Тақырыбы: «Тәуелсіз елім - Қазақстаным»
Мақсаты :
1. Білімділігі: Балалардың бойында Қазақстанның өткені мен бүгінгі өмірін салыстыра отырып, өз еліміздің даму тарихы туралы танымдарын қалыптастыру. Ұлттық сана сезімін, саяси сауаттылығын ояту. Тәуелсіздік күні туралы терең мағлұмат беру. Тәуелсіздік үшін күрескен, желтоқсан құрбандарын еске түсіріп, желтоқсан құрбандарының ерлігі жайында түсіндіру.
2. Тәрбиелігі: Қазақстанның болашақ дамуына өзіндік үлес қосатын жеке тұлға екендерін ұғындыру. Қоғамның бір мүшесі ретінде адам өмірі мен жақсы тұрмыстық құндылықтарын ұғындыру, жауапкершілік сезімдерін ояту. Оқушыларға патриоттық тәрбие беру, Отанды сүюге және ерлікке баулу. Желтоқсан оқиғасында ел қамын жеген ерлерді үлгі тұту, өнеге алуға және халқының тарихын білуге үйрету, достыққа, ұйымшылдыққа тәрбиелеу.
3. Дамытушылығы: балалардың өткен тарихқа деген қызығушылығын ояту.
Көрнекілігі:
1. Қазақстан Республикасының мемлекеттік рәміздері: Туы, Елтаңбасы, Әнұраны, Н.Ә. Назарбаевтың портреті, слайд, желтоқсан құрбандарының суреті.
2. Шарлар, гүлдер.
Кіріспе:
Тәрбиеші :
Сәлеметсіздер ме, құрметті ұстаздар, балалар.Бүгінгі "Тәуелсіз елім – Қазақстаным” атты тәрбие сағатымызға қош келдіңіздер! Биыл біздің Қазақстанымыздың Тәуелсіздік алған күніне 16 желтоқсанда 25 жыл толады. Бәрімізге мереке құтты болсын!
Желтоқсан - ау, ұмтылмайсың жүректе,
Ұрпақ өсер айналатын тірекке.
Егемендік тиді міне, еншіме,
Желтоқсаным, жеткіздің ақ тілекке.
Тәуелсіздігіміз баянды болсын дей отырып, тәрбие сағатымызды Әнұранмен бастайық.
Әнұран айтылады.
Тәрбиеші:
Біз тәуелсіз елдің азаматы болғанымызға шексіз қуанамыз. Біздің Отанымызды әлем таныды. Осы сәтте Отан туралы еріксіз ойға берілесің. Бұл ұғымның аясы кең. Отан – ата-анаң, достарың, далаң, орман, тауың, ауылың мен Астанаң.
Отан әр жұмыр басты пенденің киелі мекені, жер басып жүрген әр тіршілік иесінің шексіз байлығы. Тәй-тәй басқан нәресте де, еңкейген қария да оның бір мүшесі.
-Балалар «Отан» туралы тақпақ білесіңдер ме?
Балалар Отан туралы тақпақтарын айтады.
Тәрбиеші :
Қазіргі кезде сендер ашық аспан, жарық күн сәулесі түсіп тұрған мемлекетте өмір сүріп жатырсыңдар. Қазақ халқы еркіндікке жету үшін қаншама қиын – қыстау кезеңдерді бастан кешірді. Мыңдаған жылдық тарихы бар. Ал, 1986 жылғы оқиға халықтың есінде мәңгі сақталады. 16 – желтоқсанда қазақ жастары Алматы қаласында Орталық алаңға шығып, Қазақстан тәуелсіздігін талап етті. Бұл күн - Қазақстан тарихында тәуелсіз Қазақстан Республикасының туған күні деп алтын әріппен жазылды. Сондықтан да желтоқсан бүкілхалықтық мереке.
- Балалар, біз осы тәуелсіздікке оңайлықпен қол жеткізген жоқпыз. Оның бір көрінісі желтоқсан оқиғасы.
Желтоқсан оқиғасында ерен ерлігімен көзге түскендер өте көп, солардың бірі – Қайрат Рысқұлбеков. Ол қыршын жасын қиды. Оған үлкен айып тағылды.
Қазір сіздердің назарларыңызға желтоқсан оқиғасында әділдік үшін күрескендердің бірі – Қайрат Рысқұлбеков, Ләззат Асанова,Сабира Мұхамеджанова, Ербол Спатаевтардың суреттерін слайд арқылы тамашалайық.
Тәрбиеші сөзі:
Енді міне, осы желтоқсан көтерілісіне қатысқан ағаларымыз бен апаларымыздың арқасында бейбіт өмір сүріп жатырмыз.
-Міне, балалар, бүгінгі таңда Қазақстан тәуелсіз мемлекет. Біздің өзіміздің Туымыз, Елтаңбамыз, Әнұранымыз бар. Сендер Отанымыздың бақытты ұрпақтарысыңдар. Жақсы оқып,үлгілі, тәртіпті болыңдар. Өз елің мен жеріңді көркейтіп, Қазақстанның намысын қорғайтын келешек ұрпақтың ақылшысы, еліміздің патриоты, тірегі сендер болмақсыңдар.
-Енді балалардың Тәуелсіздік мерекесіне арналған тақпақтарын тыңдайық.
1.Елмұрат
Қайраттай қайсар ұлдардың,
Жанымен келген еркіндік.
Сабира мен Ляззаттың ,
Арымен келген еркіндік.
Қасірет пен қайғының,
Бәрімен келген еркіндік.
2.Ерәділ
Он алтыншы желтоқсан ,
Ел мерейі тасыған.
Қазақ деген қалың жұрт,
Бәрін кешті басынан.
3.Ақбота
Әр қазақтың есінде сақталады ,
Желтоқсандық өрендер ақталады .
Ел намысын қорғаған сарбаздарым,
Ерліктерін мәңгілік сақталады.
4.Дилнара
Он алтыншы желтоқсан ,
Тәуелсіздік алған күн.
Ерекше боп мәңгілік ,
Ел жадында қалған күн.
5.Нұржәнат
Көк аспанда тулардың,
Желбіреген күні – бұл.
Елім деген ұлдардың ,
Елжіреген күні - бұл.
6.Дарын
Елдігімнің – реңі,
Тендігімнің – тірегі.
Мүддесінен халықтың ,
Ажырамас бір елі.
Алтын заңым – арай таным!
7.Айдар
Әділеттің ұраны,
Ақиқаттың шырағы.
Тыныштықтың туы боп,
Зор салтанат құрады.
8.Мөлдір
Дүбірлетсін өңірді
Дүбірлесін дүлділі.
Қазақ деген елімнің
Құтты болсын бұл - күні!
Тәрбиеші: -Енді «Кім тапқыр?» ойынын ойнайық. Мен сендерге мақал-мәтел оқимын, сендер жалғастырасыңдар.
1.Ат айналып қазығын табады,
Ер айналып елін табады.
2.Туған жердей, жер болмас,
Туған елдей, ел болмас.
3.Еңбек етсең ерінбей,
Тояды қарның тіленбей.
4.Ерді намыс өлтіреді,
Қоянды қамыс өлтіреді.
5.Отансыз – адам,
Ормансыз – бұлбүл.
6.Өзге елде сұлтан болғанша,
Өз елінде ұлтан бол.
7.Ер есімі – ел есінде.
8.Отан оттан да ыстық.
Тәрбиеші: Балалар мына сұрақтарға жауап береп көріңдер.Сұрақтар:
1.Біздің Президентіміз кім? 2.Біз қай ұлтпыз? 3.Біздің Елордамыз қай қала? 4. Рәміздерге не жатады? 5.Желтоқсан құрбандарын ата? 6.Биыл Тәуелсіздігімізге неше жыл толады?
Қорытынды:
«Болса екен қазақ баласы» ,
Ертеңі өсіп елімнің.
Сабырлысы болса екен,
Ар-ұятты айбатты .
Азулысы болса екен ,
Батыл, берік орнықты .
Байсалдысы болса екен ,
Алғыр, зерек, мейрімді.
Ақылдысы болса екен ,
Тапқыр, шешен талапты.
Өнерлісі болса екен ,
Ойшыл, өткір, дарынды.
Білімдісі болса екен ,
Сергек, іскер, сезімтал.
Саналысы болса екен,
Парасатты намысты.
Отаншылы болса екен,
Болса екен қазақ баласы.
Ел ішінде өсетін,
«Қайсарлығы қалтқысыз Махамбет қой» – десетін.
Ізгіліккке леп едім,
Жақсылыққа сеп едім.
Тәуелсіз елдің ертеңін ,
Осылай көрсем деп едім - деп осындай Отаншыл балаларымыз аман – есен өсе берсін. Қазақстанымыздың көк байрағы желбіреп, еліміз тыныш, жұртымыз аман болсын! Бүгінгі Тәуелсіздік күніне арналған «Тәуелсіз елім - Қазақстаным» атты тәрбие сағатымыз аяқталды.
