"Соңгы кыңгырау чыңы"

Соңгы кыңгырау чыңы!

Беренче кыңгырау .....Балачакның иң кадерле, якты бәйрәме- тәүге кат мәктәп бусагасын атлап кергән көндер. Әти-әни белән җитәкләшеп беренче мәртәбә мәктәпкә килү. Нинди бәхетле, шатлыклы, әйтеп бетергесез куанычлы көн бу! Мәктәп бусагасын атлаганда шатлык, куаныч хисләре белән беррәттән дулкынлану, курку хисләре дә биләп алу. Беренче укытучымның назлы тавышын ишеткәч, ягымлы йөзен күргәч, барлык курку хисләренең юкка чыгуы.

2007 нче елның 1 нче сентябрендә ак бантиклы,ак алъяпкычлар кигән нәни генә кызлар,кара костюм, ак күлмәкле шук малайлар 1 нче тапкыр мәктәпкә белем доньясына кереп киттеләр. Шушы көннән соң күпме айлар, атналар, көннәр сизелми дә үтеп киткән. Балачак инде артта калды...Соңгы кыңгырау бәйрәме якынлашырга санаулы гына көннәр калды.

Соңгы кыңгырау чыңы...Урта мәктәпне тәмамлап, зур тормышка, олы доньяга юлланган гаҗәп матур моң. Алдагы тормышын тынгысыз да, соклангыч һәм авыр да булачагын искәртеп тора кебек. Бу чың аларның укытучылары белән хушлашу авазы. Әлеге тавыш үзәкләргә үтеп, күңелләрне айкый. Әле кайчан гына мәктәп бу балаларны беренче сыйныфка кабул итеп алган иде, инде менә зур тормыш юлына озатыр вакыт җитте. Быел мәктәбебездә 11 нче сыйныфны укучы тәмамлый. Сөенечле дә, шул ук вакытта сагышлы да мизгелләр. 11 ел буена бергә укыган сыйныфташлардан, белем биргән, икенче әти-әниләргә әйләнгән укытучылардан аерылу әлбәттә җиңелләрдән түгел.

Мәктәбебезнең 21 укучысы быел мәктәп бусагаларыннан зур тормыш юлына атлаячак. Күңелдә мең төрле кичереш, мең төрле сорау, күзләрдә яшь бөртекләре.

Кадерле укучыларыбыз сезне соңгы кыңгырау бәйрәме белән тәбрик итәбез. Мәктәбебез уку елын шактый гына уңышлар белән тәмамлый. Бу –укучыларның, укытучыларның уртак тырышлыгы нәтиҗәсе. Сезгә мәктәбебезнең данын таныту буенча куйган хезмәтегез өчен рәхмәт. Алда дәүләт имтиханнары. Аларны уңышлы тапшырып,сайлаган һөнәрләрегез буенча укуларыгызны дәвам итсәгез иде. Хәерле юллар сезгә!