Еңбек-бәрін жеңбек

Сабақтың мақсаты: Оқушыларға айналасындағы адамдарға кешіріммен қарап, еңбекқорлықтың маңыздылығын ұғындыру арқылы дұрыс әрекет құндылығының мәнін ашу.

Міндеттері:

Білімділігі: Еңбектің адам өміріндегі мәні туралы түсіндіре отырып, тілалғыштық қасиеті туралы түсінік беру

Дамытушылығы: Оқушыларды еңбекқорлыққа дағдыландыра отырып, әділеттілік қасиетіне баулу.

Тәрбиелілігі: Оқушыларды үнемшілдікке, тілалғыштыққа, әділеттілкке тәрбиелеу.

Ресурстар: (Құралдар, мәліметтер) Белсендіргіш тақта, түрлі-түсті бояулар, маркерлер, ватман, ақ қағаз

Сабақ барысы:

Ұйымдастыру кезеңі-2 мин.

1. Тыныштық сәті. «Нұрға бөлену»-4 мин.

Нұрға бөлену.

Ыңғайланып отырыңыздар, денелеріңізді түзу ұстаңыздар. Аяқ-қолыңызды айқастырмаңыз. Қолыңызды тізеңізге немесе үстелге қоюға болады. Көздеріңізді жұмуларыңызды өтінемін.

Елестетіп көріңіз: Күн нұры сіздің төбеңізден өтіп, кеудеңізге қарай бойлап барады. Кеудеңіздің орта тұсында гүл түйнегі орналасқан. Гүлдің түйнегі нұрдан баяу ашылып келеді. Балғын және таза әсем гүл сіздің әр ойыңызды, әр сезіміңізді, эмоцияңыз бен тілек қалауыңызды шайып, жүрегіңіздің қауызын ашты. Нұр сәулесі сіздің бойыңызға ақырын тарай бастағанын елестетіңіз. Ол біртіндеп күшейе түсуде. Оймен осы нұрды қолдарыңызға түсіріңіз. сіздің қолдарыңыз нұрға бөленіп, сәуле шашуда. Қолымыз тек жақсы, ізгіістер істейді және баршаға көмектеседі. Нұр аяқтарыңызға тарады. Аяқтарыңыз нұр сәулесін шашуда. Олар сізді тек жақсылық жасау үшін жақсы жерлерге апарады. Олар нұр мен махаббат құралына айналды. Одан әрі нұр сіздің аузыңызға, тіліңізге тарады. Тіліңіз тек шындықты және жақсы, ізгі сөздер ғана айтады. Нұрды құлақтарыңызға бағыттаңыз, құлақтарыңыз тек жақсы сөз бен әсем әуенді ғана естиді. Нұр көздеріңізге де жетті, көзіңіз тек жақсыға қарап, бәрінен жақсылықты ғана көреді. Сіздің басыңыз түгелдей нұрға бөленіп, басыңызға тек ізгі, сәулелі ой келеді. Нұр бірте-бірте қарқын және шұғылана бастайды, сіздің денеңізден шығып, жан-жағыңызға сәуле шашады. Осы нұрды туысқандарыңызға, балаларыңызға, мұғалімдерге, достарыңызға, таныстарыңызға бағыттаңыз. Нұрды уақытша түсініспей, ренжісіп жүрген адамдарға да бағыттаңыз, олардың да жүрегі нұрға толсын. Осы нұр бүкіл әлемге: барлық адамдарға, жан-жануарларға, өсімдіктерге, барлық тірі жанға таралсын... Ғаламның барлық түкпір-түкпіріне нұр бағыттаңыз. Ойша айтыңыз: «Мен нұрлымын... Нұр менің ішімде... Мен нұрмын». Осындай нұр Махаббат және Тыныштық күйінде отыра тұрыңыз... енді осы нұрды жүрегіңізге орналастырыңыз. Нұрға толы бүкіл әлем сіздің жүрегіңізде. Оны осындай әсем қалыпта сақтаңыз. Жәймен көзіңізді ашуға болады. Рақмет!

1. Үй тапсырмасын тексеру-7 мин.

№22 сабақ. Оқулықтың 83-бетіндегі «Еңбексіз өмір-сүреңсіз» мәтінін оқып келу.

Сұрақтар:

1. Мысал әңгімедегі Қара пышақ қандай адамға ұқсайды?

2. Сары пышақтың қандай ісі сендерге ұнады?

3. «Еңбексіз өмір- сүреңсіз» дегенді өздерің қалай түсінесіңдер?

Ескерту

Дәйексөз-5мин.

«Еңбек қуаныш, жалқаулық айырылмас азап». Абай.

1.Хормен оқыту

2. Қыздарға бөлек, ұлдарға бөлек оқыту.

3. Оқушыларға дәптерге жазғызу.

Дәйексөздің мағынасын қалай түсінесіңдер?

4.Балалардың жауаптары негізінде дәйексөзді қорытындылау

Абай- қазақтың ұлы ақыны.

1. Әңгімелеу-10 мин.

«Жақсылардың жақсысы» аңыз

Баяғыда бір адам өзі жалғыз қызымен бірнеше бөлмелі жарық, биік, өте әдемі үйде тұрыпты. Үйдің айналасы бау-бақша екен. Бір күні оның кішкентай қызы бақшаны, барлық бөлмелерді аралайды. Кірмеген жалғыз ғана бөлме қалыпты. Ол ылғи жабық тұрады екен. Сонда әкесіне қыз:

-Әке, маған жабық тұрған бөлмеге кіруге рұқсат етіңіз. Осы бөлме басқа бөлмелерге қарағанда жақсы ғой деп ойлймын,- деді.

-Оның дұрыс, қызым. Жақсылардың ең жақсысы сонда. Бірақ сен әлі жассың, өскенде бұл бөлмені саған беремін. Сен оған өмір бойы риза боласың,-деп жауап қайтарды әкесі.

Ай өтеді, жыл өтеді, қыз есейіп бой жетеді. Әкесі қызына жабық бөлменің кілтін ұсынады.Қыздың қуанышы қойнына сыймай, жүгіріп келіп, есікті ашып жібергенде, ол тек ұршық пен өрмек және кітапты көреді. Қыз әкесіне келіп, көз жасын бұлап тұрып:

-Әке, сен жабық бөлмеде «Жақсылардың жақсысы бар» деген едің. Мен одан ұршық, өрмек, кітаптан басқа ешнәрсе таппадым, -дейді.

-Міне, жақсылардың жақсысы деген осылар, қызым!

-Ұршық пен өрмек болса, еңбегің жанады. Ал кітап оқысаң, білімің артады. Жарық дүниеде бұлардан жақсы нәрсе жоқ. Дүниедегі мүліктің бәрі еңбекпен, біліммен табылады, - деп түсіндірді әкесі.

1. Неліктен әкесі ұршық, өрмек, кітапты «жақсылардың жақсысы» деді?

2. Дүниедегігінің бәрі еңбекпен табылады дегенді қалай түсінесіңдер?

1. Шығармашылық іс-әрекет, топтық жұмыс-10 мин.

Оқушыларды геометриялық фигуралар арқылы үш топқа біріктіремін. Баяу музыка қойылады. Әр топ өздерінің аттарына байланысты жағдаяттар құрастырып, сахналап береді.

Бірінші топ: Үнемшіл

Екінші топ: Тілалғыш

Үшінші топ: Әділетті

6.Ән айту-5 мин.

«Риясыз махаббат»

Сөзі мен әні Құрмаш Махановтікі

Мен де сені өмір-ау жан-тәніммен сүйгенмін,

Жүрек атты қоңырау елтіп күйгенмін.

Туған жердің шаңында махаббатпен сіңіргем,

Естелік көп жадымда балғын күнімнен.

Өмірім балдай, көңілім қардай,

Сенімім шамдай шын махаббат орнаса.

Реңім әрсіз, білегім әлсіз,

Жүрегім әнсіз шын махаббат болмаса.

Анашыма еркелеп, әкешіме асылып,

Есейсем деп ертерек өстім асығып.

Үміт сыйлап әр кешке, жана берді көзімде от,

Парталас қыз қалды есте мөлдір сезім боп.

Өмірім балдай, көңілім қардай,

Сенімім шамдай шын махаббат орнаса.

Реңім әрсіз, білегім әлсіз,

Жүрегім әнсіз шын махаббат болмаса.

Асыл досқа назым бар, ғашық жарға сезім бар,

Балаларға сазым бар, жылы сөзім бар.

Олар барда өмір бар, күліп атар ақ таңым,

Бақыт деген менің бар махаббаттарым

Өмірім балдай, көңілім қардай,

Сенімім шамдай шын махаббат орнаса.

Реңім әрсіз, білегім әлсіз,

Жүрегім әнсіз шын махаббат болмаса.

1. Үй тапсырмасы-2 мин

1.Оқулықтың 81-бетіндегі «Болайықшы осындай» әнін оқып, жаттап келу

2. Дәптермен жұмыс. Тапсырмаларды орындау

1. Сабақтың соңғы тыныштық сәті.

Балалар, бүгінгі сабақта айтылған жақсы қаиеттерді жүректеріңе сақтап алыңдар.

Сабақ аяқталды, сау болыңдар!