Салауатты отбасы

Мақсаты: оқушыларға отбасындағы сүйіспеншіліктің маңыздылығын түсіндіре отырып, сүйісеншілік құндылығының мәнін ашу.

Міндеттері:

1.Оқушыларға отбасындағы сүйіспеншілікті қадірлеуге үйрету

2. Оқушылар бойындағы ақкөңілділік қасиеттерін дамыту.

3. Оқушыларды татулыққа,ақкөңілділікке,сүйіспеншілікке тәрбиелеу.

Ресурстар:

(материалдар, дереккөздер)

1. bilim-all.kz

2. uzdikter.biz

3. www.tarbie.kz

Сабақтың барысы:

1. Ұйымдастыру кезеңі. 5Т

2. Үй тапсырмасын тексеру:

«Менің отбасым қандай?» тақырыбында шағын әңгіме жазу.

№16, Ел аузынан «Жаның жеті жаманнан аман болсын» мәтінін оқып келу.

Сұрақтар:

1. Жан саулығы дегенді қалай түсінесіңдер?
2. Неліктен жаны саудың тәні сау болады?
3. Адамның жаны сау болуы үшін қандай құндылықтар мен қасиеттер болуы керек?
4. Өз жаныңның саулығын қалай сақтайсың?

5 Т – ережесі:

1. Тәртіп.

2. Талап.

3. Тыныштық.

4. Тазалық.

5. Татулық.

3. Дәйексөз

Отбасы ар-намыс, қуаныш пен бақыт, тілек пен үміт ұясы.
Қазақ мақалы

Сұрақтар:

1. Отбасының берекелі болуы кімге байланысты деп ойлайсыздар?

2. Дәйексөзден қандай ой түйдіңдер?

4. Оқиға айту (Мұғалім сыйы). Сары тауық пен балапандары

М. Төрежанов

Күздің бір күні сары тауық балапандарын ертіп, ауылдан ұзап кеткен. Аяқ астынан жаңбыр құйып кетті. Суық жаңбырдың астында қалған сары тауық балапандарын қанша асықса да, мекеніне жеткізе алатын емес. Өйткені балапандарының жылы жүні әлі шықпаған, балғын еді.

Сары тауық қатты састы. Шөжелерін қос қанатының астына алып, бауырына басты. Бір балапаны сыймай сыртта қалды. Ана айла жасап, балапандарын кезектестіріп бір-бірден тыста ұстап, тоңа бастағанда бауырына алып отырды. Кезек ең кенжесіне келгенде ана оны сыртқа шығармады.

• Оны неге шығармайсыз? – деп сұрады бір ақ балапан.

• Ол тым жас.

• Жас болса қайтеді? Кезегі келгенде ол да шықсын.

• Сырқаттанып қалады. Кішімізге өзгеміз қамқоршы болуымыз керек емес пе? Кәне, мұның орнына кім барады?- деп сұрады анасы.

• Мен,- деді тұңғышы.

• Мен барайын! - деді оған тетелесі.

• Кезекті маған беріңіз! – деді одан кішісі.

• Мен қалам ба сонда? – деді алғашқы қарсылық білдірген ақ балапан.

• Қатесін түсінген сенің барғаның жөн! – деді сары тауық балапанды тысқа қарай ысырып.

Сары тауық су өтіп қатты жаурады. Бірақ балапандарын тоңдырған жоқ. Балаға деген ыстық махаббатымен жылытып, сақтап қалды. Күн ашылып, ана жүрегіндей жадырады.

Сұрақтар:

1. Алғашқы қарсылық білдірген ақ балапанның әрекетінен қандай сабақ алдыңдар?

2. Неліктен әлсіз адамдарға сүйіспеншілік танытып, көмектесуіміз қажет?

3. Риясыз сүйіспеншілік адамдарға қандай көңіл-күй сыйлайды?

4. Ересек адамдардан қамқорлық сезінгенде қандай күйде боласыңдар?

5. Шығармашылық жұмыс, топпен жұмыс.

Тапсырма:

1 – топ: Кестеге назар аударыңдар. Отбасындағы аға, іні, әпке, сіңлі, қарындастың міндеттерін жазыңдар.

2 – топ: Салауатты отбасының ережесін құрастырыңдар.

3 – топ: Төменде берілген сөздер мен сөз тіркестерін пайдаланып «Бақытты отбасы» тақырыбында әңгіме жазыңдар.
Керекті сөздер мен сөз тіркестері: жақсы ой, адал ниет, жақсы іс, көмек, қамқорлық, жанашырлық, сүйіспеншілік.

6. Топпен ән айту. Біз осылай өсеміз
Өлеңін жазған М. Әлімбаев. Әнін жазған: И.Нүсіпбаев
Таң атады арайлап,
Күн күлімдеп туады.
Жадырайды бар аймақ,
Жарқырайды шуағы.
Дала гүлін жинаған,
Жазып ерлік дастанды.
Аталарым сыйлаған
Бізге ашық аспанды.
Жарқын заман бөбегін
Аялайды нұрлы таң.
Алтын бесік өз елім,
Туған өлкем Ұлы Отан.

7. Үй тапсырмасы.

1. №17– сабақ. Леонардо да Винчинің «Қайырымдылық» мәтінін оқып келу.

8. Сабақтың қорытынды сәті.

Бүгінгі сабақтан игерген жақсы қасиеттерді есімізге түсіріп, жүрегімізге сақтайық.