб иштирок этиб, 150 дан зиёд олтин, кумуш ва бронза медалларни қўлга киритди, нуфузли санъат фестиваллари ва танловларида 670 дан ортиқ совринли ўринларни эгаллади.

“ Шуни унутмаслигимиз керакки, келажагимиз пойдевори билим даргоҳларида яратилади, бошқача айтганда, халқимизнинг эртанги куни қандай бўлиши фарзандларимизнинг бугун қандай таълим ва тарбия олишига боғлиқ”, деб таъкидлаган Ислом Каримов.

Бу хусусида маърифатпарвар бобомиз Абдулла Авлоний – “Тарбия биз учун ё ҳаёт – ё мамот, ё нажот – ё ҳалокат, ё саодат – ё фалокат масаласидир” деган чуқур маъноли сўзлари бугун ҳаёт фалсафамизга айланиши лозим.

Бразилияда бўлиб ўтган 31-Ёзги Олимпия ўйинлари мустақил Ўзбекистон тарихида медаллар жамғариш борасида рекорд натижа қайд этди. Спортчиларимиз 13 та медални қўлга киритишди. Шулардан 4 таси олтин, 2 та кумуш ва 7 таси бронза.

32 нафар спортчиларимиз Паралимпия ўйинларида 31 медални (8 та олтин, 6 та кумуш, 17 бронза) қўлга киритиб, умумжамоа ҳисобида 200 яқин иштирок этган давлатлар ўртасида 15-ўринни, Марказий Осиё давлатлари ўртасида 1-ўринни, МДҲ давлатлари ўртасида 2-ўрин, Осиё давлатлари ўртасида 2-ўрин қўлга киритди. Дзюдо спорт тури бўйича умумжамоа ҳисобида 1-ўринни эгаллашди.

ЭЪТИРОФ

Ўзбекистоннинг Биринчи Президенти Ислом Каримов фаолиятида ташқи сиёсий, мамлакатлар ва халқлар ўртасида ишончли ҳамкорликни ўрнатиш, халқаро эътироф этлган тамойил ва нормаларга амал қилиш доимо муҳим аҳамият касб этган. Бундай ҳамкорлик Ислом Каримовнинг сиёсий сергаклики, мафкуравий собитқадамлиги, дунёда содир бўлаётган воқеа-ҳодисаларни чуқур таҳлил қилиш ва ундан тўғри хулоса чиқариш каби амалиёт билан янада мустаҳкамланади. Дунёнинг йирик сиёсатчилари, давлат раҳбарлари, халқаро экспертлар Ислом Каримовнинг бу сифатларини доимо қадрладилар ва эътироф этдилар.

Муҳтарам Ислом Абдуғаниевич,

Россия ва Ўзбекистон ўртасидаги иттифоқчилик ва стратегик ҳамкорлик муносабатларини мустаҳкамлашда Сизнинг улкан шахсий ҳиссангиз борлигини алоҳида таъкидламоқчиман.

Владимир ПУТИН

Россия Федерацияси Президенти.

2015 йил 30 март

Эътиборингиз учун раҳмат!