Мен баламды танимын ба? (ата-аналармен жүргізілетін жұмыс түрі)

Мен баламды танимын ба?

(ата-аналармен жүргізілетін жұмыс түрі)

Барысы:

Тәрбиенің ең алғашқы бастамасын бала отбасынан алады. Отбасы - әр бала үшін алтын бесік, қанатын қатайтып, бұғанасын бекітіп, үлкен өмірге аттандыратын мейірімді биік тұғыр. Бала отбасы аясында түлеп өседі. Оңы мен солын таниды, ол алғашқы адамгершілік қасиеттерді де, еңбек әліппесінің бетін де осы отбасында ашады. «Гүл күнге қарап өседі» дегендей, бала да алдындағы ересектерге қарап бой түзейді. Ендеше, құрметті ата-аналар, қазір біз «Мен баламды білемін бе?» деп аталатын тренинг- сауал жүргіземіз.

Сауалымызды бастамас бұрын «Танысу» тренингін өткізіп жіберейін.

Мақсаты: Ата-ана мен бала арасындағы қарым-қатынасты арттыру және ата-ана баласының бойындағы мінез-құлық ерекшелігін қаншалықты айыра білетінін анықтау.

Нұсқау:

Аладарыңызда тұрған төрт суреттің біреуін өздеріңіздің таңдауларыңыз бойынша аласыз (тотықұс, маймыл, кішкене піл, қонжық).

Талқылау сұрақтары:

Ата-аналардан бұл суреттерді неліктен таңдағаны, баласының қай мінезін ұқсатқаны сұралады. Соңынан әр сурет бойынша мінездеме оқылып, ұсыныс беру. Ата-аналар суреттерді кезекпен келіп таңдап алып жазады.

«Тотықұс» мінезді балалар сезім әрекетіне бой алдырмайды. Жайдары және жарқын белсенді келеді, бір нәрсеге көңіл аудара шұғылданады. Берілген тапсырманы уақытымен орындайды. Шуға көп көңіл бөлмейді. Айналасындағы балалармен тепз қарым-қатынасқа түседі. Күн тәртібін сақтайды, уақытымен тамақтанғанды ұнатады. Егер де күн тәртібі бұзылса, көңіл күйінде қош болмайды, тез ренжіп, тәбеті мен ұйқысы қашады.

Ұсыныс

1. Күн тәртібін сақтау (тамақтану, ұйқы, толық белсенділік).

2. Балаға қимыл ойындар мен жай ойындар үшін жайлы дамытушылық орта жағдайларын жасау.

3. Баламен үйде «Кім жылдам?» атты жарыс ойындарын ойнау.

«Қонжық» балалар өте нәзік, айналасындағы болып жатқан нәрселерге көп көңіл бөледі. Өзге адамның көңіл күйі бұл балаға тез әсер етеді. Аз ғана аса мән бермейтін себеппен балаңызды ренжітіп алуыңыз мүмкін. Егер де мұндай баланы ештеңе алаңдатпаса, көңіл күйі көтеріңкі болады. Үлкен адамдардың өзіне көңіл бөлгенін ұнатады. Тез шаршайды, топ ортасында өзін қолайсыз сезінеді. Өзімен-өзі болғанды ұнатады.

Ұсыныс

1. Балаға үйде тыныш, қолайлы жағдай туғызу, жылы шырайлылық танытып, жай ырғақпен сөйлесу.

2. алдын ала кездесетін өзгеріс және жаңалықтармен баланы хабардар етіп отыру (балабақшаға бару, мектепке бару, таныс емес адамдармен кездесу).

3. Өзге балалармен қарым-қатынас ортануға көмектесу.

«Маймыл» балалар - өте қозғалғыш, жігерлі, шапшаң. Шулы ойындарды жақсы көреді, ол кімге болса да үйірсек, үлкендерге өткір, өз-өзін ұстай алмай қалады. Көрсеқызар, қызыл түсті заттарды, киімдерді жақсы көреді. Тез ашуланады, бірақ қайтымы шапшаң, зейіні тұрақсыздау. Сондықтан бір нәрсені бастан аяғына дейін істетемін деп жүріп жалықтырып алып жүрмеңіздер.

Ұсыныс

1. Зейіндерін дамыту жаттығуларын үнемі жүргізу.

2. Ашу-ызаның алдын алу.

3. Отырып ойнайтын ойындарды ойнату.

«Кішкене піл» мінезді балалар баяу қимылды, қыңырлыққа бейім, ренішті өте күйзеліспен қабылдайды. Нәзік жанды, ішкі сезімін ешкімге білдірмейді. Өте жайбасар болғандықтан ата-анасының баласына көңілі толмайды. Бірақ ол ата-анасына көп қолайсыздық тудырмайды. Көбінесе тыныш отырып ойнайтын ойындарды жақсы көреді. Сурет салғанды ұнатады. Мұндай балалар жай басып та биіктен көріне алады.

Ұсыныс

1. Шыдамдылық таныту

2. Баланың істей алатын істерін өзіңіз жасамаңыз (киіндіру) ойыншықтарын жинау

Қорытындылау.