«Ягез әле, кызлар!» бәйрәме

«Ягез әле, кызлар!» бәйрәме

Гөлфия ЗӘЙНУЛЛИНА,

Максат. Укучыларны татар халкының мәдәни кыйммәтләре белән таныштыру, милли үзаң тәрбияләү, телебезгә ихтирамлы мөнәсәбәт булдыру, сәләтле укучыларны барлау.

Җиһазлау: экранда фоторәсем һәм «Ягез әле, кызлар!» дигән язу.

Кичә барышы.

(Музыка астында алып баручы чыга.)

Алып баручы. Исәнмесез, кадерле кунаклар, укытучылар, укучылар! Без бүген кичәбезне гүзәл һәм уңган кызларга багышлыйбыз. Кичәбезнең исеме дә «Ягез әле, кызлар!» дип атала. Әйдәгез, хөрмәтле дуслар, кул чабып, кызларыбызның иң уңганнарын, иң булганнарын, иң гүзәлләрен бирегә чакырыйк.

(Музыка астында VI сыйныф кызлары үзләренең урыннарына чыгып утыра.)

Алып баручы. Һәр очрашу танышудан башлана. Менә шул дулкынландыргыч минутлар килеп җитте. Иң элек без бүгенге бәйгене бәяләячәк жюри әгъзалары белән танышып китик. Жюриның гадел булуын, ә тамашачыларның, кызларны яратып, алкышларын жәлләмәүләрен телибез.

(Жюри әгъзалары белән таныштырыла.)

Алып баручы.

Күзләреңнең каралыгын

Шомыртлардан алдың мәллә?

Су буенда гына үскән

Зифа талдай синең гәүдәң.

Үкчәләрең җырын тыңлап,

Хыялларга бирелеп китәм.

Әй, син, горур татар кызы,

Кем бар синдәй бүтән?

Алып баручы. Бәйгенең беренче бүлеген башлыйбыз. Ул «Таныш булыйк!» дип атала. (Кызлар презентацияләрен яклый. Слайдлар)

Алып баручы. Бәйгенең икенче бүлегендә «Башын әйтәм, ахырын тап!» уенын уйнап алыйк. (Мәкальләр язылган кәгазьләрне кызлар үзләре сайлап ала һәм алгач кына укыйлар. Мәкальнең башы гына языла.)

• Тырышкан – табар, ... (ташка кадак кагар).

• Җиде кат үлчә, ... (бер кат кис).

• Үзеңне үзең зурлама, ... (кеше сине зурласын).

• Китап – ... (белем чишмәсе).

• Ни чәчсәң, ... (шуны урырсың).

• Берлек кайда – ... (көч шунда).

Алып баручы. Кызлар үзләрен төрле өлкәдә сынап карасын. Нечкә билле кызларыбыз кыршау әйләндерсен. Кайсысы иң озак әйләндерер?

(Кызлар кыршау әйләндерә.)

Алып баручы.

Энҗе-мәрҗән калфагыма

Йөрим сөенеп кенә.

Сәхнәләргә чыгып җырлыйм,

Калфаклар киеп кенә.

Алып баручы. Ә хәзер кызларыбыз сәхнә осталыкларын күрсәтер. Җырлау, шигырь сөйләү, музыка коралында уйнауда кайсысы иң-иңе икән?

Кызлар башкаруындагы номерлар тәкъдим ителә.)

Алып баручы. Киләсе биремдә кызларыбызның зирәклеген тикшерик. Сезнең игътибарыгызга – «Сорау бирәм, җавабын тап!» уены.

(Кызлар сораулар язылган кәгазьләрне сайлап ала һәм алгач кына укыйлар.)

• Арчада нәрсә тегәләр?

• Галиәсгар Камал кем ул?

• Нәүрүз бәйрәме нинди бәйрәм ?

• Кем ул Кол Гали?

• Заманында Чистай шәһәре нәрсәсе белән данлыклы иде?

• Татарстанда ЮНЕСКО исемлегенә кертелгән нинди тарихи объектларны беләсез?

• Казанда хатын-кыз исеме белән аталган нинди архитектура корылмасы бар?

Алып баручы. Кызларның белемнәрен тикшерүне дәвам иттерәбез, Алдагы бирем – «Халкыбызның күренекле кешеләрен ата!» уены.

Татар артистлары: ...

Татар шагыйрьләре: ...

Татар композиторлары: ...

Татар рәссамнары: ...

Татар язучылары: ...

(Кәгазь битләренә язалар.)

Алып баручы. Кызлар җавапларын язган арада сәхнәгә җанатарларыбызны чакырабыз.

(Җананатарлар башкаруында номерлар.)

Алып баручы. Хәзер кызларыбыз «Казан буенча сәяхәт» рубрикасына багышланган өй эшләрен күрсәтсен.

(Кызлар экранда алдан әзерләгән презентацияләрен яклый. Темалар: башкалабызның спорт объектлары, театрлары, һәйкәлләре, югары уку йортлары, музейлары, мәчетләре.)

Алып баручы. Инде нәтиҗә ясарга вакыт җитте. Әйдәгез, сүзне жюрига бирик. Кызларыбызның кайсысы нинди номинациядә җиңүче икән?

(Жюри бәйге нәтиҗәләре белән таныштыра.)