Кіріктірілген функциялар

Кіріктірілген функциялар. 1-сабақ

Кестелік редакторда есептеулер үшін кіріктірілген функциялар қолданылады.

Кіріктірілген функция – нақты амалдарды орындауға арналған, арнайы атауы бар бағдарламаланған формула. Барлық функциялар категорияларға бөлінеді.

Функциялар аргументтерден тұрады. Аргументтер диапазон, сілтеме, тұрақты, формула, мәтін немесе басқа функциялардың нәтижелері түрінде бола алады.

Диапазондар көбіне функциялармен жұмыс жасағанда қолданылады.

Диапазон – екі адреспен анықталатын көршілес ұяшықтардың блогы. Диапазон «:» таңбасымен бөлінген ұяшықтар адресінің көмегімен жазылады. 1-суретте 8 ұяшықтан тұратын В2:С5 ұяшықтар диапазоны көрсетілген.

1-сурет

Функцияны 3 әдістің бірімен қосуға болады:

1. 2-суретте «Функцияны кірістіру» терезесі көрсетілген. Терезені шақыру үшін fx пиктограммасын басу қажет.

2-сурет

1. 3-суретке көңіл бөл. Функцияны шақыру үшін, формула жолында атауын теру керек.

3-сурет

1. 4-суретте Функция кітапханасынан функцияларды таңдау көрсетілген.

4-сурет

Жиі қолданылатын математикалық функцияларға жатады:

• SUM(сандар) – аргумент болатын барлық сандардың қосындысын есептейді;

• ABS(Х) – Х санының модулін қайтаруға жауап береді;

• PRODUCT(сандар) – аргументтердің көбейтіндісін орындайды.

Статистикалық функцияларға жатады:

• MAX(сандар) – аргументтер тізімінен санның максимал мәнін табады;

• MIN(сандар) - аргументтер тізімінен санның минимал мәнін табады;

• COUNT(диапазон) – көрсетілген ұяшықтар диапазонынан сандар бар ұяшықтардың санын есептейді;

• COUNTIF(диапазон, шарт) – берілген шартқа сәйкес диапазондағы бос емес ұяшықтардың санын есептейді;

• AVERAGE(сандар) – көрсетілген аргументтер үшін арифметикалық орташасын есептейді.

B1, B2, B3, B4 ұяшықтарында сақталған сандардың арифметикалық орташасын есептеу үшін 2 әдіс қолдануға болады.

Бірінші әдісте өз формулаңды құруға болады:

=(B1+B2+B3+B4)/4

Екінші әдісте функцияны қолдануға болады:

=AVERAGE(B1:B4)

B1:B4 ұяшықтар диапазоны функцияның аргументы болып табылады.

Екі әдісті салыстыру нәтижесінен функцияны қолданғанда формуланың ықшамдалатынын байқауға болады.

5-суретте жауын-шашын түскен қалалардың санын анықтайтын кесте көрсетілген.

5-сурет

В7 ұяшығы «=COUNT(B3:B6)» формуласынан тұрады, мұндағы COUNT – функция, ал B3:B6 ұяшықтар диапазоны – аргумент. Нәтижесінде жауын-шашын түскен қалалардың саны есептеледі.

Жауын-шашынсыз қалалардың санын есептеу үшін COUNTIF функциясын қолдану қажет. Нәтижесі 6-суретте көрсетілген.

6-сурет

В7 ұяшығы «=COUNTIF(B3:B6; «жауын-шашынсыз»)» формуласынан тұрады, мұндағы COUNTIF – функция. Бұл функция екі аргументтен тұрады: B3:B6 ұяшықтар диапазонынан және іріктеуге арналған «жауын-шашынсыз» шартынан. Аргументтер «;» таңбасымен ажыратылады.

Аргументтерді ыңғайлы түрде енгізу үшін 7-суретте көрсетілген терезе қолданылады.

7-сурет