"Аналар мерекесі"

«Аналар мерекесі!»

Жүргізуші: Армысыздар, ақ жаулықты әжелер, ардақты да аяулы аналар, апайлар, сымбатты қыздар!

Міне, жыл аралатып көктемнің алғашқы күндерімен келетін 8 наурыз – Халықаралық әйелдер күні де келіп жетті. Жер бетіндегі тіршіліктің өзегін келешекке жалғаған, өсер ұрпағына құндақтағы шағынан ізгіліктің дәнін еккен аналар мерекесі бұл.

Армысың, ару қыздар, абзал ана,

Анаға тең келетін бар ма дана.

Мерекеңіз бүгінгі құтты болсын,

Қуанышпен құшағың гүлге толсын.

Балаға ең жақын Сіз – аналар, сіздің ыстық құшағыңыз балаға пана болар – әлемдегі ең ғажап, ең әсем сөз бұл Ана, ендеше құрметті аналар, балаларымыздың құттықтау тілектерін қабыл алыңыздар.

Ділнұр: Сәлем бердік аналарым,

Армысыңдар әжелер.

Бүгін біздің балабақша

Әсем әнмен тербелер.

Жүргізуші: Балалар, қазір қай мезгіл?

Балалар: қазір көктем мезгілі.

Залға бауырсақ жүгіріп кіріп, айналып жүгіреді.

Жүргізуші: ой, балалар, бұл не?

Балалар: бұл Бауырсақ!

Бауырсақ: мен көңілді Бауырсақпын!

Сендермен аналар мерекесін тойлауға

Апамнан да қаштым,

Атамнан да қаштым.

Бөлмеге қоян жүгіріп кіреді.

Жүргізуші: балалар, бұл не?

Балалар: бұл қоян!

Қоян: Бауырсақ, бауырсақ мен сені жеймін!

Бауырсақ: жемеші мені, мен саған өлең айтып беремін.

Апамнан да қаштым,

Атамнан да қаштым,

Сеннен де қашып кетемін!

Қоян: сен дәмдісің, мен сені жеймін!

Жүргізуші: балалар, Бауырсаққа көмектесейікші. Қоян неден қорқады?

Балалар: желден!

Жүргізуші: қане, үрлейікші . ....

Қоян секіріп-секіріп қашып кетеді.

Жүргізуші: балалар, тұрайық, «Ұзын құлақ, сұр қоян» жаттығуын жасайық.

Айдана: Бізді өсіріп баптаған

Жақсы болсаң шаттанған

«Алтыным» деп мақтанған

Айналайын ақ мамам!

Қасқыр кіріп келеді залға.

Жүргізуші: Балалар, бұл не?

Балалар: бұл қасқыр!

Қасқыр: Бауырсақ, бауырсақ мен сені жеймін!

Бауырсақ: жемеші мені, мен саған өлең айтып беремін!

Апамнан да қаштым,

Атамнан да қаштым.

Қояннан да қаштым,

Сеннен де қашып кетемін!

Қасқыр: Бауырсақ, мен сені бәрі бір жеймін!

Жүргізуші: балалар, Бауырсаққа көмектесейікші. Қасқыр неден қорқады?

Балалар: қасқыр иттен қорқады.

Жүргізуші: ит қайтеді? Қалай үреді?

Балалар: Аф-аф-аф!

Мұстафа: Әр сөзіңді жаттағам,

Жүрегімде сақтағам.

Анашым деп мақтанам,

Айналайын ақ мамам!

Жүргізуші: балалар, тұрайық, «Бала, бала балақан» өлеңін айтайықшы.

Қасқырдан құтылған Бауырсақ ары қарай домалап кетеді. Алдынан аю шығады.

Жүргізуші: Бұл не, балалар?

Балалар: бұл аю!

Аю: Бауырсақ, бауырсақ мен сені жеймін!

Бауырсақ: жемеші мені, мен саған өлең айтып беремін!

Апамнан да қаштым,

Атамнан да қаштым.

Қояннан да қаштым,

Қасқырдан да қаштым,

Сеннен де қашып кетемін!

Аю: Бауырсақ, бауырсақ мен сені бәрі бір жеймін!

Жүргізуші: балалар, Бауырсақты аю жеймін деп жатыр! Қане, тағы көмектесейікші. Аю неден қорқады?

Балалар: аю бал жақсы көреді, арадан қорқады.

Жүргізуші: онда ара қайтеді? Ж-Ж-Ж-Ж

Балалар: Ж-Ж-Ж-Ж!

Милана: Өмірдің қызығы,

Өзіңсіз өтпейді.

Мен үшін анама,

Ешкімде жетпейді.

Даниил: Ана – біздің күніміз,

Ана – біздің гүліміз.

Бар баланы қуантып,

Ұзақ өмір сүріңіз.

Бөлмеге түлкі кіреді.

Жүргізуші: балалар, бұл не?

Балалар: бұл түлкі!

Түлкі: Бауырсақ, бауырсақ мен сені жеймін!

Бауырсақ: жемеші мені, түлкі, мен саған өлең айтып беремін!

Апамнан да қаштым,

Атамнан да қаштым.

Қояннан да қаштым,

Қасқырдан да қаштым,

Аюдан да қаштым,

Сеннен де қашып кетемін!

Түлкі: Бауырсақ,әнің өзің сияқты тәтті екен. Алақаныма отырып, қайтадан айтып берші!

Бауырсақ: Иә, балалар, бірінші алақаныма отыр, сосын мұрныма отыр, сосын мені Аааа-ааап деп жеп қойғың келеді ғой. Жоқ, оданда дос болайық!

Жүргізуші. Иә, дұрыс айтасың, Бауырсақ, оданда бәріміз дос болып, аналар мерекесін тамашалайық! Қазір, бізге Ділнұр «Қошақаным» әнін айтып береді.

Жазда апамның аулына

Барып едім қыдырып

Бір қошақан алдымнан

Шықты ойнап жүгіріп

Қ-сы: Ақ маңдайлы ай мекен

Шекер ме екен бал ма екен?

Кеттім оны сағынып

Қошақаным қайда екен?

Атам оған жем берді,

Апам оған су берді

Қошақаным тойып алып

Тастан тасқа секірді.

Жүгізуші: рахмет, Ділнұр, балалар Ділнұрға шапалақ соғайық!

Дүниедегі ең кемеңгер дананы,

Ана табады, аялайды бағады.

Сол үшін құдіретіңе бас иіп,

Құрметтейік қасиетті ананы, - деп бүлдіршіндеріміздің аналарға арналған биін тамашалайық! (Милана, Айлана, Мұстафа, Айша).

Ата-аналармен ойын:

1.(екі жұмыртқа, екі қасық)

2. Балаларды көтеріп алып, кедергіден жүгіріп өту. (кегли)

Жүргізуші: Ал қане, балалар, орнымыздан тұрайық

Аяулы да алтын нұрлы анашым.

Жүрегіммен мәңгі бірге боласың

Сен асқарсың, сен аспансың, биіксің,

Сен дархансың, сен жомартсың, данасың, - деп, бүгінгі 8 наурыз - аналарымыздың мерекесіне арналған ертеңгілігімізді аяқтаймыз. Отбасыларыңыз аман болсын. Жүздеріңізден күлкі кетпесін. Еліміз аман, заманымыз тыныш болсын. Сау болыңыздар!

аналар мерекесіне арналған ертеңгілік

Үлкен Нарын, 2017жыл.