kopilkaurokov.ru - сайт для учителей

Создайте Ваш сайт учителя Курсы ПК и ППК Видеоуроки Олимпиады Вебинары для учителей

Сценарии сказок на мокшанском языке

Нажмите, чтобы узнать подробности

Сказки предназначены для инсценировки на сцене. Актеры должны быть одеты в национальный наряд с элементами персонажей (зверят). Для музыкальных вставок можно скачать мокшанскую музыку.

Просмотр содержимого документа
«Сценарии сказок на мокшанском языке»

Лисихть шабат и киштихть аф оцю киштеманя.

Сяда меле лисихть Вятихне.


Девятаев Сергейсь. Шумбратада кельгома ялгат!


Чепайкина Кристинась. Шумбратада.


Девятаев Сергейсь. Модать лангса эрь шуфтонять ули сонцень юроц, и эздонза сон шачи, кассы, сявонди вий эсь ундонянзонды.


Чепайкина Кристинась. Тяфтама и юроц эряфса ули и эрь ломанть и марнек народть.


Девятаев Сергейсь. Мокшэрзятнень эряфонь шуфтсна, конанди рузкс мярьгихть «древо жизни», модаса кассы аф фкя тёжянь киза.


Чепайкина Кристинась. Сонь шерьфтезе аф фкя варма, синнезе аф фкя давол. Плхнезе аф фкя атям.


Девятаев Сергейсь. Аф ваномок тянь лангс, шуфтоньке нинге эряй, нинге лопаякшни, арьсекшни виензамс.


Чепайкина Кристинась. Ёрай мазы панчфонь тюсса панжемс…


Девятаев Сергейсь. И штоба мокшэрзянь шуфтсь лопаякшнель и панжель, миндейнк, ломаттненди аф эрявихть юкснемс эсь юроньконь и кяленьконь.


Чепайкина Кристинась. Тячиень иланьке лемдьф мокшэрзянь фольклорти «Народть мяляфтомац пефтома»


Вятихне туйхть. Лисихть лия вятихть.


Тестов Дмитрийсь. «Шабань фольклор» терминць шачсь Россияса аньцек XX – це векть ушетксстонза. Тейнза сувафневи произведениятне, конат ащихть колма оцю цикласта. Тейнза сувафневихть произведениятне, конатнень морсесазь и азондсазь шабатненди оцю ломаттне.


Шумкина Анастасиясь. Тя – нюряфнема или удома моротне, пестушкат или идень тетюшкамат, комотьфнемат, потешкат, валмуворкст, ёфкст, содама ёфкстприбауткат.

Тестов Дмитрийсь. Омбоце циклати сувсихть произведениятне, конат шачсть аньцек шабатнень еткса, оцю ломанень фольклорть лангс ванозь.


Шумкина Анастасиясь. Тя- содама ёфкст, эвотькс мархта быличкат, налхксемат, ёфкс мархта баснят, лувондоманят, тердемат и сяда тов.


Тестов Дмитрийсь. Колмоце циклати сувсихть произведениятне, конат састь шабатнень репертуарс мокшень писательхнень произведенияста или рузонь фольклорста, рузонь произведенияста.


Шумкина Анастасиясь. Азфсь корхтай, што шабань фольклорсь, занцемок

башка васта сембе народть творчестваса.


Шабатне туйхть.

Нюряфнемань моронянь коряс лисихть кафта стирнят.



Девятаев Сергейсь. Нюряфнемань моронят! Тя инь сире фольклоронь жанра, морсесазь емла шабатненди тядятне или идень ванихне.


Шумкина Анастасиясь.

-Ай, катоня, катоня,

Коза тият пизоня?

- Трубать фталу,

Самоварть алу.

-А месс пяк ичкози?

- Сединязе пичеди,

Пелян пизонь яжайда,

Мушка сакал атяда

Коське кядь бабада,

Ёронь сельме шабада.


Чепайкина Кристинась.

Тю-тю, ба-лю, иднязе,

Шумбра-пара лефкскязе,

Кемоняста удоза,

Танцти оння няеза!

Коськт-лямбот нуланза,

Акша ацам алонза.

Уды, уды сргози,

Нюрямняста комоти.

- Эрька, бабай, эшелямак,

Пекозе вачсь – андомак!


Тестов Дмитрийсь. Идень тетюшкаманят. Тя аф оцю ладяф моронят, конатнень вельде инь ёмла шабанятнень мархта коленкшнихть.



Макарова Ксюшась.

Тядясь сявсы шабать прянянц кядензон ёткс и салаване нюряфтсы, меле морай:

Кши панян, кши панян,

Тушк – пянакуду!


Шабанять пильгонзон карьсемста тядяц морамста корхтай:

Тинць, тинць карьседа,

Щавань пяли якада,

Щавась максы коку.

Батькась максы ляли,

Олять пекоц кели.


Чевтайкин Максимсь.

Оцюфне сявондсазь шабать кядензон, озафтсазь пильге лангс и морайхть:

Цингор, цингор, пайгонязе,

Кайгиняста кайгинязе!

Лишмонязе арды,

Семботи сударды.

Сонь дуганяц аф простой,

Сонь дуганяц золотой.

Дугасонза пайгонясь.

Пайгонязе горь, горь, горь.

Арды лишмоса Григорь.

Арды ломань вели

Эсь щаванянц пяли.

Щавац азы ляпе вал,

Щавац максы мазы ал.


Шумкина Анастасиясь. Потешканят. Тя – аф оцю моронят, потешкатнень морамста коленкшнихть шабатнень сурняснон, кядьняснон, пильгоняснон мархта.


Чудаева Татьянась. Оцю ломанць сявсыне кядезонза шабанять кядензон, салаване вачкодьсыне и морай, сяда меле эсь види кядень няфнема сурсонза вятни сонь кядьлапшенц кучкава и салаване корхтай:

Тьфу, тьфу, цёраня,

Тьфу, тьфу, церянь товня!

Лакштамарень ундуня,

Ведь сараскянь толганя!

Сире тумонь ункскя,

Од тумонь тараткя!

Тарадть эса нюрям.

Нюрямть эса Васька.

Васькать кядьса коку.

Пейнязонза чеку.

Лиси сиянь пейня,

Арат кода тумоня.


Канин Максимсь. Мянцемок шабанять эрь сурнянц. Оцю ломанць максси тейст лепт и тяфта кармай шабать содама эсь семьястонза эряй ломаттнень:

Тя – атяня,

Тя – бабаня,

Тя – стирня,

Тя – цераня,

Тя – рьвяняня.

- Бабай, ков молят?

- Свадьбас, пачаняда ярхцама, позаняда симома.

- Ой, бабай, монга молян!

- Кяпат!

- Ой, косот карьне-пракстане?

- Шеернясь салазень. Сей, сей, сей…

Мекольцень валхнень азомста шабанятнеь котфнесазь, штоба сон улель эрек ломань.


Чепайкина Кристинась. Прибаутканят – тя аф оцю ладяф рахсеманянь азондоманя.


Надин Дмитрийсь.

-Чикор, чикор, Сязьгата,

Мес кувака пулоце?

-Пачань пицемс эряви.

-Чикор, чикор, Сязьгата,

Мес акшеня пулоце?

-Прянь шнафтомс эряви.

-Чикор, чикор, Сязьгата,

Мес вадяжа коняце,

Акшеня сапоняце?

-Свадьбань куду эрявихть,

Ладняс пидемс-панемс,

Шра лангу каннемс.


Ковышкина Анастасиясь.

-Казаня, казаня,

Каза – ктмор сюроня!

Нефтезь цека пулоня,

Коза якать колама?

- Якань шабрань веленяс,

Пиже капста переняс,

Порень капста лопаня,

Кандонь мон тейть лофцоня.

Бабай, пирьфи нолдамак,

Ляпе кядьса потямак.

Бабась казанц потязе,

Уноконянц андозе.


Хронцов Данилась.

Шумбаз атя ярхцай –

Уноконяц эльсонза,

Цераняц вакссонза.

Бабась пици пачанят,

Рьвяняняц ваденди,

Вальмя лангса книганят,

Кие аф сувай, морафты,

Мокшень церат (стирьхть) тонафты.


Девятаев Сергейсь. Пиземонь серьгадемат – тя языческяй моронят, конат анайхть цебярь путкст.


Канин Максимсь.

Пиземня, вишкопт

Максан семишникт!


Канин Евгенийсь.

Пиземня, лоткак,

Максан селедкат.


Надина Софиясь.

Пиземня, пяконя!

Модась ули ляпоня,

Модась ули ляпоня,

Ласьконнтяма кяпоня!


Неяскина Аннась.

Тук, тук, пиземня,

Максан тондейть сараскя!

Анок штафкя, нардафкя
Карьхкянязон каяфкя!


Атманзин Кириллсь.

Кизоня, сак, сак,

Лямбе тунда, тук, тук,

Сетьме пизем кант, кант!

Сери серот макст, макст!


Ковышкина Анастасиясь. Приговоркат – тяаф оцю ладяф азондоманят, дразнякшнесазь нармоттнень и жувататнеь.


Чевтайкин Максимсь.

Кшу, кавал,

Аф лефкс максан,

Пси кев нярезт!

Аф туй мялезт,

Толмар нярезт!


Макарова Ксюшась.

Ай, цибоз, цибоз,

Шяй кучкаса пизоц!

Нильгемонь алоц,

Киндивок аш пароц!


Тестов Дмитрийсь. Лувондоманят – тя колендемань ушеткс, штоба содамс кинди ушедомс вятемс колендемать.


Базаркин Дмитрийсь.

Чакш панда пряса,

Нярьхкамазонь калдазса

Нармонць ярхцай сурода,

Мон кундайне пулода.

Нармонць ярхцай чакшста,

Мон кундайне пакшта


Девятаев Сергейсь.

Червень, бервень,

Чуха, рюха!

Бета, сота,

Ива, дуба,

Мака, крест!


Кирдишкин Максимсь.

Яку-баку, шейдаку,

Дару-бару, беляку!

Шеем-боюм, Сёкусь лиссь,

Ванды ули мани шись!


Чепайкина Кристинась. Валонь мянцемкат - тя кочкаф валхт, штоба синь вельдест шабатне тонадольхть лац корхтама.


Хронцов Данилась.

Атямъёнкс – мазы понкс.


Чевтайкин Максимсь.

Сура пача- Мария,

А розь пача – Дария.


Надин Сергейсь.

Тинге тингозе,

Кшнинь тинге лангозе.


Шумкина Анастасиясь. Дразнямат – тя аф оцю ладяф азондоманят, конатнень мархта шабатне фкя фкянь дразнесихть.


Тестов Дмитрийсь.

Брди-брди, аварди,

Эзем алу кевори,

Копонь кедец неволим.


Канин Евгенийсь.

Яшка, Яшка, кялец у-у-утяшка!



Надин Сергейсь.

Ай, Юри, Юри,

Сембонь мархта тюри!


Неяскина Аннась.

Яку, Яку, сакалу,

Авац ваясь аксялу!


Базаркин Дмитрийсь.

Сандорня, Сандорня!

Сонць, кода кандорня.

Якай фалу пупорязь,

Атекш лаца кукоряй.

Тевонь тиемста нувай,

Сятяв ломань лангс увай.


Надина Софиясь.

Вярде песа Мару,

Бзнай, кода кару.


Равочкина Евгениясь.

Чили-Васили,

Очконяса эшеляй,

Сонць тараканшка,

Пекоц барабаншка.

Вася моли тятярди,

Мековасу нятярди.


Атманзин Кириллсь.

Анна, Анна,

Тусь казань ванома.

Казась велясь,

Аннась кенярдсь.

Тестов Дмитрийсь. Ёфкссь – тя фольклоронь жанра, коса азондови думандаф азкс.

Ёфкс «Кода сявась кудня тись»


Лисихть Азондысь и няфтихне.


Азондысь. Весть сявась лефкскянянзонды корхтай:


Сявась. Аряда вири, эстейнек тихтяма кудня и карматамаэряма куднясонк. Штоба сельмоневок афольхть няе тя азораваньконь лангс, кирнесамазь кардоняса.


Азондысь. Кодак нолдазень азоравась кардоняста синь, ардозь тусть вири. Ардсть вири. Кармасть вешендема васта, коза бы тиемс кудня.

Нажядсь сявась вирень марлюняти и корхтай:


Сявась. Марлюня, марлюня! Можна тараткятнень алу кудня тиемс?


Марлюнясь. Тят тиенде монь алон кудня, Марьняня прайхть, и тонь лефкскятне шавовихть. Архт нинге козовок.


Азондысь. Тусь Сявась кузняти:


Сявась. Кузня, кузня, можна тонь алот кудня тиян?


Кузнясь. Тят тиенде. Кузмарьняня прайхть, и тонь лефкскятне шавовихть. Мук сяда цебярь вастоня.


Азондысь. Тусь Сявась лефксканзон мархта сяда ичкози. Няезе сери тумоть и корхтай тейнза:


Сявась. Тума, тума, можна тонь алот кудня тиян?


Тумось. Тят тиенде кудня монь алон. Сёксенда монь лангстон прайхть церятне, и тонь лефкскятне шавовихть. Тонць кармат пичетькшнема.


Азондысь. Тусь Сявась поюти.


Сявась. Пою, пою, можна тонь алот кудня тиян?

Азондысь. Поюсь шукадезень таратканзон и лопанянзон:


Поюсь. Монь лопаняня шинек-венек либорьдихть. Тонь лефкскятненди аф максыхть пинге удомс. Мук сяда цебярь вастоня.


Азондысь. Мезевок аф тият, тусь Свяась лефксканзон мархта сяда ичкози. Нажядсь келуняти:


Сявась. Келуня, келуня, можна тонь алот кудня тиян?


Азондысь. Шерьхкозевсь келунясь и корхтай:


Келунясь. Мон тонь лефкскятнень псида ванфтсайне, пиземда и вармада кяшеньсайне. Тик мон алон кудня.


Азондысь. Кенярдсь Сявась. Тись келуть алу кудня и кармась тоса эряма эсь лефксканзон мархта.


Марнек шабатне лисихть. Воспитательсь корхтай.


Воспитательсь. Вов и аделавсь минь иланьке.

Кельгома ялгат, тячиень илась няфтезе, што мокшень ломаттнень улихть соньцень мялямонза, улихть соньцень коенза и обуцянза. Тинць няесть, кодама мазы, козя мокшень кяльсь. Тясть юксне шачем-касом кяленьконь, корхнеда марзтонза и тонафнесть корхнема эсь иденттень и идень идьснон. Тясть юксне, што эсь кяльце – инь питнись!





Получите в подарок сайт учителя

Предмет: Начальные классы

Категория: Мероприятия

Целевая аудитория: 3 класс

Скачать
Сценарии сказок на мокшанском языке

Автор: Костькина Галина Степановна

Дата: 18.02.2019

Номер свидетельства: 500361

Похожие файлы

object(ArrayObject)#863 (1) {
  ["storage":"ArrayObject":private] => array(6) {
    ["title"] => string(71) "Сценарии сказок на мокшанском языке 2019"
    ["seo_title"] => string(43) "stsenarii_skazok_na_mokshanskom_iazyke_2019"
    ["file_id"] => string(6) "500364"
    ["category_seo"] => string(16) "nachalniyeKlassi"
    ["subcategory_seo"] => string(12) "meropriyatia"
    ["date"] => string(10) "1550508585"
  }
}

Получите в подарок сайт учителя

Видеоуроки для учителей

Курсы для учителей

ПОЛУЧИТЕ СВИДЕТЕЛЬСТВО МГНОВЕННО

Добавить свою работу

* Свидетельство о публикации выдается БЕСПЛАТНО, СРАЗУ же после добавления Вами Вашей работы на сайт

Удобный поиск материалов для учителей

Ваш личный кабинет
Проверка свидетельства