Сабақтың мақсаты: білімділік-мағыналары бір-біріне жақын сөздер, яғни синоним сөздер туралы мәлімет беру;
Дамытушылық- оқушылардың өз бетінше ізденіспен топта жұмыс істеу қабілеттерін дамыту, басқаларды тыңдау, өз көз қарасын дәлелдеп білу, сонымен бірге қазақ тілінің лексика тарауынан алған білімдерін арттыру;
Сабақтың әдіс-тәсілі: түсіндіру, сұрақ-жауап, жаттығулар орындау, т.б.
Сабақтың барысы: 1) Ұйымдастыру кезеңі; Сынып оқушыларын ұйымдастырып, сабаққа бейімдеу.
2) Үй тапсырмасын тексеру; 1. Омонимдер туралы түсінік
2. 69- жаттығу.
3)Жаңа сабақ;
Мағыналары бір-біріне жақын , бірақ әртүрлі дыбысталып айтылатын сөздер тобы синонимдер деп аталады. Синонимдер мынандай белгілеріне қарай топтастырылады:
1)сөздің дыбысталуында өзгешелік болуы керек;
2)сөздер бір ғана ұғымды білдіруі керек;
3)сөздер бір ғана сөз табына қатысты болуы тиіс.
Синонимдер мәтінде бірін-бірі алмастырған жағдайда бір ғана сөйлем мүшесінің ( не толықтауыштың, не анықтауыштың, не пысықтауыштың, не баяндауыштың, не бастауыштың) қызметін атқарады. Мысалы , ас, тамақ, ауқат, дәм, тағам дегендер- бір –біріне синонимдес сөздер.Бұлар дыбысталуы, жазылуы жағынан әртүрлі. Бірақ бәрінің беретін ұғымы – адам баласының жейтін қоректік заты.Бесеуде де сөз табы жағынан зат есім болады. Қонақтарға арналған ас өте дәмді болды деген сөйлемдегі ас сөзінің орнына қайсысын қойсақ та, бұлар бір ғана не? деген сұраққа жауап беріп, сөйлемде бастауыш қызметін атқарады.
Қазақ тілі – синоним сөздерге бай тіл. Синонимдік қатарлар әр сөз табының құрамында кездеседі. Мысалы, зат есімдерден болған синонимдер: өң, түс, түр, дидар, келбет, пішін, ажар, көрік, әлпет,шырай т.б. Сын есімдерден болған синонимдер: салмақты, сабырлы, ұстамды, байсалды. Етістіктерден болған синонимдер: амандасу, сәлемдесу, есендесу. Үстеулерден болған синонимдер: тез, жылдам, шапшаң, лезде.
4)Жаттығумен жұмыс:
70-жаттығу. Қазақ тілінің синонимдер сөздігін пайдаланып, әр синоним сыңарларын бір вагон деп есептеп, өздерің теріп алған синоним қатарын жасаңдар. Төмендегі синонимдік қатардағы сөздерді басқа сөздермен тіркестіріп, олардың қанша сөзбен тіркесе алу мүмкіндігін анықтаңдар.
