?депті бала

Әдепті бала

Мақсаты: Әдет-ғұрыпты сақтайтын, дәстүрді жалғастырушы, қайырымды ұрпақ тәрбиелеу.Балаларды кішіпейілділікке, үлкендерді сыйлауға,көмектесуге үйрету. Жақсы қасиеттерді бойына сіңіріп,жаман әдеттерден жирену сезімін дамыту.

Тіл байлығын, таным белсенділігін арттыру, әдеп әліппесін бойына дарыту. Оқушыларды әдептілікке,сыпайылыққа,әдемілікке тәрбиелеу.

Көрнекілігі: қанатты сөздер, шарлар, интербелсенді тақта, суреттер.

Сайыстың жүрісі:

Жүргізуші: Қайырлы күн , ұстаздар мен оқушылар! 2–сыныптар арасында өткізіліп жатырған

« Әдепті бала» сайысына қош келдіңіздер!

Әдептілік-адамдардың өзара жақсы қарым-қатынасының, жүріс-тұрысының ережесі. Әдептілік деп үлкендерді сыйлауды, достарды, айналадағы адамдарды құрметтеуді айтамыз. Әдепті адам басқадан сыйласым күтпей-ақ, алдымен өзі басқаны құрметтеп,ардақтай біледі. Әдептілік дегеніміз әдеп, ізет,инабат,сыйласым, құрмет,қамқорлық деген сөздерді білдіреді.Бір-бірімізге кешірімді болу керек, ол да әдептілік. Кейде кешірілмейтін мінез-құлықтарда болады. Ондай теріс мінезді тезге салып, түзету керек. Мысалы:Уәде беріп, оны орындамаса, басқа кісіге дөрекі жауап берсе, үлкенді сыйламаса, ондай адамды жұрт «әдепсіз екен» дейді. Ондай адамдарды ешкім сыйламайды,қарым-қатынас жасаудан бас тартады. Қазір сендер мектеп қабырғасында білім алып жатырсыңдар. Уақыт тез өтеді, ертең-ақ әрқайсысың үлкен азамат,азаматшалар боласыңдар. Бірің дәрігер, бірің мұғалім, әнші,биші, елші боларсыңдар. Алайда сендер ең әуелі нағыз азамат,жақсы адам болып өсулерің керек. Бойларыңа батылдық пен мейірімділікті, қарапайымдылық пен кішіпейілділікті, сыпайылық сияқты асыл қасиеттерді сіңірулерің қажет. Сонда ғана жұрт сіздерді «Әдепті бала» екен деп айтатын болады.

Сыйластықты іздеген,

Әдеп сақтар ізгі өрен.

Сыпайылық белгісі,

Үлкендерге «сіз» деген.

Бүгінгі сайысымыз 2-сыныптар арасында өтеді. Сайысқа әр сыныптан бір оқушыдан қатысып, жеке-жеке сайысатын болады. Олай болса сайыскерлерімізді ортаға шақырайық:

1. Қаржау Диас. 2 «А» сынып оқушысы

Сабырлы әрі салмақты,

Өзі өнерлі жан-жақты.

Келе жатқан ер Диас,

Жарысты бүгін бастапты.

1. Қайырғалиев Абзал. 2 «Ә» сынып оқушысы.

Арманы бар биік шыңға шықсам деген,

Қыран боп, көк әлемге ұшсам деген.

Бүгінгісайысқа Абзал шығып,

Кең сермеп, қанатымды ұшсам деген.

1. Жалғасбаев Бекарыс. 2 «Б» сынып оқушысы

Өнер қуған жасынан,

Өнері судай тасыған.

Келесі біздің Бекарыс,

Көрінген күштің басынан.

1. Джолдасбаев Адилбек. 2 «В» сынып оқушысы

Жақсы адам кімге болсын болар пана,

Мол оның тал бойында ақыл,сана.

Көркіне ақылы да сай келетін,

Шақырайық Адилбекті ортамызға.

1. Абдуллаева Лана. 2 «Г» сынып оқушысы

Аңқылдаған ақ көңілмен,

Гүлдей жайнап әдемі қыз,

Озамын деп нық сеніммен,

Шықты ортаға Лана қыз.

1. Тажмағанбетова Балауса. 2 «Ғ» сынып оқушысы

Мінезі ашық-жарқын, жүзі жылы,

Түрінен көрінеді ішкі сыры.

Балауса келді міне әдепті қыз,

Аспаннан ашылғандай күннің нұры.

Сайыста бақ сыналар, бап сыналар,

Бас жүлдені әдепті, тапқыр алар.

Кім өнерлі,кім тапқыр шешу қиын,

Қазылар алқасы болмаса сынға алар,- дей келе сайысымыздың әділ бағасын беретін қазылар алқасымен таныстырып өтейін.

Әділ-қазыларды таныстыру.

Сайысымыз 4- бөлімнен тұрады.

1. « Әдептіліктің белгісі- иіліп сәлем бергені».

( Амандасу, өзін таныстыру).

1. «Білгенге маржан».

( Сұрақтарға жауап беру)

1. « Сөздің көркі мақал».

( Мақал-мәтел жарысы).

1. « Өнерлі өрге жүзер».

( өз өнерлерін көрсету).

1-Бөлім. « Әдептіліктің белгісі, иіліп сәлем бергені». Әр сайыскер өзін таныстырады.

Кезекті сайыскерлерге беремін.

1 бөлімнің бағаларын әділ-қазылардан сұраймыз.

Бөлім. «Білгенге маржан». Әр сайыскер сұрақтарға толық,нақты жауап береді.

«Мектеп-кеме, білім-теңіз»- деп халқымыз бекер айтпаған, тағыда сол халық «Білекті бірді жығады, білімді мыңды жығады» дейді. Енді біздің сайыскерлеріміздің білім деңгейінің қаншалықты мықты екенін пайымдаймыз.

Сөз маржаны дегенде,

Ерінбей қане шешіңдер.

Маржанды сөзді тереңнен,

Тауып шыңнан тізіңдер.

Сұрақтар:

1. Жалқы есімдерге мысалдар айт.

2. Күрделі етістіктер туралы айт.

3. Лепті сөйлем құрап айт.

4. Жұрнақ пен жалғау туралы түсінік бер.

5. 3-тің көбейту кестесін жатқа айт.

6. 1метрде неше дециметр бар?

7. 5-ті 0-ге бөлсек неше болады?

8. Ләйланың 3 бүтін, 2 жарты және 4 ширек алмасы бар. Ләйланың неше алмасы бар?

9. Ауаның қасиетін айт.

10. Судың қасиетін айт.

11. «Мәншүк» өлеңін жатқа айт.

12. Жабайы және үй жануарларын айт.

2-бөлімнің бағаларын әділ-қазылардан сұраймыз.

3.Бөлім. «Сөздің көркі мақал» мақал-мәтелдер сайысы.

«Сөздің көркі мақал»-дейді дана халқымыз. Ең мәдениетті, нағыз қазақ сөзін мақалмен сөйлейтіні баршамызға аян. Бұл бөлімде мақал-мәтел айтып жарысады. Кім көп мақал айтса, сол жеңімпаз болады. Олай болса сайыскерлеріміздің сөз саптауларын сарапқа салайық.

3- бөлімнің бағаларын сұраймыз

.

4.Бөлім . « Өнерлі өрге жүзер».

Өнері өрге жүзер, таңғалмаңыз!

Таланты талмай ұшар, таңғалмаңыз!

Таңғажайып әлемі-өнер аты,

Шарпып өтсін лебімен, таңғалмаңыз!

Кедеймін деп қысылма,өнерің олса қолыңда.

Өнерлінің ырысы,жарқырап жатыр жолында.

Сайыста ән салайық,би билейік,

Өнермен өрге басып кідірмейік.

Сайыскерлеріміздің өнерін тамашалаймыз.

4- бөлімнің бағаларын әділ-қазыларымыздан сұраймыз.

Әдеп: үлкеннің жолын кеспеу,ешқашанда өтірік сөйлемеу, достарыңа көмектесу, дастархан басында әдепті болу, үлкенге құрмет, кішіге ізет, бұзақылық жасамау. Осы асыл қасиеттерді бойларыңа сіңіріп, жаман әдеттерден өздеріңді аулақ ұстасаңдар, әдепті, сыпайы оқушы болып өсетіндеріңе сенемін. Сендерге айтарым: адам әрқашанда бет сұлулығымен емес,ішкі жан дүниесімен, әдептілігімен,инабаттылығымен әдемі.

Қорытынды. Сөз кезегі әділ-қазылар алқасына беріледі. Қорытынды баға айтылып, жеңімпаз оқушы жарияланады.

Марапаттау.

1.Жалқы есімдерге мысалдар айт.

2.Күрделі етістіктер туралы айт.

3.Лепті сөйлем құрап айт.

4.Жұрнақ пен жалғау туралы түсінік бер.

5.3-тің көбейту кестесін жатқа айт.

6.1 метрде неше дециметр бар?

7.5-ті 0-ге бөлсек неше болады?

8.Ләйланың 3 бүтін, 2 жарты және 4 ширек алмасы бар. Ләйланың неше алмасы бар?

9.Ауаның қасиетін айт.

10.Судың қасиетін айт.

11.«Мәншүк» өлеңін жатқа айт.

12.Жабайы және үй жануарларын айт.

«Манашы орта мектебі» ММ

Әдепті бала

/Мектепішілік 2-сыныптар арасында өткізілген сайыс/

Дайындаған: Сарсенбаева Тазагүл

2014-2015 оқу жылы