АКТ-ны пайдалану

АКТ-ны қазақ тілі сабақтарында  қолданудың тиімділігі

Асанова Ботагоз Беймендиновна

«Атамекен ауылының орта мектебі»мемлекеттік мекемесі

Ақмола облысы Бурабай ауданы

             Қазіргі таңда  жаңа технологияның қарыштап дамып келе жатқан кезеңі. Білім саласында да мектеп оқушыларының білім алуына ерекше көңіл бөлінуде.Тәуелсіз Қазақстанның болашағы-жастардың қолында десек, сол жас жеткіншектерді білімді,мәдениетті,Отанын адал сүйетіндей етіп тәрбиелеу-әрбір ұстаздың міндеті. Кез келген ұстазға пәнді оқытуда қойылатын басты талап-жаңа технологиялық әдістерді қолдана отырып,оқушыларға сапалы білім беру. «Жаңа ақпаратты коммуникациялық технологиялар»ұғымының пайда болуы білім беру саласында компьютердің қолданыла бастауымен тығыз байланысты.Жаңа ақпараттық технологиялар дегеніміз-білім беру ісінде ақпараттарды дайындап,оны оқушыға жеткізе білу. Ал,ол ақпараттарды оқушыға жеткізе білу компьютер арқылы іске асады.

     Мен өз тәжірибемде осы аталмыш технологияның элементтерін сабақ барысында қолдану әдісін пайдалануда көп жетістіктерге қол жеткіздім деп айта аламын. АКТ арқылы берілетін білім жаңа сабақты жүйелі түрде жеткізе білуге,есте сақтау қабілеттерін арттыруға,басқа ұлт өкілдері балаларына қазақша тілдік қатынастарды игере алуға мүмкіндік береді. Білім беру саласындағы көп қолданыста жүрген АКТ құралдары:интербелсенді тақта,мультимедия,интернет кеңістігі,электронды оқулық.Осы орайда реті келіп отырған қытай мақалын сөзіме тиек етіп алып отырмын: «Ауызша айтсаң-тез ұмыттым, көрсетсең-есте сақтаймын,іске кіріссең-үйренемін» Ендеше оқушылар құрғақ сөзді естігеннен гөрі интербелсенді тақтаға назар аударып,өтіп жатқан сабақты ұтымды түсінуіне мүмкіндік алады. Өз іс-тәжірибемде сабақ барысында төмендегі айғақтарға сүйенемін:

-Әр баланы  өз бетінше жұмыс жасай білуге үйрету;

-Оқушылардың шығармашылық қабілетінің дамуы;

-Ақпараттық сауаттылығы;

-АКТ арқылы оқушының жеке тұлғасын дамыту;

         Басқа ұлт өкілдерінің балаларына қазақ тілін тиімді жолмен үйретуде жаңа ақпараттық технологиялардың элементтерін пайдалану өз нәтижелерін көрсете бастады. АКТ қолданудың бір түрі-презентациямен жұмыс істеу болып табылады.Яғни,презентация –бұл слайд түрінде берілген материал:кесте,сызба,бейнематериалдар.Интерактивті тақтаны оқушылардың жас ерекшеліктеріне қарай әртүрлі тақырыпта материалдар енгізіп қоюға болады.Кез келген уақытта сол материалдарды ойланбастан қолдана беруге болады. Орыс топтарында есте сақтау диктанттары,мазмұндама,шығарма жоспарын құруда,сондай-ақ сөйлемдерді талдау жұмыстарында қолдану сабақтың тиімділігін арттырады.

        Әлемдегі электронды оқыту саласының жетістіктері негізінде жасалған көптілді білім беру платформасы Bilimland kz.сайты. Бүгінгі күн талаптарына жауап беретін білім беруге қажетті материалдардың ең ірі коллекциялары жинақталған бұл сайттта. Бұл ресурстың бар мүмкіндігін толық пайдалану мұғалім жұмысына аса зор септігін тигізеді. Мектеп бағдарламасына арналған ең бай интербелсенді сабақтар жинағы. Bilimland kz.-те мектеп бағдарламасының негізінде құрылған 40 000 –нан астам интербелсенді сабақтар бар. Бұл дегеніміз-егер мұғалім АКТ –ны сабақ барысында дұрыс қолдана білсе- мұғалім жұмысына өте көп септігін тигізеді деген сөз. Тек мектеп бағдарламасы ғана емес, 2-5 жас аралығындағы балалармен белсенді жұмыс жасау керек болса,бұл сайтта оларға арналған алуан түрлі ойындар мен жаттығулар жинақталған.

 Өз іс-тәжірибемде осы аталған сайтта берілген тапсырмалар жинағын пайдалану арқылы сабағымды қызықты әрі тартымды етіп өткізуге мүмкіндік бар.

  Қазақ халқының ұлы ақындарының бірі Мағжан Жұмабаевтың «Әрбір ел келешегіне негізді балаларын тәрбиелейтін,даярлайтын мектебінде қаламақ. Ел тағдыры мектебінің құрылысына байланысты нәрсе. Мектебімізді сау,таза берік һәм жанымызға қабысатын негізде құра білсек,келешегіміз үшін серттесуге болады» деген тамаша сөздері өз мәнін ешқашан жоймақ емес. Ендеше,әлемдік өркениетке бет алған бүгінгі қазақ елінің де болашағы білім мен тәрбиенің алауын жаққан мектеппен тікелей байланысты. Осындай мектепте білім мен тәрбиені қатар меңгеріп келе жатқан жас жеткіншектерді заманына қарай адамы етіп,жан-жақты дамыған,сауатты, адал ұрпақ етіп қалыптастыру біздің, ұстаздардың міндеті.Олай болса,  білім беру үрдісінде жаңарған технологияларды пайдалануға асығайық,ағайын!