Музыка әлемінде

Сыныптан тыс ашық сабақ

Сабақтың тақырыбы: Музыка әлемінде
Сабақтың мақсаты: Оқушылардың музыкалық мәдениетін қалыптастыру, музыка арқылы рухани бай, адамгершілігі мол шығармашыл тұлғаны қалыптастыру
Сабақтың міндеттері:
1. Оқушылардың ақпараттық – технология арқылы музыкалық қабілеттерін дамыту.
2. Оқушыларды ұлттық музыка өнеріне, мәдениетіне деген сүйіспеншілікке тәрбиелеу.
3. Балалардың музыкалық әсерін кеңейту, шығармашылық белсенділіген арттыру.
Оқушыларды топтық жұмыста өзара ынтымақтастыққа:
топ ішінде бірлесіп жұмыс жасау арқылы, бір - бірінен үйренеді;
ортада ойларын саралап жеткізуіне мүмкіндік болады;
жұмыс әрекетінде бір - бірін тыңдау, қолдау арқылы білім мазмұнын игеруге қол жеткізеді;
музыка тыңдау және ән айту ережелерін еске түсіреді;
Оқыту технологиясы:
1. Ақпараттық технология
2. Ұжымдық оқыту технологиясы.
3. Ойын технологиясы.
4. Сыни тұрғыдан ойлау технологиясы.
Сабақтың типі: жаңа білімді игерту
Сабақтың түрі: сыныптан тыс ашық сабақ.
Сабақтың әдістері: кіріспе сұрақтары, үлестірмелі парақ, БҮҮ кестесі, бағалау сұрақтары, музыкалық - дидактикалық ойындар;
Сабаққа қажетті құралдар мен көрнекіліктер:
1. Құралдар: мультимедия, интерактивті тақта, электронды оқулық, компьютер, ән - күй таспа, маркерлік тақта, маркер, музыкалық аспаптар;
2. Көрнекіліктер: Суреттер, слайдтар, тапсырмалар кестесі, бағалау кестесі;
Пәнаралық байланыс: ана тілі жаратылыс тану, тарих, бейнелеу өнері;
Күтілетін нәтиже: Балалардың жалпы музыкалық сауаттылығымен халық музыкасы және кәсіби музыка жайлы білімдерін тексеру, бағалау.
6. Кері әсер парағы. ( Бүгін мен не үйрендім? Маған не ұнады, не ұнамады? Жаңа сабақ бойынша сұрақ немесе пікірің...)

1. Ұйымдастыру кезеңі. Қызығушылықты ояту.
Сабақтың тақырыбы мен мақсаты хабарланады.
«Музыка әлемінде»
Жүргізуші: Құрметті ұстаздар, оқушылар және қонақтар!
«Өнерлі өрге жүзер» атты «Өнер» бірлестігінің он күндігіне байланысты өтілейін деп отырған, 5 - 6 сыныптар арасындағы «Музыка әлемінде» атты саяхат сабағымызға қош келіпсіздер!
Сайысымызды бастамас бұрын, сайысқа қатысатын оқушыларымызды таныстырып өтуге рұқсат етіңіздер!
Бүгінгі сайысымыз да «Музыка патшалығына» саяхат жасайтын боласыздар! Сіздер қарсы болмассыздар деп ойлаймын.
Сахнаға Музыка патшайымы шығады. Жан - жағына таңдана қарайды.
Музыка патшайымы: Сендер кімсіңдер, қайдан келдіңдер?
Жүргізуші: Біз Тараз қаласындағы №36 мектептен келдік, сіздердің патшалыққа саяхат жасауға болады ма?
Музыка патшайымы: Әрине болады, білгім келеді, көргім келеді, үйренгім келеді дегендерге әрдайым есігіміз ашық. Қош келіпсіңдер! Менің ханша қызым қайда, қонақтарды қарсы алмайсың ба?!
Ханша қыз: Құп болады! Ханша қыз ән орындап береді.
Қалия Сейітқалықызының әні - Алақай.

Музыка патшайымы: Сіздерге ұнады ма? Музыка патшалығына келгендер міндетті түрде, менің жеті тапсырмамды орындайды. Дайынсыңдар ма балалар?! Менің нөкерлерім қайдасыңдар?
Сахнаға жеті нота шығып, би билеп ән салады. «Көңілді ән»
Музыка патшайымы: Менің мына нөкерлерімді танисыңдар ма? Онда қане бәріміз бірге - до, ре, ми, фа, соль, ля, си. Енді осы жеті нотаның тапсырмасын орындайсыңдар. Кімнің жеңгенін менің уәзірлерім анықтап, ұпай беріп отырады. Қай топтың жеңгенін, алған ұпайдың санына қарап анықтаймыз.
Әр топқа екі сандықша береміз. Осы сандықшаға ұпайларыңды саласыңдар.
Дайын болсаңдар, бірінші тапсырманы алып келіңдер!
До нотасы музыка әуенімен билеп келіп, ханшаға тапсырма салған конвертті береді.
Ханша қыз конвертті ашып, ішінен екі қағазды алады. Екі топтан екі оқушы шығып, тапсырманы таңдап алады.

1 - ші тапсырма - суреттегі ноталардың ұзақтығын атап, санап беру.
Музыка патшайымы өзінің уәзірлерімен ақылдасып, сандықшаларға ұпайларын салады.
2 - ші тапсырманы музыка әуенімен, би билеп, ре нотасы ханшаға конвертті береді.
2 - ші тапсырма «Музыкалық жұмбақ» Сурет бойынша, музыка тыңдап, шығарманың атын, авторын табу. Бұл тапсырма бойынша, «Күй сарайына» барамыз.
3 - ші тапсырманы ми нотасы ханшаға әкеліп береді.
3 - ші тапсырма: Әнді тыңдап, қай ән екенін тауып жатқа орындап береді. Бұл тапсырма бойынша «Ән сарайына» барасыңдар.
Айтылатын әндер: «Балбұлақ» Қалия Сейітқалыққызы, «Балдәурен» Ш. Сариев, Е. Следтинов.
4 - ші тапсырманы фа нотасы әкеледі.
4 - ші тапсырма: «Музыкалық аспаптар» сарайына барып, аспаптардың үнін естіп, қай аспап екенін табу.
5 - ші тапсырманы соль нотасы алып келеді.
5 - ші тапсырма: берілген ноталарды нота сызығындағы өз орнына орналастыру.
6 – шы тапсырманы ля нотасы ханшаға әкеліп береді.
6 - шы тапсырма: Композитордың суретіне қарап, кім және қандай шығармаларын бар екенін топтастыру әдістері бойынша топтастырады.
Арасындағы үзілісте Музыка патшайымы ән орындайды.
7 - ші тапсырманы си нотасы әкеледі.
7 - ші тапсырма: Қазақ жалқының салт дәстүрлерімен ұлттық ойындары туралы суретке қарап атайды. Салт - дәстүр мен ұлттық ойынның ішінен таңдап, ойнап көрсетеді. Мысылы: бесікке салу, жар - жар, асық ойнау, қыз қуу т. б.

Музыка патшайымы: Осымен біздің тапсырмамыз аяқталды. Сендер менің барлық тапсырмамды орындадыңдар. Сандықшаларды ашып, ұпайларыңды санаймыз, екі топта менің ойымнан шықты. Мынау сендердің мақтау қағаздарың мен сыйлықтарың! Мақтау қағаздар мен сыйлықтарды тапсырады.
Сендерге «Музыка патшалығының» есігі әрдайым ашық. Кез келген уақытта сендерді қуана қарсы алуға дайынмын. Өз халықтарыңның музыкасын, өнерін қастерлеп, сақтап жүріңдер. Қазақ халқының музыкасы сендердей ұрпағы барда мәңгі жасай береді!

Жүргізуші: Осымен «Музыка әлемінде» саяхат сабағымыз аяқталды.
Музыка сабағынан алған білімдеріңді саяхат барысында жақсы көрсете білдіңдер. Музыка біздің өмірімізде өте маңызды роль атқарады. Сондықтан да тек музыка сабағында ғана ән айтып, музыка тыңдамай, кез келген уақытта ән айтып, күй тыңдап жүрсеңдер, үнемі көңілді, шаршамай жүріп, өмірде кездесетін кез келген қиындықты жеңетіндеріңе кәміл сенемін!
Бүгінгі сабағымызды халқымыздың мынадай дана сөзімен аяқтағым келіп отыр: «Ақылың болса ән тыңда!»