Жыл басы Наурыз, мол болсын дәм – тұз

Бастауыш сыныптар

Жыл басы Наурыз, мол болсын дәм – тұз.

2 – жүргізуші:

Наурызым салтым жоғалып қайта табылған,

Шырағыым болып алдымнан қайта жабылған.

Бабамның үнін ақ бата беріп жеткізген

Әз қадамыңнан жаныма мейірім табылған.

1-жүргізуші:  Уа, ағайын! «Наурызым – бабамның сөзі, Наурызым – анамның сөзі, Ғасырдан ғасырға жеткен Даламның сөзі» демекші, тойды бастамас бұрын бата сұрап алайық:

Еламан

Сұрасаң бата берейін,

Үстем болсын мерейің!

Ықыласпен қол жайсаң,

Ақ тілекті төгейін.

Дастарханың мол болсын,

Абыройың зор болсын!

Өрендерің ер болсын,

Көре алмаған бағыңды,

Сындыра алмаған сағыңды

Бетін басып жер болсын!

Жарылқа, Алла, қабыл ет,

Жарылқаудың қамын ет!

Ізет, абырой, бақ-дәулет,

Қызыр қарап бақ қонып,

Жақсылық үшін қызмет ет!

1 – бала: Досымжан қарашы наурызек құс! Наурызек құс кепті. Алақай, көктем шықты!

2 – бала: Қайда Дильназ?! О, наурызек құс! Бұл құсты алғаш кім көрсе, сол бақытты!

1 – бала: Ендеше бәріміз бақыттымыз.

2 – бала: Мен әкемнен сүйінші сұрайын.

1 – бала: ендеше барлық елге айту керек.

(жүгіріп шығып кету)

Тыңдаңыздар, тыңдаңыздар!

Той дабылын қағып тұрған

Мұнда біз бар.

Қарсы алып жылдың басын той тойлайық,

Өнімді еңбек етпек ой ойлайық!

Наурыз келсе, құт келгені халайық!

Есік ашып, шашу шашып,

Ел болып қарсы алайық! (шашу шашылады)

Наурыз мерекесі қандай мереке? Мереке жайлы не білеміз? Кім айтады?

Бегайдар

Наурыз - көнеден келе жатқан мейрам. Парсы тілінде «нау» - жаңа, «роз» - күн деген сөз. Екеуі қосылып, «Жаңа күн » деген ұғымды білдіреді. 22 наурызда күн мен түні теңеледі, малдар төлдейді, адамдардың аузы аққа тиеді.

Дильназ

Халық түсінігі бойынша, 21 наурыз күні даланы Қыдыр аралайды. Сол себепті ол түн «Қыдыр түні» деп аталады. Қыдыр – адамдарға дәулет дарытып, бақ қондыратын ақсақал, ғажайып бейне. Ұлыс күнә еліміз үшін қасиетті, киелі саналған. Ол күні қар немесе жаңбыр жауса, «Нұр жауды» деп қуанған. Сол қарды «Наурызша» деп атайды.

Досымжан

Наурыз күні адамдар дастарқан жайып, таза киімдерін киіп, бір бірін құттықтайды. Ұйықтап қалған аңдар оянады. Ұлыс күні ұрысқан адамдар татуласып, біріне –бірі ерекше тілек айтып, бата беріп , бата алады.

Бегайдар, Досымжан

Көрініс : «Амандасу салты»

Ассалаумағалейкум !

Ұлыс оң болсын, ақ мол болсын!

Қайда барсаң жол болсын!

Уағалейкумассалам!

Ұлыс бақты болсын!

Төрт түлік ақты болсын!

Ұлыс береке берсін!

Пәле жала жерге енсін.

Даярлық

Мадина

Наурыз тойы тойланып,

Мәре сәре болды жұрт.

Дастарқанға салынды,

Ұлт тағамы ірімшік, құрт.

Алтыбақан құрылып,

Тербетілдік ырғалып.

Домбырамен ән салып,

Кезек кезек жырладық.

Нұрсұлтан.

Көктем келді күлімдеп,

Жұрт қуанды дүрілдеп.

Аспанда бұлт күркіреп,

Жаңбыр жауды сіркіреп.

Көкте құстар сайрады,

Жерде гүлдер жайнады.

Алақайлап балалар

Мәз болысып ойнады.

Мейіржан

Наурыз айы тамаша

Көңілдіміз бәріміз.

Мешін жылы жаңаша,

Арналады әніміз.

Ақсақалдар, әжелер

Ақ батасын береді.

Бар тіршілік оянып,

Күн жылынып келеді.

Исахан

Күн мен түн теңелді,

Жер шуаққа кенелді.

Қуанышта ел енді.

Наурыз келді салтымыз

«Көгерсін» деп халқымыз

Көшеге тал егеді.

Бибінұр

«Оң болсын , - деп ұлысың!»

Төс түйісіп көрісер.

Көжедегі ырысын

Көпшілікпен бөлісер.

Төс түйісу дегені

Тату болсын ел іші.

Бөліп ішу көжені

Тоқшылықтың белгісі.

Мирас

Наурыз тойы салтымыз

Аман болсын халқымыз.

Ұлыс оң болсын,

Ақ мол болсын!

Дильназ

Армысыздар, халайық!

Бармысыздар, халайық.

Наурыз тойын жұп жазбай,

Жылда қарсы алайық.

Өшкен шырақ жағылсын

Көктемнің әрбір ақ таңы,

Қуанышпен , жақсылықпен ашылсын!

Досымжан

Ашық болсын қас қабақ,

Таспен атқанды аспен ат.

Бейтаныс та , таныс та

Бүгін төрде бас қонақ.

Арпа, бидай, тары бар

Қатық , малта ағы бар.

Бұл көжеде бәрі бар.

Сұлтан

Наурыз жырын жырлаймыз,

Онымен де тұрмаймыз.

Шындалып жеткен бұл күнде

Ел дәстүрін сыйлаймыз.

Еламан

Көріңдер, көңіл бөліңдер

Ақ әжелер ыдысқа

Ақ құяды көріңдер

Наурыз саған жол болсын.

Тілегім анық сол болсын!

Виктория

Ақ бүріккен қазақ талдарға

Молшылық сырын ұқсын деп.

Май құйған бұлақ көзіне

Майдай болып жұқсын деп.

Құндыз

Тұнжырап қалған шақтарда

Қарашы атқан ақ таңға

Наурыз таңы келеді

Тұрарсың қалай шаттанбай.

Балауса

Қош келдің , Наурыз, Жаңа Жыл

Арай күнімнің бастауы.

Қарлығып қалып әуелеп шыққан

Бабамның бейне дастаны.

Хор:

Ұлыс күні кәрі жас,

Құшақтасып көріскен.

Жаңа ағытқан қозыдай

Жамырасып өріскен.

Дильназ

Ой қосылсын ойыңа

Бой қосылсын бойыңа.

Аман есен жетейік.

Келесі Наурыз тойына.

1 – жүргізуші:

Әуелеп әнді айтамыз,

Биден шашу шашамыз

Би: «Қара жорға»

(Бегайдар, Сұлтан, Досымжан, Еламан, Мейіржан,Құндыз,Виктория, Бибінұр, Дильназ, Мадина)

2-жүргізуші:Алдарыңызда «Наурыз , Жаңа жыл» әнімен Ерғабыл Мадинаны шақырамыз

Ән: «Наурыз, Жаңа жыл» (Мадина)

Ән: «Наурыз - көктем» (Дильназ)

Ән: «Қазақы дастарханым»(Мадина)

Би: «Елге сәлем» (Виктория, Құндыз)

Би; «Жарайма» (Дильназ)

Би: «Жүрегім, қазақ» (Бегайдар, Досымжан, Еламан,Бибінұр, Дильназ)

Хор. «Наурыз айы туғанда»