Армысың, әз Наурыз !

Армысың, берекелі әз Наурыз!

Мақсаты: Қазақ халқының салт-дәстүрлерін қолдана отырып балалардың шығармашылығын арттыру,балаларға патриоттық тәрбие беру.

Хабаршы: Сүйінші! Сүйінші! Сүйінші! Көктем келді! «Балауса» балабақшасында Наурыз тойы басталды!Естімегендер естіңдер!Тойдан қалып қоймаңдар.

Жүргізуші: Құрметті ата-аналар, балабақша қызметкерлері,балалар!Сіздерді Наурыз мерекесімен құттықтаймыз.Наурыз бәрімізге бақ-береке әкелсін!

                    Жарқырап тұр күніміз,

                    Жайқалсын жас гүліміз,

                    Бақта бұл-бұл сайрасын,

                    Мерейін төксін көкте күн.

                    Мерекесін көктемнің,

                    Бүкіл әлем тойласын.

Балалар тақпақтары

Жүргізуші:

Наурыз тойым,

Құтты болсын халайық!

Қане достар!

Шырқап әнге салайық!

Ән: «Сағындым әже» орындайтын Қасым Мерей

Жүргізуші: Наурыз ұлыстың ұлы күні.Наурыз мұсылман қауымның ұлттық мейрамы.Наурызда табиғат оянады, қоршаған ортаның бәрі жаңарып күн мен түн теңеледі.Жұртшылық өз үйін,ауласын тазартады.Әдемі киімдерін киіп,бір-біріне қонаққа барады, шын көңілден сыйлықтар сыйлайды.Бұл күні барлық реніштер ұмытылады.Сүйікті әжелеріміз қонаққа келеді.

Әже: Сәлеметсіңдер ме, менің кішкентай немерелерім.Ұлыстың ұлы күні құтты болсын!Қазақтың дәстүрі бойынша ұлыстың ұлы күнінде Наурыз көже дайындалады.

(Әже балалармен бірге Наурыз көжені қалай дайындау керектігін қонақтарға көрсетеді.)

Би: «Қамажай»

Жүргізуші: Наурыз Салт-дәстүр мерекесі! Сол салт-дәстүрлеріміздің бірі «Ашамайға мінгізу».Бүгін біз Әлемжанды үлкен азамат болсын деп атқа мінгіземіз.

«Ашамайға отыргызу» дәстүрін көрсету.

Жүргізуші: Ұл баланы атқа мінгізген кезде оған тілектер айтылады. Әлемжанға өз тілектерін білдіруге достары келді.

Арсылан: Басыңа бақ қонсын! (бөрік сыйлайды)

Алдияр: Үлкен азамат бол! (шапан жабады)

Темірлан: Батыр бол! (қамшы сыйлайды)

Әлемжанды әжесі атқа мінгізіп,қолына қамшы ұстатып,ауылды аралатады.

Ауылды аралап жүргенде шашу шашылады.

-Қашанда құт-береке орнасын!Бақытты бол! Үлкен азамат бол!

Жүргізуші:

Уа,халайық,құлақ сал!

Жақсылыққа қашанда,

Жан баласы тоймаған,

Жаңа жылдың басы деп,

Ақ жаулықты аналар!

Көңілі көктем жаны жаз,

Биязы мінез жеңгелер,

Кер маралдай керілген

Кең пейіл керім жеңгелер!

Той шашуы шашылсын,

Шашудан құр қалмаңдар!

Ойын: «Теңге алу»

(Қаңбақ шал ұшып келеді)

Қаңбақ шал: Амансыңдар ма балалар,Наурыз тойы құтты болсын!

Жүргізуші: Сәлеметсіз бе,сіз кім боласыз?

Қаңбақ шал: Мен-қаңбақ шалмын!Өзім содай жеңілмін,жел қайда соқса,мен сонда ұшамын.Сондықтан мені қаңбақ деп атаған.

Жүргізуші: Сізді мұнда кім айдап алып келді?

Қаңбақ шал: Қу түлкі күн бермеді. Мен одан кетіп қалдым.

Жүргізуші: Ендеше бізбен біргеболыңыз.Біз Наурызды тойлап жатырмыз.Бізбен бірге ойнап,балалардың өнерін тамашалаңыз.

Ән: «Тұлпарым» орындайтын Қайнет Санжар

(Таусоғар кіріп келеді.)

Таусоғар: Шал қайда барасың?

Қаңбақ шал:Әлем кең,әлемде көп жол бар.Батырды кездестірмесем өзім батыр боламын.

Таусоғар: Охо! Өзің көріпкелсің ғой.Батыр болғың келсе,кел күшімізді сынайық.Тас лақтырып көрейік. (тасты алып лақтырады.) енді сенің кезегің. Қаңбақ шал тасты алып жоғарыға,төменге қарайды.

Таусоғар: Лақтырсаңшы.

Қаңбақ шал: Егер мына тасты жоғарыға лақтырсам,онда аспан айналып жерге түседі.

Таусоғар: Ой,шал сенің күшіңе сенемін.Тек тасты тастай көрме,екеумізге де қиын болады.Бұл жерден тезірек кетейік.

Таусоғар қорыққаннан қашып кетеді.

Қаңбақ шал: Ақымақ Таусоғар,кішкентай шалмен күшін сынамақ болды.  (Жел тұрып қаңбақ шал ұшып кетеді)

Ойын: «Аударыспақ»

Жүргізуші: Енді тойымызды ата-аналардың ән шашуымен жалғастырамыз. Бата беру.