“Татарстан, б?хет ?ырым син” татар шагыйр?се Клара Булатованы? тууына 80 ел тулуга багышланган б?йр?мг? чыгыш.

“Татарстан, бәхет җырым син”

татар шагыйрәсе Клара Булатованың тууына

80 ел тулуга багышланган бәйрәмгә чыгыш.

Максат: Татар шагыйрәсе Клара Булатованың тормышы һәм иҗаты үрнәгендә яшьләрдә, балаларда Ватанга мәхәббәт һәм  милли үзаң тәрбияләү.
Бурычлар:
• Иҗатта үз-үзләрен күрсәтү өчен шартлар тудыру;
• Иҗади һәм профессиональ бәйләнешләрне ныгыту;
• Милли мәдәниятне һәм гореф-гадәтләрне торгызу һәм популярлаштыру;
• Яшь талантларның иҗатын пропагандалау.

Егет: Күрәсезме, дуслар, бүген көн нинди матур. Ә күк йөзенә игътибар итегез, бер болыт кисәге дә күренми чалт иткән аяз күк. Кояшы да чыгып тора. Ә таң алдыннан мин бер төш күрдем. Төшемдә мин бер бик матур күренешкә тап булдым. Урамда яз. Безнең мәктәп бакчасында күп-күп алмагачлар үсеп утыра. Алар бөтен дөньяны хуш искә күмеп ап-ак чәчәк атканнар. Алмагачка сандугачлар кунып сайрыйлар. Шул агачлар арасынан бер гүзәл зат килеп чыкты. Ул шундый матур, гүзәлләрнең гүзәле, иңнәренә матур ак шәл яулыгын ябынган. Ә кулына каләм һәм дәфтәр тоткан.

Уянып киттем дә бу нәрсәгә булыр икән дип уйланырга тотындым.

Кыз: Син төшеңдә татар шагыйрәсе Клара Булатованы күргәнсең. Быел Клара Булатованың тууына 80 ел була. Бүген шул уңайдан бәйрәмгә җыелдык.

Егет: У-У-Уф, дуслар, мин йокыдан уянмадыммы әллә, әллә төш күрүемне дәвам итәмме.

Сез кем? Клара Булатовамы?

Кыз: Юк, мин Саба районының Шәмәрдән лицее укучысы Гүзәл булам. Туган җирем Татарстан минем. Безгә Клара Булатованы бүләк иткән Татарстан.

Татарстан, бәхет җырым син.

Ак каеннар яшел яулык япкан,
Шомыртларым инде бөредә.
Беркая да китмим туган яктан,

Гомерем язы үткән биредә.

Таулар инде яшел куенын ачкан,

Колач җәйгән майга якты яр.

Беркая да китмим туган яктан,

Мондый ярлар тагын кайда бар?

Иңнәренә хәтфә булып яткан

Уҗымнар күзем алалмыйм.

Беркая да китмим туган яктан,

Яшәү көчен шунда табам мин.

Күкрәгеңнән кара алтын аккан,
Илгә җырлар биргән урын син.
Беркая да китмим туган яктан,

Татарстан, бәхет җырым син

Ак каеннар яшел яулык япкан,

Шомыртларым инде бөредә.

Беркая да китмим туган яктан,

Бәхет тулы тормыш биредә. (Клара Булатова)

Егет: Әйе, минем дә үземнең туган ягымнан беркая да китәсем килми. Туган илемне яратам. Әти-әниемне, туганнарымны, укытучыларымны яратам. Син беләсеңме Клара Булатова да аның әти-әнисе дә укытучы булганнар. Шуңа күрә дә ул үзенең күп кенә шигырләрен укытучыларга багышлаган.

Укытучы апаң йокламаган.

Абажурлы зәңгәр лампасыннан

Өстәленә якты сибелгән.

Дәфтәрләр дә инде тикшерелгән,

Планнар да күптән төзелгән.

Ә ул әле һаман йокламаган,

Төн йокысын нәрсә алган соң?

Сәбәбе син, Азат.

Син дә бүген

Язма эштә “5”ле алгансың.

Табельдәге синең “3”леләрне

Алыштырсын өчен шул билге.

Ничә төне ялсыз үтте аның,

Йөрәк көче күпме түгелде.

Күзләрендә бүген борчу түгел,

Шатлык яна синең җиңүдән.

Алда ята дәрес планнары,

Дәфтәрләре янда өелгән.

Син йоклыйсың татлы төшләр күреп,

Әнкәң җәйгән җылы урыныңда.

Укытучы апаң керфек какмый,

Һаман уйлый синең турында. (Клара Булатова)

Кыз: Әйе, укытучы булу җинел хезмәт түгел. Ул барыбыз өчен дә төн йокыларын калдырып, хезмәт түккән. Шагыйрьләрне шигырь язарга этәрүче дә укытучыдыр ул мөгаен.