Баскетбол элементтері бар қозғалмалы ойындар.

Пәні: Дене тәрбиесі.

Пән мұғалімі: Нұртазин Асылбек Қайыркенұлы.

Өткізілетін сыныбы: 3 «а» сыныбы

Өткізілетін күні: 12.03.2016 ж

Сабақтың тақырыбы: Баскетбол элементтері бар қозғалмалы ойындар.
Сабақтың мақсаты: 1) Баскетбол ойынындағы қозғалмалы әдістерді үйрету.
2) Оқушылардың икемділігін, ептілігін жетілдіру.
3) Спортқа деген сүйіспеншілігін арттыру.
Сабақтың өтетін орны: Мектеп спорт кешені.
Керек құрал-жабдықтар: Баскетбол доптары, ысқырық, кедергілер.

I. Кіріспе бөлім: 12 минут
Сапқа тұрғызу, рапорт қабылдау, сәлемдесу, түгендеу.
Сабақтың тақырыбы және мақсатын таныстыру.
Саптық жаттығулар: Оңға! Солға! Артқа бұрылу.
Жүру жаттығулары: Екі қолды алға және екі жанға соза тепе-теңдікті сақтай жүру.
Қолды жоғары тік көтеріп, аяқтың ұшымен жүру, екі қол желкеде өкшемен жүру, аяқтың ішкі, сыртқы жағымен жүру, жартылай отыра және толық отырып жүру.

Жүгіру жаттығулары: Саппен ирек жүгіріспен жүгіру. Аяқты өкшеге тигізе жүгіру, екі тізені биік көтере жүгіру, оң (сол) жақ иықпен тіркемелі адыммен жүгіру, арқамен жүгіру.

Секіру жаттығулары: Екі қол белде қос аяқтап секіру, екі қол белде оң (сол) аяқпен кезектесіп секіру. Жәй жүріс, терең тыныс алып демалу.

Жалпы дамыту жаттығулары: Бір қатардан, екі қатарлы лек тұрғызып дене мүшелерінің буындарына жаттығу жасату.

Бастапқы қалып аяқ арасы иық кеңдігінде, мойынға арналған жаттығу, екі қол белде (Б. қ. а. и. к. ) басты оңға 4 рет, солға 4 рет айналдыру.
Б. қ. а. и. к. оң қол жоғарыда, сол қол төменде, 4 реттен қолды кезектесе сермейміз.
Б. қ. а. и. к. қолдың басы иықта, 4 рет алдыға, 4 рет артқа айналдыру. Б. қ. а. и. к. қол кеуде алдында шынтақтан бүгулі. 4 рет қолды жазбай сермейміз, 4 рет жазып сермейміз. Жаттығуларды оңға, солға жасаймыз.
Б. қ. а. и. к. екі қол белде, оңға (солға) , алға(артқа) иілу.
Б. қ. а. и. к. Екі қол белде, оңға, (солға) 4 реттен белді айналдыру.
Б. қ. а. и. к. қол тізеде, аяқты ішке, сыртқа 4 реттен айналдыру.
Б. қ. а. и. к. отырып, тұру; қолды бүгіп, жазу.
Бір қатар сапқа тұрғызу.
Жаттығуларды толық жасауын қадағалау.

II. Негізгі бөлім: 28 минут
Сапқа тұрғызу.
Оқушыларға баскетбол элементтері бар қозғалмалы
ойын түрлерін түсіндіру, іс-тәжірибе жүзінде көрсету.
Оқушыларды қауіпсіздік ережесімен таныстыру.
Оқушыларға жаттығуларды орындату:
- бір орында тұрып допты жерге соғып, ыршытып жаттығу;
- допты бір қолмен жетелеп жүріп, жерге соғып ыршыту;
- екіден қарама-қарсы тұрып, допты екі қолмен кезек жерге соғып, ыршытып, қарсыласына екі қолмен кеуде тұстан лақтыру;
- екі-екіден қатар жүгіріп келе жатып, допты жерге соғып ыршытып, тоқтамай бір-біріне кеуде тұстан лақтырып жаттығу;
Оқушыларды екі топқа бөліп, баскетбол элементтері бар эстафеталық ойындар:
-

-кедергінің арасынан допты соғып алып өту;
- допты жоғарыдан беру;
- допты төменнен беру;
- бірден алаңның ортасынан баскетбол қалқанына қарай допты ыршытып келіп, қалқанға жақындағанда тоқтай қалып, допты шығыршыққа екі қолмен лақтырып түсіруге тырысу;
Жаттығуларды дұрыс жасауын қадағалау.

III. Қорытынды бөлімі: 5 минут
Сапқа тұрғызу.
Сабаққа жақсы қатысқан оқушыларды мадақтау, кеткен кемшіліктері мен жіберген қателіктерін айтып ескерту.
Бағалау.
Үй тапсырмасы: Жаттығуларды қайталау. Екі қатарға тұрғызып саппен залдан шығару.