«Жаңартылған білім беру мазмұны »

Исмагамбетова Анаргуль Умирбековна

                                                                                        Новый орта мектебінің

                                                                                        информатика пәнінің мұғалімі

«Жаңартылған білім беру мазмұны »

Эссе

                                         «Мен саған балық берсем, сен бірақ күн тоқ боласын, ал енді

                                          мен саған қармақпен қалай балық аулауды үйретсем, сен

                                           өмір бойы тоқ боласың»

Қытай қайраткері Конфуций

Білім - қоғамды әлеуметтік, мәдени-ғылыми прогреспен қамтамасыз ететін ғажайып құбылыс, адам үшін де, қоғам үшін де ең жоғары құндылық. Оның ең негізгі қызметі - адамның менталитетін, адамгершілігін, шығармашылық қабілетін қалыптастыру, дамыту. Осыған орай егеменді еліміз өзінің дамуының ең басты алғы шарты - білім беру жүйесінің білім ғасырындағы міндеті мен мазмұнын айқындап берді.

Бүгінгі біздің алдымызда тұрған үлкен міндет – оқытудың жаңа технологияларын қолдана отырып, саналы, салауатты, жан – жақты дамыған, рухани бай, заман талабын орындай білетін тұлғаны тәрбиелеп дамыту. Мұғалімнің мәртебесіне лайық болу мақсатында, өзімнің кәсіби шеберлігімді шыңдап дамыту мақсатында «АКТ және информатика» пәні бойынша жаңартылған білім мазмұның жаңарту аясында курстан өтіп жатырмын. Осы курсқа қатысқаныма қуаныштымын. Себебі, оқушылармен жұмыс істеуге бұл бағдарламаның берері көп. Бағдарлама оқушы, мұғалім, ата-аналардың бірлесіп жұмыс жасауына бағытталған. Курс барысында білім мазмұнын жаңарту аясында  ең алдымен Қазақстанның әрбір облыстарынан келген мұғалімдермен таныстым. Жаңа дос, жаңа білім, жаңа әдіс-тәсілдер алдым деп айта аламын. Бұл жаңартылған білім өзімнің оқыған ІІІ деңгей курсымен салыстыра отырып, маған үлкен жаңалық әкелгендей болды. Себебі, бұл курста сабақ құрылымын құруда айырмашылықтар барын байқадым.
           Бағдарламаның негізгі міндеті - мұғалімдерге педагогикалық тәжірибесін жетілдіру мен бағалауға бағыттау. Сондықтан білім беру мен оқытудың қазіргі заманғы әдістері мұғалімнің күнделікті тәжірибесінде қарастырылуы тиіс.
Оқушының адам ретінде қалыптасуы белсенділік арқылы жүзеге асады. Жаңа технологияның басты мақсаттарының бірі - баланы оқыта отырып, оның еркіндігін, белсенділігін қалыптастыру, өз бетінше шешім қабылдауға дағдыландыру.

Қазіргі  базалық білім беру – жеткілікті  білімнің төменгі шегі. Бұлар оқытудың деңгейіне сәйкес оқушыны саралап оқытуға ыңғайлы, әрі оқу бағдарламасы бойынша оқушының жас ерекшелігі мен білім деңгейіне сай құрылып, оқулыққа қосымша пайдалануға беріледі. Оқушыны деңгейіне бөліп оқыту үшін сабақ жаңаша жоспарланады. Оқушыларға деңгейлік тапсырмалар беру арқылы сан түрлі жұмыс жүргізіледі. Оқушының алған білімін жүзеге асыра алатындығы тексеріледі. Өз бетімен жұмысты орындауға бейімділігі бақылауға алынады. Қорытындысында  деңгейлік тапсырмалар арқылы жұмыс жасаудың тиімділігі байқалады. Оқушының белсенділігі мен іскерлігі артып шығармашылыққа ұмтылады. Бұл курс барысында біліктілікке жетеді.

Бағалауға тоқталатын болсам, оқушыларды дүниежүзілік білім жүйесінде қолданылатын рейтинг - ұпай әдісіне баулу. Тапсырмалар  рейтинг - ұпай - балл жинау әдісімен бағаланатынын ескерсек, оқушылардың деңгейлік сабақ өткеннен кейін де сол тапсырмаларда жіберген қателіктеріне, тапсырмаларын орындауда қолданған тәсілдеріне анализ жасап, қателіктері мен кемшіліктерін анықтай білуге мүмкіндік береді.  Келесі  тапсырмаларда оқушы неғұрлым көбірек ұпай жинау үшін ізденіп оқытушыдан, жолдастарынан, қосымша материалдардан білім жинайды.
Бұл  бағдарламада бірінші орында оқушы тұрады және өз бетімен білім алудағы белсенділігіне аса назар аударады.

Қорыта келе, еліміздің білім беру жүйесін 2015 жылға дамыту тұжырымдамасында: «Жылдам өзгеріп отыратын заманда алынған білімнің, кәсіби дағдылардың негізінде еркін бағдарлай білетін, өзін - өзі іске асыруға, өзін - өзі дамытуға және өз бетінше дұрыс, адамгершілік тұрғысынан жауапты шешімдер қабылдауға қабілетті жеке тұлғаны қалыптастыру» деп нақты көрсетілген. Осы мақсаттың жүзеге асырыла бастауының бірден бір себебі - осы жаңартылған білім мазмұны деуге болады. Оның тиімді жақтары басым, әрі қарай өз тәжірибемде жетілдіремін, сабағымның құрылымы мен құрылысы өзгереді, және әріптестеріммен тәжірибемді бөлісемін деген ойдамын.