Тақырыбы: «Көңілі көтеріңкі ұстаздың, еңбегі де жемісті»
Мақсаты: Мұғалімдердің психикалық көңіл-күйлерін көтеру, шығармашылық қабілеттерін бағалай білу, өздеріне құрметпен қарау, дұрыс қарым-қатынас орната білу.
Тренинг сабағының барысы: Сәлеметсіздер ме! Бүгінгі өткізілетін психологиялық тренингке қош келіпсіздер! Бүгін сіздердің психикалық көңіл-күйлеріңізді көтеруге, өз бойларыңыздағы шығармашылық қабілеттеріңізді бағалай білуге, өз-өзіңізге құрметпен қарауға, бір-бірімізбен сыйластық қарым-қатынаста болуға арналған тренингке ұйымшылдықпен қатысуға шақырамын.
1. «Бір-бірімізбен амандасайық»
Мақсаты - бір –біріне жақын болуға, бір-бірін түсіне білуге, тренингке қатысушылар арасында жағымды атмосфера қалыптастыру.
І нұсқа: оң және сол жақ көршілеріңізбен құшақтасып амандасамыз.
ІІ нұсқа: арқаларыңызды тигізу арқылы
ІІІ нұсқа: оң және сол жақ тізелеріңізді тигізу арқылы
ІV нұсқа: мұрындарыңызды тигізу арқылы
2. «Құнды қасиеттерді жинау» жаттығуы.
Ең алдымен жүргізуші бастайды. Шарды алып, «Мен сізге шарды беремін, себебі сіз. қайырымды адамсыз». Әр қатысушы шарды алып, жалғастырады. Сөйтіп барлық қатысушы өз ойын айтып шығуы керек.
3. «Оның есесіне мен.» жаттығуы.
Барлық қатысушыларға аяқталмаған сөйлемдері бар карточкалар таратылады. Сөйлемдерді әр қатысушы өз ойымен аяқтайды.
- Мен бәліш пісіре алмаймын, оның есесіне...
- Мен шаршадым, оның есесіне..
- Мен жақсы билей алмаймын, оның есесіне..
- Мен көп үндемейтін адаммын, оның есесіне..
- Мен көп ұйықтаймын, бірақ оның есесіне..
- Мен жұрттың бәріне құрметті бола алмаймын, оның есесіне..
- Мен еден жууды ұнатпаймын, оның есесіне..
- Мен Үндістанда болған жоқпын, оның есесіне..
- Мен пәлендей батыл емеспін, оның есесіне...
- Мен өзім туралы көп ойламаймын, оның есесіне..
- Мен тез ашуланғыш адаммын, оның есесіне...
- Мен соншалықты сымбатты емеспін, оның есесіне..
- Мен тым толықпын, оның есесіне..
- Менің аяқтарым ұзын емес, оның есесіне..
- Менің кемшіліктерім көп, оның есесіне..
- Менің жазуым әдемі емес, оның есесіне...
4. «Менің мінезім» ойыны.
Мақсаты: Өзіне деген сенімділігін, өзін тануға деген қабілеттерін анықтау.
Әрбір қатысушы білезіктей шеңбер сызып, оны төртке бөледі.
Әр бөлікке төмендегі жануар,аң, құс аттарын жазып шығады.
Түйе, Жылқы, Сиыр, Қой, Ешкі, Ит, Мысық, Тауық, Қаз, Аққу, Қарлығаш,
Үйрек, Бұлбұл, Арыстан, Қасқыр, Түлкі, Маймыл, Қоян, Тауешкі, Тасбақа,
Жылан, Балық.
Соңында 1. Үйде, 2. Жұмыста, 3. Жолдастарының арасында, 4. Өзіндік баға деп бөлінген бөліктерге жазылған жануарлар, құстар адамның сол бөлікке қатысты мінездемелермен танысады.
Жауабы:
1. Түйе- шыдамды
2. Жылқы- тектілік
3. Сиыр- өкпелегіш
4. Қой- жайдарлылық
5. Ешкі- ұйымдастырушылық
6. Ит- адалдық
7. Мысық- биөрісі басым адамдар
8. Тауық- шығармашыл
9. Қаз- тазалық
10. Аққу- сезімтал
11. Қарлығаш- бауырмал
12. Үйрек- ұқыптылық
13. Бұлбұл- әнді жақсы көретін
14. Арыстан- қайратты
15. Қасқыр- жігерлі
16. Түлкі- бейімделгіш
17. Маймыл- әртістік қабілеті бар
18. Қоян- елгезек
19. Тауешкі- талғамы жоғары
20. Тасбақа- мейірімді
21. Жылан- салқынқанды
22. Балық- еркіндікті қалайды
Талдау: жаттығудан алған әсеріңіз? Өзіңізді теңеу қиын болды ма?
Қорытынды: «Көңілі көтеріңкі ұстаздың, еңбегі де жемісті!» тренинг сабағының соңына да келіп жеттік. Бірақ біздің жолымыз біткен жоқ, біз әрдайым қозғалыстамыз. Олай болса 21 - ғасырдың жаңашыл педагогтары бола берейік!
Мен сіздерге шығармашылық табыстар тілеймін!
